1 O Tupàn Tuweharupi Wiko Ma'e, Urezar ne.

Teko ywy nànànar wexak nehua'u haw wà.

Nekatu haw imume'u haw uhem ywak rehe.

2 Kwarearer uzegar nehua'u haw rehe wà. Te kwarera'i uzegar hehe wà no.

Erezapo tàpuztàtà nezepyro kar pà neàmàtyry'ymar wanuwi ne,

Eremumaw nerehe ipureityk wer ma'e ne.

3 Ame'e ywak neremiapo kwer rehe. Ame'e zahy ywak rehe neremimupyta kwer rehe. Ame'e zahytata ywak rehe

Neremimupyta kwer wanehe. Wanehe heme'e mehe aze'eg nezewe hezeupe.

4 Màràzàwe tuwe nema'enukwaw teko wanehe. Na'ikàg kwaw wà.

Màràzàwe tuwe umàno ma'e ràm wanehe erezekaiw.

5 Nezewe rehe we erezapo teko ikàg ma'e romo ne wà. Xo ne zo nekàg wera'u teko wanuwi ne.

Kàgaw eremono teko wanupe. Nuzawy kwaw tuwihawete wà.

6 Teko eremuigo kar ma'e neremiapo kwer paw wazar romo ne wà.

Ma'e paw wanuwi ikàg wera'u wà.

7 Wiko àràpuhàràn wazar romo wà no. Wiko tapi'ak wazar romo wà. Wiko miar wazar romo wà no.

8 Wiko wiràmiri wazar romo wà. Wiko pira wazar romo wà no. Wiko yryhu pupe har wazar romo paw rupi wà no.

9 O Tupàn Tuweharupi Wiko Ma'e, urezar,

Teko ywy nànànar wexak nehua'u haw wà.