1 Hageeti Solomona leemisota. Aadhdhida eranchcha na7ai ba aawaa ufaissees; shin eeyya na7ai ba aayyiyo azzanissees.

2 Nagaran demmido miishshai go77enna; shin xillotettai haiquwaappe ashshees.

3 GODAI xillota namisissenna; shin nagaranchchatu amuwaa polissenna.

4 Azallatettai hiyyeesissees; shin minnidi oottiyoogee dureyees.

5 Aadhdhida eranchcha urai kattaa boniyan shiishshees; shin kattaa cakkiyo wode xiskkiya urai kauyyees.

6 Xillo asai anjjettees; shin nagaranchchaa doonai makkalaa genttees.

7 Xilluwaa sunttai anjjuwan xeesettiiddi, de7i aggees; shin nagaranchchatu sunttai sohuwaara dogettees.

8 Aadhdhida eranchchati azazidobaa oottoosona; shin eeyyatettan coo biddiyaageeti bashshau boosona.

9 Suure asi saro de7ees; shin geella urai ba mooruwan ohettees.

10 Geniiddi qim77otiya uri meto kessees; shin yayyennan seeriya uri sarotettaa medhdhees.

11 Xilluwaa haasayai de7uwaa pultto; shin nagaranchchaa haasayai makkalaa genttees.

12 Ixoi palamaa denttettees; shin siiqoi mooruwaa ubbaa qoodenna.

13 Wozannaama asai aadhdhida eran haasayees; shin eeyya urai xam77an shocettees.

14 Aadhdhida eranchchati eraa dagayoosona; shin eeyya haasayaa haasayiya urai bana bashshees.

15 Duriyaa miishshai direttida katamaadan, ba godaa naagees; shin hiyyeesatettai hiyyeesaa xaissees.

16 Xillo uraa a lo77o oosoi de7uwau kaalettees; shin iita uraa wurssettai qixaate.

17 Seerin eeniya urai de7uwaa ogiyan hemettees; shin seerin ixxiya urai balees.

18 Ixxiiddi ba ixxiyoogaa erissenna urai worddanchcha; zigirssaa laaliya uraikka eeyya.

19 Daro haasayaa giddon nagari xayenna; shin ba doonaa shiishshi ekkiya uri aadhdhida eranchcha.

20 Xilluwaa inxxarssai tigettida geeshsha biraa mala; shin iita uraa qofau gatee guutta.

21 Xillo uraa haasayai daro asaa go77ees; shin eeyyati bantta wozanaa pacan haiqqoosona.

22 GODAA anjjoi dure kessees; i he duretettan meto walakkenna.

23 Eeyya urau iitabaa oottiyoogee kaassa mala; shin wozannaama urai aadhdhida eratettan ufaittees.

24 Iita urai hirggidobai a bolli gakkana; shin xilloi amottidobai imettana.

25 Gotee denddidi aadhdhiichchiyo wode, nagaranchchati beettokkona; shin xilloti merinau minnidi de7ana.

26 Caalai achchaa zil77issiyoogaadaaninne cuwai aifiyaa poogiyoogaadan, azalla uraa kiittiyoogee yiilloyees.

27 GODAASSI yayyiyoogee bariyaa adussees; shin nagaranchcha uraa baree qaammees.

28 Xillo urai sinttaara ufaissai yaana giidi naagees; shin iita urai sinttaara yaana giidi naagiyoobi aibinne baawa.

29 GODAA ogee xillotussi baqati attiyo soho; shin iitaa oottiyaageetassi bashsha.

30 Xilloti mulekka xoqolettokkona; shin iitati biittaa bolli de7okkona.

31 Xillo asai aadhdhida eratettaa haasayees; shin geellabaa haasayiya inxxarssai qanxxettana.

32 Xillo asai bessiya haasayaa erees; shin iita asai geellaa haasayees.