1 Jisasi'a anankuma atreno Judia kaziga vuno Joda ti takaheno kantu kaziga vu'ne. Nevige'za tusi'a veamo'za mago'ene Agrite emeri atru hzageno anante umani'neno, ko'ma nehiaza huno naneke mago'ene agafa huno rempi huzami'ne. 2 Farisi vahe'mo'za e'za Jisasina rehe'za anage hu'za antahige'naze, vemoma nenaro atrezamo'a kasege amage antegahifi? 3 Ana kenona'a anage huno zmasami'ne, na'a hiho huno Mosesi'a kasegea krerami'ne? 4 Zamagra anage hu'naze, Mosesi'a avompina, vemo'a nenaro atrenakura amane katroe huno eriamahu avona kre nemino, huntekeno vugahie. 5 Hianagi Jisasi'a amanage huno zamasmi'ne, na'ankure tmarimpamo'a hankavetino erigi'neazanku huno Mosesi'a ana kasegea kreno tamami'ne. 6  Hianagi Anumzamo ese agafare vene a'ene trohu znante'ne. 7  E'i ana agafare vemo'a nefane nereranena netreno, nenaro'ene hagerfino, (Diu-Kas 24:1, Jen-Agf 1:27, 5:2) 8  erimago znavufa neseke, mago'ane tare vahera omnina'anki, magoke mani'na'e. 9  E'ina hu'negu nazano Anumzamo eri hagerafi neniazana, atregeno mago vahe'mo'a eri ovasaneno. 10  Ete mago'ene nompi umareri'za amage'ma nentaza disaipol naga'mo'za aravema refutagizankura antahige'naze. 11 Jisasi'a ke'nona zamire anage huno zmasami'ne, iza'o ese a'ma netreno aru a'ma erisia ne'mo'a, ese a'mofona kumi hunteno monko avu'avaza hugahie. 12  Hagi mago a'moma neve netreno, aru ve eri snimo'a, monko avu'ava hugahie.

13 Anante vahe'zgamo'za ne'one mofavre ramina Jisasi azanteno asomu huzmantenogu zmavare'za neage'za, amage'ma nentaza disaipol nagamo'za ke zmasu'za azeri amuho osiho hu'naze. 14 Hianagi Jisasima nezmageno asi vazigeno, anage huno zmasami'ne, zamazeorita zmatrenke'za osi mofavre'mo'za Nagrite eho, na'ankure Anumzamofo kumara e'inahu vahe'mofo kuma me'ne. 15  Tamage hu'na neramasamue, iza'o Anumzamofo kumama mofavre'moma eneriaza huno e'orisimo'a, uofretfa hugahie. 16 Jisasi'a anage huteno, ana mofavre'rami zamavreno, azana zmagofetu anteno agafa huno asomu ke huzmante'ne.

17 Jisasi'a otino kantega nevigeno mago ne'mo negeno, agareno agafi rena omenereno anage huno hu'ne, knare rempi hurami ne'moka, nankna hanuna manivava asimura erigahue? 18 Higeno Jisasi'a anage huno ana nera asami'ne, na'a higenka kagra knare hu'nane hunka nehane? Mago vahe'mo'e huno knare osu'neanki, Anumzamo Agrake knarera hu'ne. 19  Hagi kasegefina ko amanage hu'negenka antahinane, vahe ahe ofrio, rumofo a'enena monko'zana osuo, kumzafa oso, vahera havige huozmanteho, vahezana eri savarira osiho, negrerane negafane kea antahi znaminka znamage antegahane hu'negenka antahinane. 20 Anante ana ne'mo Jisasina anage huno asami'ne, Hurami ne'moka, osi'ma maninoreti, nagu'areti hu'na maka ana kasegea amage ante'noe. 21 Jisasi'a ana nera negeno avesinteno anage hu'ne, mago'zanku upa hu'nane, vunka inanknazama ante'nesnana zana, maka zagore ome atrenka eritenka, ana zago erinka zamunte omane vahe nezamigeno, monafi fenonka'a meno. Ana nehunka kagra, Nagri eme namage'anto. 22 Ana naneke nentahigeno, avugosamo ruzahe higeno, rama'a afufeno ante'negu rimpagna nehuno atreno oti'no vu'ne.

23 Vigeno Jisasi'a ome zmage eme zmage nehuno, amanage huno amage'ma nentaza disaipol naga'a zmasmi'ne, Afufeno zmine vahe'mo'za Anumzamofo kumapi ufrenaku'ma hanazana, tusi'a amuho hugahaze! 24 Amagema nentaza disaipol nagamo'za antri ana kegura hu'naze. Hianagi mago'ene Jisasi'a anage huno zmasami'ne, mofavre naga'mote, Anumzamofo kumapima ufrezamo'a tusi'a amuho hu'ne! 25  Kemoli afumo'za nekazamofo kampima ufrenakuma nehazana amuhoa hunozmante, hianagi afufenone vahe'moza Anumzamofo kumapi ufre'naku hanazana, tusi amuho huzmantegahie. 26 Mago'ene antri hu'za tusi zmagogogu nehu'za, zamagra zmagra anage hu'naze, hagi iza manivava manizana erigahie? 27 Jisasi'a nezmageno ana kenona amanage huno hu'ne, Vahe tfamota amanahu'zana hugara osu'nazanki, Anumzamo'a amane maka'zana hugara hu'ne.

28 Pita'a anage huno Jisasina asmi'ne ko, tagra mafka'zana atreta kagri kamage'nentone. 29 Jisasi'a anage hu'ne, tamage hu'na neramasamue, iza'o Nagriku ene knare muse kereku'ma huno nozmifi, afuhe'impi, asarhehe'impi, nererampi, nefampi, mofavre'zga'afi hoza ramima'ama atresimo'a, 30  ana nona'a maka'zana 100ti'a agatere'za menina ama knafina rama'a e'neriza, rama'a kuma'ene, nefu'zane nesaro'zane nererane mofavre' naga'ane, hoza zmine e'nerisage'za, vahe'mo'za zmazeri haviza nehanige'za, henkama esia knarera manivava zmasimu erigahaze. 31  Hianagi rama'amo'za ugagota hu'nenamo'za, henka esnage'za, rama'a henka e'nenamo'za, ugagota hu'za vugahaze.

32 Jerusale vu kantega mareri'za nevazageno, Jisasi'a ugota huno vu'ne. Hianagi amagema nentaza naga'mo'za antri nehzageno, zmavaririza vu'naza vahe'mo'za koro hu'naze. Hianagi Jisasi'a 12fu'a amage'ma nentaza disaipol nagara zmare kanti mago'ene zmanteno, agafa huno agritema fore haniazamofo naneke zmasami'ne. 33  Keho, Jerusale kumate marerita meni nevunankino, Vahe'mofo Mofavrea azeriza ugagota mono kva vahete'ene kasegere ugota hu'naza vahe zmazampi avrentegahaze. Zamagra ahe friho nehu'za, fegi'a vahe zmazampi avrentegahaze. 34  Ana vahe'mo'za huhaviza hunente'za, zmavetu ahenente'za sefunemiza, ahe frigahaze. Hianagi tagufa kna agetere'sigeno frinefintira otigahie.

35 Anante tare Zebeti nemofoke Joni'ene Jemisike Jisasinte e'ne anage hu'na'e, Hurami ne'moka, menima tagrima tave'manesiza hurantogu kantahinego'e? 36 Jisasi'a anage hu'ne, na'a huranantesuegu neha'e? 37 Anage huke asami'na'e, monafima hihamu hanaveka'afima kinima umaninunka tatregeno, mago'mo'a kazantmaga manina, mago'mo'a kaza hoga'a maninogu nehue. 38 Hianagi Jisasi'a anage huno znasami'ne, tanagra antahitna ketna osu na'azanku nantahinega'e! Tanagra nesua kapufintira negaha'o, hifi tima fresuaza hutna, tina fregaha'o? 39 Ana netremoke anage huke Jisasina asami'na'e, tagra amane negahu'e huke hakeno, anante Jisasi'a anage huno znasami'ne, Nagrama nesua kapufintira amane neta, tima frezama nehua tina fregaha'e. 40  Hu'neanagi nazantmaga mani'zane, naza hogama manizana Nagri'zana omane'ne, Anumzamo'ma huhampri zamanteno, retroma huzmanteno erigahazema hu'nea vahe'mo'za erigahaze.

41 Anage nehige'za 10'a amage'ma nentaza disaipol naga'mo'za ana naneke nentahi'za, Jemisine Jonigizni agafa hu'za zmarimpa aheznante'naze. 42 Jisasi'a mika'amokizmi ke higeza ageno anage huno zamasmine, megi'a vahepinti kva vahere hu'za antahizamiza vahe'mo'za ra vahe'zimi nemanizageno, iza'zo ra zmagima eri'za vahe'mo'za hanave zmireti zmagatere'za kegva hunezmantaze. 43  Hu'neanagi tamagra anahukna osugahaze. Hianagi iza'o ra vahe maninaku hanimo'a, tmagri amu'nompina eriza vahe manino. 44  Iza'o amuno tamifintima ugagota hurmante'nakuma hanimo'a, mika'motma kazo kazo eriza vahe manigahie. 45  Ana hu'negu Vahe'mofo Mofavre'mo enena, eri'za erintehogura ome'ne. Hianagi tamagri tmaza nehuno, Agra'a asimura atreno rama'mokizmi miza sezmantenaku e'ne.

46 Zamagrama Jeriko kumate ehnatite'za, Jisasi'ene amage'ma nentaza disaipol naga'ene tusi'a veamo'za ana kuma atre'za nevazageno, Timeasi nemofo Batamiasi avusuhu ne'mo, kamofo ankenarega mani'neno, azama hanagu meme hu'ne. 47 Ana ne'mo antahiama Nazareti Jisasi ne-e hia ke nentahino'a, agafa huno kezatino, Jisasiga Deviti nemofoga nagrira kasunku hunantenka nazahuo! 48 Rama'a vahe'mo'za kesu'za, kagra tagano hu'naze. Hianagi mago'ene kezatino, Jisasiga Deviti nemofoga nagrira kasunku hunanteka nazahuo! 49 Higeno Jisasi'a nevifinti uotino, Ke hinkeno eno hige'za, zamagra ana avusuhu neku, kagriku ke nehianki krimpamo'a so'e nehinkenka otinka eno hu'za hu'naze. 50 Ana ne'mo zanra anakreku'a netreno ame huno otino Jisasinte e'ne. 51 Anante Jisasi'a anage hu'ne, na'a hugante'nuegu kavenesie? Hurami ne'moka, ete navu kenaku nehue. 52 Higeno, Jisasi'a anage huno asami'ne, kamentintimo kazeri so'e hianki vuo higeno, ame huno avurgamo'a ete hari higeno amage' avaririno kantega vu'ne.