16
Hahehisi ḡaudia hituosi
1 Bena ere badana ta Dubu Helaḡa lalona amo na kamonai, aneru hahituosi e hamaorodia, eto, Aola, Dirava ena badu ai e honumu kibodia auhituosi na tanobada ai ba bubu dobi.
2 Aneru gini-gunana ela, ena kibo tanobada ai e bubua. Bena daḡedaḡe ḡauna toana e abia bona laulauna e toma henia diho taudia ediai toto badadia mai hisidia eha dudu.
3 Aneru iharuana ena kibo davara ai e bubua; bena mase tauna rarana heḡereḡerena ai ela, bena davara lalonai e noho ḡaudia iboudiai vada e mase.
4 Aneru ihatoina ena kibo na sinavai ai bona ranu lohilohi gabudia ai e bubua; bena rara ai ela. 5 Bena ranu ilohiadia aneruna erena na kamonai, eto,
Helaḡa Diravamu e, o nohova, o nohomu;
Ini o hahemaoro henidia tomamu na maoromaoro,
6 Badina be helaḡa taudia bona peroveta taudia raradia e bubu.
Bena rara o henidiamu, bae inua,
Edia kara ihaheḡereḡerena.
7 Bena ere ma ta pata helaḡana amo na kamonai, eto,
Lohiabada Dirava e siahu idoinai Diravana, momokani!
Emu hahemaoro na momokani bona maoromaoro.
8 Aneru ihahanina ena kibo na dina latanai e bubua; bena e hasiahua taunimanima baine aradia, lahi na heto. 9 Bena siahu badana ese taunimanima e aradia; bena idia ese hari hahehisi e biagudia Diravana ladana e uduguiraia; asie helalo kerehai bona asie heatolaia.
10 Aneru iha-imana ena kibo na daḡedaḡe ḡauna ena terono latanai e bubua; bena ena basileia e hadiburaia, bena taunimanima maladia e kori, hisihisi dainai. 11 Bena Guba Diravana e uduguiraia, edia hisihisi bona edia toto daidiai; asie helalo kerehai, bona edia kara dika asie rakatani.
12 Aneru ihatauratoina ena kibo na sinavai badana, ladana Eufrate. lalonai e bubua, bena ranuna vada e kororo, mairiveina kahana hanuadia pavapavadia edia dala e lailaia. 13 Bena na ita, lauma dikadia tatoi, parapara na heheto, huala uduna amo bona daḡedaḡe ḡauna uduna amo bona peroveta koikoi tauna uduna amo e lasi. 14 Idia na lauma dika-hereadia, hoa karadia e karamu, bona tanobada idoinai hanua hanua pavapavadia e lao henidiamu, eha gogodiamu, siahu idoinai Diravana ena dina badana tuarina dainai. 15 (A itaia, henao tauna na heto ba vasimu. Hegima tauna, ena dahua e abi heḡaeḡaemu, asi ramina baine loa bena ena hemarai baine hedinarai na garina tauna, ia hari namo.) 16 Bena lauma dikadia ese e gogodia gabu ta ai, ladana Heberu gadodiai ai be Aramagedono.
17 Aneru ihahituna ena kibo na guba padanai e bubua; bena guba dubuna teronona amo ere badana ta e lasi, eto “Vada e ore”. 18 Bena kevaru bona ere bona guba-rahu e vara; bona tano e laḡa bada, taunimanima tanobada ai e noho matama negana ai ema bona harihari tano na unu se laḡa toma. 19 Bena hanua badana e parara, karoa toi, bona bese idau-idau edia hanua loḡora e heḡiḡi dobi; bona Dirava ese Babulono badana e laloa, ena badu ḡaraḡarana keherenae henia, ena badu vine-ranuna baine inua ore. 20 Motumotu iboudiai e heau boio; ororo nallasihidia. 21 Medu-hetari badadia, edia metau na pound sinahu ta mai dikooana, na guba amo e moru taunimanima latadiai. Bena taunimanima ese Dirava e uduguiraia, medu-hetari dainai, badina be ena hahehisi na bada herea.