1 Teko Izaew izuapyapyr wà,

Pekwarer mehe arer we peàmàtyry'ymar upuraraw kar ma'erahy peme wà.

Pemume'u wanemiapo kwer nehe.

2 Nezewe i'i teko wà.

— Urekwarer mehe arer we ureàmàtyry'ymar upuraraw kar tuwe ma'erahy urewe wà.

Nezewe rehe we na'urereityk kwaw wà.

3 Ywy heruwaruwakaw uzapo perew zàwenugar ywy rehe.

Nezewegatete ureàmàtyry'ymar uzapo perew iaiw ma'e urekupe pe wà.

4 Tupàn Tuweharupi Wiko Ma'e ikatu a'e.

Zanepyro a'e, zanezar ikatu 'ym ma'e wanuwi a'e, i'i teko wà.

5 Tuwe amo weityk Zeruzarez rehe iakatuwawahy 'ymar wà nehe.

Tuwe uzàn weityk arer wanuwi wà nehe.

6 Tuwe wiko ka'akyr tàpuz 'aromo hezuz ma'e ài wà nehe.

Ka'akyr uxinig o'ok 'ym mehe we a'e.

7 Teko nomono'og kwaw a'e ka'akyr wà.

Nuzàpixipixi kwaw wà. Nueraha kwaw wàpuz me wà. Weityk wà.

8 Tuwe teko a'e teko wanuwake ukwaw ma'e nuze'eg kwaw nezewe wà nehe.

— Tuwe Tupàn umur uze'egatu penehe nehe.

Ure oromono ureze'egatu penehe Tupàn Tuweharupi Wiko Ma'e her rehe ure, tuwe ni'i kwaw wanupe wà nehe.