A Wakak na Wasiso uno Iesu Karisito
o Matiu
i tumusi
A wasiso talapor mugu
O Matiu i tumus a buk ri, i ara tagun a noino ma aru nat na ususer anun o Iesu, ma ara risano kai o Liwai. Numugu i a tene los takis, ma i papam tomo nama gapman Rom. Numur o Iesu i kabo pasi, ra i wanpat a nat na ususer (tama Mt 9:9-13).
O Matiu i tumus a buk ri torom anun a taro, a taro Juda. A taro Juda det kis langlang sur a inawan pat anun a musano ra o God i pilok pasi, sur in king anundet. Una wasiso Ibru di watungi nama Mesaia, ma una wasiso Grik di watungi nama Karisito.
O Matiu i nemi sur in inanos det lena, o Iesu ut ra a Karisito, a King anun a taro Juda. Sur i mo ra i wasiso una inawan pat anun o Iesu ra i elar nama king.
Ma i watung puaso i kai a ramano kum wasiso tagun a Mugano Buk Tabu una Karisito. A inawan pat anun o Iesu i ulingmulus a kum wasiso ri. O Matiu i tumtumus kai una etowo anun o Iesu una matanitu anun o God.
A inawan ina buk Matiu:
A usus ino Iesu (1:1-2:23)
A pinapam anun o Jon a Tene Baptaiso (3:1-12)
Di baptaiso o Iesu ra numur o Satan i lari (3:13-4:11)
O Iesu i papam tong o Galili (4:12-18:35)
O Iesu i wan usapat o Jerusalem (19:1-20:34)
A tintinip na wik ma a minat ino Iesu (21:1-27:66)
A katkatutur melet anun o Iesu tagun a minat (28:1-20)
1
A risan a kabotaro anun o Iesu Karisito
(Lk 3:23-38)
1 Iri a risan a kabotaro tagun numugu ra o Iesu Karisito i wanpat tagun det. O Iesu, i a nutun o Dewid, o Dewid i a nutun o Abaram.
2 O Abaram i o taman o Aisak,
O Aisak i o taman o Jekop,
ma o Jekop i o taman o Juda ma a kum tistisino.
3 O Juda i o taman o Peres der nam o Sera, ra a nander o Tamar.
O Peres i o taman o Esrom,
o Esrom i o taman o Ram,
4 ma o Ram i o taman o Aminadap,
o Aminadap i o taman o Nason,
ma o Nason i o taman o Salmon,
5 o Salmon i o taman o Boas, ma o nano a risano o Reap.
O Boas i o taman o Obed, ma o nano a risano o Rut.
O Obed i o taman o Jesi,
6 ma o Jesi i o taman o Dewid, i ra a king.
O Dewid i o taman o Solomon, ma o nano a ino ra i nolin pas nam o Uria.
7 O Solomon i o taman o Roboam,
o Roboam i o taman o Abia,
o Abia i o taman o Asa,
8 o Asa i o taman o Josapat,
o Josapat i o taman o Joram,
ma o Joram i o taman o Usia,
9 o Usia i o taman o Jotam,
o Jotam i o taman o Akas,
ma o Akas i o taman o Esekia,
10 o Esekia i o taman o Manase,
o Manase i o taman o Amon,
ma o Amon i o taman o Josaia,
11 o Josaia i ulabo o Jekonia tomo nama kum tistisino. Numur tano, a taro Babilon det dat pas a taro Israel utong o Babilon sur det in kis na karabus.
12 Numur tan a inawan utong o Babilon:
O Jekonia i ulabo o Salatiel,
o Salatiel i o taman o Serubabel,
13 o Serubabel i o taman o Abiut,
o Abiut i o taman o Eliakim,
ma o Eliakim i o taman o Asor,
14 o Asor i o taman o Sadok,
o Sadok i o taman o Akim,
ma o Akim i o taman o Eliut,
15 o Eliut i o taman o Eliaser,
o Eliaser i o taman o Matan,
ma o Matan i o taman o Jekop,
16 o Jekop i o taman o Josep, i ra i nolin nam o Maria. O Maria i usus o Iesu, ra di watungi a Karisito, i ra o God i tulu ru i.
17 A kum taun taro turpasi tagun o Abaram tuk un o Dewid i elar nama noino ma wat det, ma tagun o Dewid tuk una inawan na karabus tong o Babilon a noino ma wat kai det, ma tagun a inawan na karabus tong o Babilon tuk un o Karisito a noino ma wat na taun taro kai.
A saksak utna un o Maria ra i usus o Iesu Karisito
(Lk 2:1-7)
18 Di usus pas o Iesu Karisito lenri: O nano, o Maria, di sa ubek bat tari sur anun o Josep, ikut numugu tan anunder a nolin o Maria i sa tasmani lena i tianan tan a Tokodos na Nion. 19 O Josep ra di sa ubek bat tar o Maria toromi, i a tene tokodos, ma ke nemi sur in ban umaimai o Maria umatan a taro. Ra i nuki lena in kutus eno ru anunder a liliman sur a nolin.
20 Ra i nuknuk utmakai una utna ri, a ensel anun a Labino i wanpat toromi una ririon ra i watungi lena, “Josep, a nutun o Dewid, gong u wur nuknuk un o Maria, un ben pasi kut sur anum a ino. Uni a nat ra i tianan pasi, i wanpat tagun a Tokodos na Nion. 21 In usus pas a nat na musano ma un pasor a risano nam o Iesu, uni in ulaun pas anun a taro gusun anundet a kum sakino petutna.”
22 A kum utna rop ri i wanpat sur din pam sot pas a kum wasiso anun a Labino ra anun a poropet i sa upuaso tari lenri, 23 “Tama i, a toraro na ino in tianan ma in usus pas a nat na musano ra din watungi nam o Emanuel,” Ais 7:14
a kukuraino lena, “O God i kis tomo nam dat.”
24 Ra o Josep i tuangun, i muri lenutra a ensel anun a Labino i sa inanos tari nami, ra i ben pas o Maria sur anun a ino. 25 Ikut ka der inep tomo pas tuk ra o Maria i usus pas a nat na musano. Ma o Josep i pasor a risano nam o Iesu.