30
1 Be wali na afoha ayeligi dunu da nama habosesesa.
Ilia eda da dunu hamedeiba:le,
ilia da na wa:me amo na sibi wa:i sosodo aligimusa: fidima:ne,
na da logo hame doasimu galu.
2 Ilia da gasa guminisi dunu, gasa hameba:le,
na hawa: hamosu hamomu hamedei ba:i.
3 Ilia da hame gagui amola ha:aligiba:le,
ilia da gasia hafoga:i sogebiga, hafoga:i ifa difi gagisu.
4 Ilia da hafoga:i soge ifalabo liligi a:le fasili, nasu.
Hame hedai ‘isu doa:su’ ifa ea difi amolawane nasu.
5 Dunu eno da wamolasu dunuma wele sia:ne, sefasibi defele,
ilima wele sia:ne sefasi.
6 Ilia da magufu gelabo, gafulu ganodini dogoi, amo ganodini golasu.
7 Ilia da wadela:i sogega sigua ohe defele hulalu.
Ilia da ifalabo haguduga gogodogagini esalusu.
8 Ilia da dio hamedene, hamedeidafa dunu esalu.
Eno dunu ilia da sogega gadili sefasi.
9 Be wali ilia da misini, nama oufesega:ne habosesesa.
Na da ilima oufesega:su liligi fawane gala.
10 Ilia da nama higale hamosa.
Ilia da ili hou da na hou bagade baligisa dawa:.
Amola ilia da misini, na odagia defo adugagala:sa.
11 Gode da na gasa hame amola hahani hamoi dagoi.
Amaiba:le, amo hamedei dunu da ougi bagadewane nama doagala:sa.
12 Amo dunu wa:i da na odagiaba doagala:sa.
Na iliba:le beda:ga hobeasa.
Ilia da na dafawanedafa hasalima:ne ilegelala.
13 Ilia da na hobeamu logo hedofasa.
Ilia na gugunufinisimusa:, logo hogosa.
Ilia logo hedofamu dunu da hame gala.
14 Ilia da na gaga:i dobea holelesisi gelabodili nama soagalaguda:sa.
15 Na da beda:su hou amoga hasali dagoi.
Na hahawane hou da hedolo fo mabe agoai, asi dagoi ba:sa.
Na bagade gagui hou da mu mobi defele, asi dagoi ba:sa.
16 Na da wali bogomu gadenei galebe.
Na se nabasu amo uhimu da hamedei.
17 Gasia, na gasa huluane da sesedudaha.
Se da na da:iba:le gadigadidudabe da hame yolesa.
18 Gode da na abula mugia gaguli, bebenoagisisa.
19 E da na gaguli, fafua gisalugala:sa.
Na hou da osobo gulu hame baligisa.
20 Gode! Na da Dima wele sia:sa, be Di da nama hame adole iaha.
Na Dima sia:ne gadosea, Di da na sia: hame naba.
21 Di da nama mae asigiliwane hamosa.
Dia gasa huluane amoga nama se iaha.
22 Dia da na foga mini masa:ne, logo doasisa.
Di da gibula bobodobe isu amoga, na mini laha.
23 Na dawa:! Dunu huluane ilima misunu hou defele,
Di da na bogoma:ne oule ahoa.
24 Na da wadela:lesi dagoi.
Di da nama asigima:ne fawane, na edegesa.
Dia abuliba:le nama doagala:sala:?
25 Na da bidi hamosu lai dunuma asigiba:le, dinanu.
Amola hame gagui dunuma asigilalu.
26 Na da hahawane hou amola hadigi hou nama misa:ne dawa:i.
Be bidi hamosu amola gasi amo fawane nama doaga:i.
27 Na da da:i dioi amola se nabasu amoga fawane sagodigi diala.
Na da eso huluane se fawane nabala.
28 Na da alaloyo amo ganodini ahoa.
Na da dunu ilia odagiaba wa:legadole, fidima:ne adole ba:sa.
29 Na sia: da sigua wa:me amola wida (osadaligi) ilia ga:be defele,
da:i dioi amola fofagi agoai naba.
30 Na gadofo da afadenene, bunumai hamoi dagoi.
Na da asugiga dogolosa.
31 Na da musa: hahawane gesami hea:su nabi.
Be wali na da disa gugulubi fawane naba.