1 Josefena avre'za Isipi mopare vzageno, Potifa Isipi ra eri'za ne' Fero avate vugota hu'nea kva (kepten) ne'mo, Ismael vahe'mo'za avre'za vu'naza vahepinti miza huno avrente'ne. 2 Ra Anumzamo Josefe ene mani'negeno, maka erizama'amo knare'zanke hu'ne. Josefe ozafa'amofo nompi Isipi mani'ne. 3 Ozafa'amo'ma keana Ra Anumzamo Josefe ene mani'negeno, eri'za kama'amo'a agri azantera knare zanke hu'ne. 4 Ana higeno, ozafa'amo Josefena antahimino, avate eri'za ne' azeri oti'ne, Josefena makazama'a azampi antegeno kegva krinte'ne. 5 Isipi ne'mo'ma ana'ma higeno'a, Ra Anumzamo'a Josefe agra noma'afi mani'negu huno asomu hunte'ne, Ra Anumzamo nompi zane, fegi'a hozafi zanena maka asomu hunte'ne. 6 Maka'zana Josefe azampi Potifa'a antegeno kegva kri'geno, maka zankura agesa ontahino kave'ma nesia zankuke hu'ne.

Josefe agi'avugosane, agia azane, avufganena knare huno soe zanke hu'ne. 7 Anazama nehifina ozafa'amofo nenaro'a Josefe kesane nehuno anage hu'ne, enka nagrane emso. 8 Hianagi agra ana kegu i'o huno ozafa'amofo nenaro asmi'ne, Antahio, nagrama ama nompima mani'nogeno'a ozafanimo'a maka'zankura nontahie, maka'zama ante'nea zana nagri nzampi kegva kri'nenogu hunante'ne. 9 Mago agtere'sa nera ama nompina omni'ne, nagrakere, mago'zane huno refite onante'ne kagra'akere na'ankure kagra nenaroga mani'nane. Inankna huna nagra tusi'a kefo'zana erifore hu'na kumira Anumzamofo avufina hugahue? 10 Ana a'mo kinagane, nanteranema Josefenku msesu'e huge erava'o huoma nehigeno'a, ke'a antahi omi'ne.

11 Mago'zupa ana hu'ne, Josefe'a eri'za erinaku nompi mrerigeno, ruga'a eri'za vahera ana nompina omni'nageno keteno, 12 ozafa'amofo nenaro nakre ku'are avazu huno, nagrane emaso higeno, ana nakre ku'a azampi zafi netreno, freno megi'a atirmino vu'ne. 13 Ozafa'amofo nenaroma keama Josefe'ma nakreku'ama azampi atreno freno fegi'a atirmigeno'a, 14 ana a'mo noma'afi eri'za eneriza vahe ke hige'za eme atru hzageno, Keho, Hibru ne'ma avrenoma eme ante'nea ne'mo nagri zokago renantenaku ege'na krafa hu'noe. 15 Antahige'na ranke hu'na krafama nehuana, nakre ku'a avateti zafitreno freno fegi'a vu'ne. 16 Higeno ana nakre ku'a avate ante'negeno, ozafa'amo nonte e'ne. 17 Anante Potifa egeno, nenaro amanage huno asmi'ne, miza e'ori kazo kazo Hibru eri'za ne' avrenka eme tmi'nana ne'mo, nagrite eno zokago renantenaku nehige'na, 18 ranke'ma hu'na krafa hugeno'a, nakre ku'a anante atreno atirmino fegi'a freno vu'ne.

19 Josefe ozafamo, nenaro asmia ke nentahino. Miza e'ori kazokzo eri'za ne'kamo anahura nagrira hu'ne, hiankemo rimpamo teve re'ne. 20 Ana higeno Josefe ozafa'amo avreno kina ome tafi'ne, kinimofo (Fero) eri'za vahe zamare'za ome nerafi'za kumate anampi kina hunte'naze, kina huntageno anampinka mani'ne. 21 Ana hianagi, Ra Anumzamo Josefe ene mani'neno agampu hunentegeno, kina kumate vugota hu'nea ne'mofo avumo keana knare'za hu'ne. 22 Kina kumate vugote'nea ne'mo Josefena maka'a kina vahe'mokizmire kegva krinogu azeri oti'ne, inankna zama anampima hniazana agri azampi ante'ne. 23 Kina kumate vugote'nea ne'mo Josefe azampima ante'nea zankura agesa ontahine, na'ankure, Ra Anumzamo agri'ene mani'negu huno, maka'zama Josefe'ma hiazana, Ra Anumzamo aza nehigeno knare'zanke hu'ne.