89
याहवेहजी लबै खोंयोंइ आनुबै म्हाँयाए बारेर ङइ खोंयोंइ क्वे प्रिंब्मुँ
एतान एज्रिए मस्किल* 89:0 मस्किलए मतलब पक्का था आरे, दिलेया ज्ञान बुद्धि पिंबै क्वे मुँलै। घ्रि।✡ 89:0 १ म्रुँ ४:३१
1 याहवेहजी लबै खोंयोंइ आनुबै म्हाँयाए बारेर ङइ खोंयोंइ क्वे प्रिंब्मुँ;
क्हि भर लल् खाँब मुँ बिसि ङइ ताँन् पुस्ता-पुस्ताने बिमिंब्मुँ।
2 “क्हिए आनुबै म्हाँया खोंयोंन् बिलै तरिब्मुँ;
मु तरिब् धोंले क्हिए ताँ खोंयोंन् बिलै भर लल् खाँब लइमुँ,” बिसि ङ बिप्रब्मुँ।
3 “ङइ त्हाँबै म्हिने बाछा फैइमुँ,” बिसि याहवेहजी बिइ।
“ङए के लबै म्हि दाऊदने ङइ चु कसम चइमुँ:
4 ‘क्हिए सन्तानलाइ खोंयोंन् बिलै ङइ म्रुँ तल् पिंब्मुँ,
धै क्हिए ग्याल्स पुस्ता-पुस्ता समा तल् पिंब्मुँ,’ बिसि
ङए के लबै म्हि दाऊदने कसम चइमुँ।”✡ 89:4 २ शमू ७:१२-१६; १ इति १७:११-१४; भज १३२:११; चिब्मैं २:३०
तिस्याँदे मैंन्
5 ओ याहवेह, क्हिजी औदिबै केमैं लइमुँ धै क्हि भर लल् खाँब मुँ बिसि
स्वर्गदूतमैं च्होंबै क्ल्ह्योर चमैंइ क्हिए मिं थेब् लब्मुँ।
6 तलेबिस्याँ मुर मुँब्मैं न्होंर याहवेहने बालु खाब् च्हैंल् खाँमुँ?
स्वर्गर्बै सो प्ह्याबै सैमैं न्होंरै या याहवेह धों तब खाब् मुँ?
7 स्वर्गदूतमैं च्होंबै क्ल्ह्योर परमेश्वरने बेल्ले ङ्हिंल् त्हुम्,
धै खीए खागु मुँब्मैंइ खीए मान लल् त्हुम्।
8 ओ स्वर्गर्बै सेनामैंए चिब याहवेह परमेश्वर,
क्हि धों तब शक्ति मुँब खाब् मुँ?
ओ याहवेह, क्हि तोन्दोंरि सैर भर लल् खाँब मुँ।
9 प्ल्हों खबै मा ङ्युँइलाइ क्हिजीन् तार झोंम्;
चए भेल्गलाइ क्हिजीन् च्याँ लमिंम्।
10 क्हिजी सैवाबै म्हि धोंले राहाबलाइ† 89:10 कबितार राहाबए अर्थ मिश्र ह्यल ग त्हुल भुँ लवाइ;
क्हिजी ह्रोंसए शत्तुरमैंलाइ ह्रोंसए भोंबै योजी सग्याँ प्हुँग्याँ लवाइ।
11 मु क्हिलन् ग; पृथ्बी या क्हिलन् ग;
ताँन् ह्युल नेरो चर मुँबै तोन्दोंरि सै क्हिजीन् बनेब् ग।
12 उत्तर नेरो दक्षिण क्हिजीन् बनेब् ग;
तबोर नेरो हेर्मोन कोंमैं सैं तोंदै क्हिए मिंर क्वे प्रिंम्।
13 क्हिए पाख्रर बेल्ले शक्ति मुँ;
क्हिए यो भोंब मुँ, क्हिए क्योलो यो नुब मुँ।
14 ठिक के नेरो ठिक निसाफ लसि क्हिजी ग्याल्स लम्;
क्हिजी खोंयोंन् आनुबै म्हाँया नेरो भर लल् खाँबै के लम्।
15 ओ याहवेह, क्हिए छ्याँबै बयन लल् ह्रब्मैं आशिक योंम्,
चमैं क्हिए ल्हयोए ह्वेर प्ररिम्।
16 चमैं त्हिंइतिमिन् क्हिए मिं किंसि सैं तोंम्,
धै क्हिजी लबै ठिक केमैं म्रोंसि चमैं आनन्द तम्।
17 तलेबिस्याँ क्हिजीन् चमैंलाइ थेबै शक्ति पिंम्।
क्हिए म्हाँयाजी ङिलाइ ट्होल् लमिंइमुँ,‡ 89:17 ङिलाइ ट्होल् लमिंइमुँ हिब्रू क्युइर, ङिए रु कैंडो लमिंइमुँ
18 तलेबिस्याँ ढालइ धोंले ङिलाइ रक्षा लमिंबै म्हि याहवेहलन् ग,
इस्राएलर्बै पबित्र परमेश्वरजी ङिलाइ ङिए म्रुँ पिंइमुँ।
19 क्हिजी बिब् ङिंबै म्हिने तिखे दर्शनर बिइ:
“ङइ बेल्ले भोंबै म्हिलाइ भों पिंइमुँ;
इस्राएली म्हिमैंए न्होंउँइँले त्हाँबै म्हिलाइ ङइ म्रुँ लमिंइमुँ।
20 ङए के लबै म्हि दाऊदलाइ ङइ योंइमुँ;
ह्रोंसए पबित्र छ्युगु फोसि ङइ चलाइ त्हाँइमुँ।✡ 89:20 १ शमू ७:१२-१६; १६:१२; चिब्मैं १३:२२
21 ङए यो चए फिर तब्मुँ;
ङए पाख्रइ चलाइ भोंब लमिंब्मुँ।
22 शत्तुरमैं खाबज्यै या चलाइ ट्होरिब् आरे;
दुष्टमैंइ चलाइ दुःख पिंरिब् आरे।
23 चए बिरोधीमैंलाइ चए उँइँर्न त्हुल भुँ लवाब्मुँ,
धै चलाइ आखोब्मैंलाइ ङइ सैवाब्मुँ।
24 ङलाइ चइ भर लल् खाँब्मुँ धै ङइ खोंयोंइ आनुबै म्हाँया चने लब्मुँ,
धै ङए मिंउँइँले च भोंब§ 89:24 च भोंब हिब्रू क्युइर, चए रु नुब तब्मुँ
25 ङइ चए यो मा ङ्युँइए फिर
धै चए क्योलो यो स्योंमैंए फिर थेंब्मुँ।
26 चइ ङने छ बिसि बिन्ति लब्मुँ,
‘क्हि ङए आबा, ङए परमेश्वर ग, धै क्हिजी ङ जोगेमिंसि रक्षा लमिंम्।’
27 चलाइ ङए च्ह थेब लमिंब्मुँ,
पृथ्बीर्बै म्रुँमैंए न्होंर ताँन् भन्दा थेब चलाइ लमिंब्मुँ।✡ 89:27 दर्शन १:५
28 ङइ चए फिर ङए म्हाँया खोंयोंन् बिलै थेंब्मुँ,
धै चने बालु फैबै ङए बाछा खोंयोंन् बिलै तरिब्मुँ।
29 चए सन्तानलाइ खोंयोंन् बिलै ङ भोंब लमिंब्मुँ,
धै चए ग्याल्स मु मुँन् समा तरिब्मुँ।
30 “चए प्हसेमैंइ ङए ठिम आम्हाँदिइ बिस्याँ
धै ङए निसाफमैंर आप्रइ बिस्याँ,
31 ङए निसाफमैं चमैंइ फुवाइ बिस्याँ
धै ङए ताँ आङिंइ बिस्याँ,
32 चमैंइ लबै पापए सजैं प्हरेइ पिंब्मुँ,
धै चमैंइ लबै आछ्याँबै केमैंए सजैं कोरइ प्रुब्मुँ,
33 दिलेया ङए खोंयोंइ आनुबै म्हाँया दाऊदउँइँले स्योरिब् आरे,
चने बालु ङइ फैबै बाछा ङ भर पर्दिल्ले लब्मुँ।
34 ङइ फैबै बाछा ङ फुरिब् आरे,
ङए सुँउँइँले त्होंबै बचन ङ फेर्दिरिब् आरे।
35 ‘दाऊदए सन्तान खोंयोंन् बिलै तरिब्मुँ,
धै त्हिंयाँ मुँन् समा चए राजगद्दि ङए उँइँर तरिब्मुँ।
36 मुर लयाँ भर लल् खाँबै साक्षि तरिब् धोंले
दाऊदए राजगद्दि ङइ खोंयोंन् बिलै थेंमिंब्मुँ,’ बिसि
37 ह्रोंसए पबित्र मिंर ङइ खोंयोंबै ल्हागिर कसम चइमुँ;
दाऊदलाइ ङ स्योर तेरिब् आरे।”
तिस्याँदे मैंन्
38 दिलेया छ्युगु फोसि त्हाँबै ह्रोंसए म्हिलाइ ह्रिस खसि क्हिजी पिवाइमुँ,
धै तो धोंइ आङ्हाँइमुँ।
39 ह्रोंसए के लबै म्हिने क्हिजी बाछा टोंवाँइमुँ;
चए मुकुट सर कोंवासि क्हिजी अपबित्र लवाइमुँ।
40 चए यरूशलेम सहर रक्षा लबै ताँन् गारामैं क्हिजी फुवाइमुँ;
धै चए किल्लामैं नास लवाइमुँ।
41 च घ्याँ तसि ह्याब्मैं ताँनइ चए सहर लुडिइमुँ;
धै ह्रोंसए ङ्हेब्मैंइ चलाइ प्ह्रइमुँ।
42 चए शत्तुरमैंए क्योलो यो क्हिजी ट्होल् लमिंइमुँ;
चए ताँन् शत्तुरमैंलाइ क्हिजी सैं तोंल् लमिंइमुँ।
43 चए सेलाँए धार क्हिजी आछ्याँरब् लमिंइमुँ,
धै ल्हडेर ह्याल् आखाँब् लमिंइमुँ।
44 चए मान क्हिजी प्हेंवाइमुँ,
धै चए राजगद्दि सर भ्योंवाइमुँ।
45 चए छ्ह क्हिजी रिंठि लमिंइमुँ;
क्हिजी चलाइ फापिन् लवाइमुँ।
तिस्याँदे मैंन्
46 ओ याहवेह, ह्रोंसलाइ युगुर्लै लोथेंब्मुँ?
क्हिए ह्रिस खोंयों समा मि धोंले लुँरिब्मुँ?
47 ङए छ्ह कति रिंठि मुँ बिसि मैंमिंन्दि!
क्हिजी म्हिमैंलाइ फाकर्न बनेल् वा?
48 आसिल्ले खोंयोंन् बिलै सोरिबै म्हि खाब् मुँ?
खाबइ ह्रोंसए सोलाइ क्रोंउँइँले फ्रेल् खाँमुँ?
तिस्याँदे मैंन्
49 ओ प्रभु, क्हिजी लबै खोंयोंइ आनुबै ओंसोंबै म्हाँया खनिर ह्याइ?
क्हिजी दाऊदने बालु म्हाँया लब्मुँ बिसि चबै कसम खनिर ह्याइ?
50 ओ प्रभु, क्हिए के लबै म्हिलाइ म्हिमैंइ खैले प्ह्रइमुँ,
धै अरू ह्रेंमैंइ गाल् केब ङइ खैले सैदिरिइमुँ, च ताँ मैंमिंन्दि।
51 ओ याहवेह, क्हिए शत्तुरमैंइ ङलाइ हेल लइमुँ,
क्हिजी छ्युगु फोसि त्हाँबै म्हिलाइ चमैंइ प्ह्रइमुँ।
52 याहवेहए मिं खोंयोंन् बिलै थेब् तरिगे!
आमेन धै आमेन।
*^ 89:0 मस्किलए मतलब पक्का था आरे, दिलेया ज्ञान बुद्धि पिंबै क्वे मुँलै।
✡^ 89:0 १ म्रुँ ४:३१
✡89:4 89:4 २ शमू ७:१२-१६; १ इति १७:११-१४; भज १३२:११; चिब्मैं २:३०
†89:10 89:10 कबितार राहाबए अर्थ मिश्र ह्यल ग
‡89:17 89:17 ङिलाइ ट्होल् लमिंइमुँ हिब्रू क्युइर, ङिए रु कैंडो लमिंइमुँ
✡89:20 89:20 १ शमू ७:१२-१६; १६:१२; चिब्मैं १३:२२
§89:24 89:24 च भोंब हिब्रू क्युइर, चए रु नुब
✡89:27 89:27 दर्शन १:५