Kadasi n bo bu kɛrɛ fa maari
HIBURUFƆM
ni
1
Nyɛmɛ nɔaniɛ n bo i jɔjɔ fiteeri i Wa n dɔ ni
1 Dawa saŋga Nyɛmɛ yo faari i nɔaniɛ maari i nɔaniɛ kanfɔm wɔ, saŋga barasu ni atin barasu barasum, na bu sukan i kere ya nam. 2 Ama, ahin awieeri su saŋga n bo ya wo nu ni, Nyɛmɛ afa i Wa n su ye i fa i nɔaniɛ n jɔjɔ ya sɔ a. Nyɛmɛ maari yiri yiiri durunya n a. Na wɔ se ka, awieeri su, deke n kɛrɛ bá yo i dɛɛ wɔ.
3 I jirima woowa wein ni kere kabo Nyɛmɛ ti a. Kabo Nyɛmɛ ti ni, i woowa ti sɔ ɔ. I nɔaniɛ n bo i la yiko ni, i fa nyini bita durunya n kɛrɛ a. I faari i ŋu fa yoori yoowa, adena Nyɛmɛ fa adamande satiɛ ce i. Nyini dɛɛ sin, na wɔ nya akɔ atana aŋgoro, Micɛra Kpiri n saa fɔmbɔrɔ su. 4 Nyɛmɛ maari i jinaabiri bambaka bo i tara i mɛrɛkɛm dɛɛ, na wɔ kaaki ama i duma bo i tara bu dɛɛ ni.
Kabo Nyɛmɛ Wa n tara i mɛrɛkɛm barasu ni
5 Dama kabo Nyɛmɛ seeri i Wa n ni, ka,
“Wɔrɔ ti m Wa a,
nyuma, m káaki u Si,”
wɔ se má i mɛrɛkɛ n be sɔ. Bekun, i ŋa
“M yó u Si,
na u gusu yó m Wa.”
6 Sasu bekun, saŋga bo Nyɛmɛ yo ŋa i sunma i Wa kun n kpein n durunya n nu ni, na wɔ se ka,
“Ma Nyɛmɛ mɛrɛkɛm kɛrɛ su i.”
7 Fa kɔ kabo Nyɛmɛ jɔjɔɔri i mɛrɛkɛm jɔrɛ ni, i ŋa,
“Mini, m ma m mɛrɛkɛm yo bu juma
kabo aŋuma, ni sin yo bu juma barasu n wɔ.”
8 Ama, kabo Nyɛmɛ jɔjɔɔri i Wa n dɔ ni, i ŋa,
“Wɔrɔ ti Nyɛmɛ a, u fɛmɛya biɛ n la má awieeri.
A bita u fɛmɛya n ni nahɔrɛ atin su wɔ.
9 A koro sa bo i kɔ atin su wɔ,
na a koro má sa bo i kɔ má atin su a.
Nyini dɛɛ ti ye Nyɛmɛ ayi u a,
ye wɔ ma u ahoreda bo i tara u beŋgum kɛrɛ n a.”
10 Na Nyɛmɛ akaaki ase i Wa n ka,
“Ya Mibiɛ, bumboori ni, wɔrɔ yiiri asiɛŋgu a.
U sa bo a yoori i dɛɛ ti, ye aŋgoro wo bɛrɛ a.
11 I kɛrɛ bá ka ŋgbɛɛn wɔ,
ama, wɔrɔ wo bɛrɛ wɔ saŋga kɛrɛ.
Aŋgoro n ni asiɛŋgu kɛrɛ yó dawa
kabo sutura yo dawa barasu n wɔ.
12 A pɔ́ɔndi bu ka sanvuin bo wɔ do wɔ,
na a bá kaaki i fɔfɔrɛ.
Ama, wɔrɔ kaaki má fieo,
na u afɔ la má awieeri.”
13 Na Nyɛmɛ akaaki ase i Wa n ka,
“Ba tana m saa fɔmbɔrɔ su fɛn,
haari m bá ma a kunma u kpɔfɔm na a nana bu kɛrɛ ŋu.”
Kabo i seeri sɔ ni, wɔ nya ase má i mɛrɛkɛ n be sɔ.
14 Ye i mɛrɛkɛm ti nzum wɔ? Bu ti awiɛwiɛm bo bu su Nyɛmɛ wɔ, na i sunma bu na bu kɔ buka minɛm bo bu bá nya tiide ni.