92
क्हिजी लबै केमैं कति थेब मुँ
प्रिबै त्हिंइर प्रिंबै क्वे घ्रि।
1 ओ ताँन् भन्दा थेबै परमेश्वर, क्हिए मिंर क्वे प्रिंब
नेरो याहवेहलाइ धन्यबाद पिंब बेल्ले छ्याँबै ताँ ग।
2 ङिए फिर क्हिजी लबै खोंयोंइ आनुबै म्हाँयाए बारेर न्हाँगर प्रिंब,
धै म्हुँइँसर क्हि भर लल् खाँबै परमेश्वर ग बिसि बयन लब,
3 झाइले तार च्यु मुँबै सारङ्गी नेरो बीणा ह्रादै
क्हिए मिं क्वेब बेल्ले छ्याँबै ताँ ग।
4 तलेबिस्याँ ओ याहवेह, क्हिजी ह्रोंसए केमैंउँइँले ङए सैं तोंल् लमिंइमुँ;
क्हिए योजी लबै केमैं म्रोंसि ङ बेल्ले सैं तोंदै क्वे प्रिंम्।
5 ओ याहवेह, क्हिजी लबै केमैं कति थेब मुँ!
क्हिए बिचारमैं कति गैरु मुँ!
6 दिलेया च्हैंब-मैंब लल् आखाँबै म्हिइ चु ताँ क्होल् आखाँ;
आमादुइ चु ताँ क्होल् आखाँ।
7 दुष्ट म्हिमैं छि धोंले मौलिदिलेया
धै आछ्याँबै के लब्मैंल बिब् धों मैंब् धों तलेया,
चमैं युगुर्ले नास तयाब्मुँ।
8 दिलेया ओ याहवेह, क्हि खोंयोंन् बिलै नुबै क्ल्ह्योर मुँ।
9 ओ याहवेह, क्हिए शत्तुरमैं क्ह्रोंसेंन्ले नास तब्मुँ;
दुष्ट म्हिमैं ताँन् सग्याँ प्हुग्याँ तयाब्मुँ।
10 ङ बिस्याँ क्ह्योंर्बै साँढे धोंले क्हिजी ङए भों थेब लमिंब्मुँ;
छ्युगु फोसि ङलाइ त्हाँइमुँ।
11 ङए शत्तुरमैं हार्दिब ङए मिइ म्रोंइमुँ;
ङए शत्तुरमैं ल्हावाबै ताँ ङए न्हइ थेइमुँ।
12 ठिक के लबै म्हिमैं बिस्याँ छोग्रए धुँ धोंले मौलदिम्;
लेबनानल कोंर्बै थेबै देवदारु सिं धुँ धोंले चमैं थेब त-तै ह्याब्मुँ।
13 याहवेहजी च म्हिमैंलाइ ह्रोंसए धिंर रुँइँइमुँ;
चमैं ङ्योए परमेश्वरए मन्दिरर मौलिदिब्मुँ।
14 खिब् तयालैया चमैंइ रो ल्हें रोब्मुँ;
चमैं ताजा नेरो पिंक्यो ब्योंब् तरिब्मुँ,
15 धै “याहवेह स्वाब मुँ;
खी ङ रक्षा लमिंबै पारा ग, धै खीजी आछ्याँबै के खोंयोंइ आल!” बिसि बयन लब्मुँ।