111
याहवेहजी लबै केमैं बेल्ले थेब मुँ
1 याहवेहए मिं थेब लद्!
ठिक के लब्मैंए म्हाँजोर नेरो म्हि ल्हें च्होंबै क्ल्ह्योर
ङए सैं न्होंउँइँले याहवेहलाइ धन्यबाद पिंब्मुँ।
2 याहवेहजी लबै केमैं बेल्ले थेब मुँ,
खीए केमैं म्रोंसि सैं तोंब्मैं ताँनइ च केमैं क्होल् म्हैम्।
3 खीजी लबै केमैंइ खीए मान नेरो इजेत थेब लमुँ,
धै खीजी लबै ठिक केमैं खोंयोंन् बिलै तरिम्।
4 खीजी ह्रोंसए औदिबै केमैं मैंरिल् पिंइमुँ;
याहवेहजी ङ्योए फिर ल्हयो खसि दयाम्हाँया लम्।
5 खीने बालु ङ्हिंब्मैंलाइ खीजी चबै सैमैं जुटेमिंब्मुँ;
धै खीजी फैबै बाछा खोंयोंइ मैंरिम्।
6 अरू ह्रेंमैंए क्ल्ह्यो-ने ह्रोंसए म्हिमैंलाइ पिंसि
खीजी ह्रोंसइ लबै औदिबै केमैं खीए म्हिमैंलाइ उँइँमिंइमुँ।
7 खीए योजी लबै केमैं भर लल् खाँब नेरो ठिक मुँ;
खीजी के ल्हैदिबै ताँमैं भर लल् खाँब तम्।
8 खीजी बिबै ताँमैं खोंयोंन् बिलै तरिम्,
चु ताँ पिंमा याहवेह भर लल् खाँब नेरो क्ह्रोंसेंन्बै मुँल।
9 खीजी ह्रोंसए म्हिमैंलाइ जोगेमिंइ;
ह्रोंसइ फैबै बाछा खोंयोंन् बिलै तरिगे बिसि खीजी बिइ।
खीए मिं पबित्र नेरो मान लल् त्हुब मुँ!
10 याहवेहलाइ मान लब बुद्धि योंबै घ्याँ ग;
खीजी बिबै ताँ ङिंब्मैंइ छेनाले च्हैंब् मैंब् लल् खाँम्।
खीए मिं खोंयोंन् बिलै थेब् तरिम्!✡ 111:10 अयू २८:२८; हितो १:७; ९:१०