102
Jeꞌej tɨ tyuꞌtyéenyuj aꞌɨ́jna ɨ tɨ quee jeꞌej jájtyoovej
Jeꞌej tɨ tyáꞌhuoo aꞌɨ́jna ɨ tɨquee cheꞌ jeꞌej jaꞌtyoovej ajta tɨꞌɨj quee cheꞌ jamuaꞌreej jeꞌej tɨ huárɨnyij jéehua puꞌij junyuusteꞌ ɨ Tavástaraꞌ jimi
1 Tavástaraꞌ, huánamuaj jeꞌej nyaj tyiꞌtyényuusij,
¡tyuꞌtáꞌ tɨꞌij muéetzij jimi jaꞌráꞌastij jeꞌej nyaj tyíꞌjijhuaj!
2 Capáj nye jimi jaꞌavaataj muaꞌ nyéerimij
nyatɨꞌɨjta quee jeꞌej jájtyooveꞌen;
¡tyámuaꞌ paj tyináanamuaj!,
¡caꞌnácan paj huatányuunyij nyatɨꞌɨjta muaatájeevej!
3 Jiꞌnye ɨ nyajúuricamej pu jaꞌhuóopuaꞌrixɨꞌɨj aꞌyájna tɨꞌɨj ɨ cɨtzíj,
ajta ɨ nyacaríj aꞌyaa pu tyaꞌtaa tɨꞌɨj ɨ tɨꞌɨxcuáa,
4 capu cheꞌ jucaꞌnyej ɨ nyaxɨéjnyuꞌcaa
aꞌyaa pu een tɨꞌɨj ɨ tuꞌpíj tɨ huatyáahuaj;
¡capu ajta cheꞌ nyacaꞌnyistiꞌ nyej nyij tyúꞌcuaꞌnyij!
5 Ɨ nyahueꞌraꞌ pu arí cáviꞌtaxɨj ɨ nyacaríj jitze
aꞌɨ́jcɨ jɨmeꞌ nyaj huápuɨꞌɨj nyeyiin.
6 Aꞌyaa nu een tɨꞌɨj ɨ síihuaꞌaj aꞌáa tɨ jáꞌsejreꞌ joꞌtɨj quee jáꞌtyiꞌtɨj,
tɨꞌɨj ɨ muacɨríj tɨ aꞌáa jáꞌsejreꞌ joꞌtɨj quee jooyiꞌrij.
7 Canu cheꞌ cutzuj.
Aꞌyaa nu een tɨꞌɨj ɨ pínaꞌaj tɨ jusɨ́ɨj huayiꞌij.
8 Majta quee aꞌnáj jaatapuáꞌcɨtacaꞌ maj jeꞌej puaꞌaj tyíꞌnyaxaj ɨ maj nyéjchaꞌɨɨreꞌ
majta jeꞌej puaꞌaj tyáꞌxaj ɨ nyaj jɨn ántyapuaj.
9 Nyajta quee cheꞌ páan cuaꞌ, sulu aꞌɨ́j nuꞌuj nyij ɨ nasíj;
ajta ɨ nyaj jaꞌantyíyeꞌej aꞌɨ́ɨ pu jáꞌnaxcaj ɨ nyaj eetajaꞌraꞌtajyiꞌij,
10 aꞌɨ́jcɨ jɨmeꞌ paj nyúꞌcamuɨꞌ ajta ɨ tɨ muajaaxɨejtyeꞌ,
jiꞌnye muáaj paj naꞌajriáj pej pij majcaꞌhuáyee naꞌantyipuáꞌrityeꞌen.
11 Ɨ nyaj jɨn júurij aꞌyaa pu mutyojoꞌyiꞌij tɨꞌɨj quéenyiꞌistarij;
aꞌyaa nu tyiꞌtyáhuasij tɨꞌɨj ɨ tuꞌpíj.
12 Pajta muáaj, Tavástaraꞌ, jusén jɨmeꞌ paj tyíꞌijta;
¡aꞌnáj tɨnaꞌaj mu jamuaꞌreeriaj muáꞌjuꞌun jeꞌej paj ántyapuaj!
13 Ájchesij, pajta jaꞌancuꞌvaxɨꞌɨn ɨ Sión,
jiꞌnye puꞌríj tyaꞌráꞌaj aꞌnáj tɨ aꞌyan tyaꞌtácatyiij;
¡puꞌríj huaꞌxaꞌpuɨꞌɨn paj tyaatúꞌuunyiꞌ!
14 Aꞌɨ́ɨmaj ɨ maj a jimi tyáꞌtzaahuatyeꞌ mu jaxɨeꞌveꞌ aꞌ tyetyéj;
ajta quee tyámuaꞌ huaꞌasej aꞌɨ́jcɨ jɨmeꞌ tɨ huatyuꞌuunyiꞌhuacaꞌ.
15 Néijmiꞌi ɨ tyeɨ́tyee majta ɨ maj tyíꞌijta ɨ cháanacaj japua
aꞌɨ́ɨ mu jaatyátzaahuatyeꞌsij ɨ tɨ jɨn ántyapuaj ɨ Tavástaraꞌ majta ɨ tɨ jɨn naa huaséꞌrin
16 tɨꞌɨj aꞌɨ́ɨn ajtáhuaꞌaj jaatyátaahuaj ɨ Sión
ajta jeꞌen huataséjreꞌen ɨ tɨ jɨn naa huaséꞌrin,
17 tɨꞌɨj jáanamuaj jeꞌej tɨ tyuꞌtyéenyuj aꞌɨ́jna ɨ tɨ quee jeꞌej jájtyoovej
ajta jeꞌen néijmiꞌi jɨn aꞌyan huárɨnyij jeꞌej tɨ jéehua tyáꞌhuaviij.
18 Cheꞌ aꞌíjna ooyúꞌsiꞌhuaj
mej mij jáamuaꞌreej ɨ maj majcaꞌhuáyee huataséjreꞌsij,
mej mij majta aꞌɨ́ɨmaj tyaatatyójtziꞌreꞌen ɨ Tavástaraꞌ
aꞌɨ́ɨmaj ɨ maj majcaꞌhuáyee nanɨeꞌhuan.
19 Tavástaraꞌ pu jaaséj ɨ cháanacaj aꞌájna ɨmuáj a jútyeꞌ,
jútyeꞌ ɨmuáj joꞌtɨj tyámuaꞌ tyejéꞌeen,
20 tɨꞌij huoꞌnamuaj ɨ maj juyiin aꞌɨ́jcɨ jɨmeꞌ maj námiꞌ
ajta huaꞌ japua huatányuunyij aꞌɨ́ɨjma ɨ maj meríj aꞌyan tyihuoꞌtaxájtacaꞌ maj huóꞌcuiꞌnyij,
21 taꞌaj ij aꞌájna a Sión, ajta a Jerusalén,
huatánamuajreꞌen maj jaataxáj majta tyaatatyójtziꞌreꞌen ɨ Tavástaraꞌ
22 matɨꞌɨj néijmiꞌi ɨ tyeɨ́tyee ɨ maj aꞌyan huacháatɨmee ɨ cháanacaj japua
tyúusɨɨreꞌen mej mij tyaatatyójtziꞌreꞌen.
23 Aꞌɨ́ɨ pu náariꞌriꞌ ɨ nyaj jɨn uhuájcaꞌnyej nyatɨꞌɨj nyooj huamaꞌcaj ɨ juyéj jitzeꞌ;
ajta jeꞌen quee cheꞌ naatáꞌ nyej nyij jéetzeꞌ áꞌtyeeviꞌin.
24 Nyáaj nu aꞌyan tyaatéꞌexaa tɨjɨn: “Nyaj Dios,
capáj náꞌviꞌtɨɨcareꞌen tɨꞌɨj ooj jéꞌtaꞌ náꞌɨtziityaꞌaj nyaj aꞌyan séjreꞌej.”
¡Capu aꞌnáj antyipuaꞌrij ɨ nyinyiꞌraꞌaj muéetzij jimi!
25 Tyámuaꞌ paj jáaruuj ɨ cháanacaj tɨꞌɨj néijmiꞌi tyoꞌhuatyóochej;
muáaj paj pajta jaatyátaahuacaꞌ ɨ tajapuá tɨ séejreꞌ.
26 Ajta néijmiꞌi pu aꞌɨ́jna tyeꞌentyipuáꞌrij,
ajta muáaj paj tyámuaꞌ éenyeꞌej jusén jɨn séejreꞌ.
Néijmiꞌi pu aꞌɨ́jna tyuꞌtyápaꞌnaj, aꞌyájna tɨꞌɨj ɨ cáanarij;
¡muáaj paj seequéj jaꞌuuren tɨꞌquij seequéj éenyeꞌej jaꞌmej!
aꞌyájna tɨꞌɨj aꞌtɨ́j tɨ seequéj eenyeꞌ tyuꞌtyóochejtyeꞌen.
27 Pajta muáaj aꞌɨ́ɨn panaꞌaj puéꞌeen;
capu aꞌnáj antyipuaꞌrij ɨ nyinyiꞌraꞌaj muéetzij jimi.
28 Tyámuaꞌ paj tyihuaꞌchaꞌɨ́ɨj puáꞌmej aꞌɨ́ɨjma ɨ maj huaꞌ jitze eerányesij ɨ maj muahuɨɨreꞌ;
tyámuaꞌ paj huáꞌuuren aꞌájna joꞌpaj muáaj jáꞌsejreꞌ.