19
Kwalimu Anena Guba ai
1 Bena hutuma bada guba ai eredia na kamonai, eto,
Aleluia!
Hahemauri bona hairai bona siahu na iseda Dirava enai mimia.
2 Badina be ena hahemaaoro na momomo-kakani bona mamaoro-mamaoro.
Ia ese ariara hahinena badana vada e hahemaoro henia,
Ena heuda-hanai amo tanobada e hadikaia hahinena bunai;
Dirava ena hesiai taudia raradia davana danu vada e henia.
3 Ma eto,
Aleluia! Hanua badana kwalahuna e dae hallaihanaimu.
4 Bena heitatao taudia ruahui-haniosi bona maurio ḡaudia haniosi e goru diho, terono ai e helaimu Diravana e toma henia diho, eto, “Amen! Aleluia!”
5 Bona ena hesiai taumui e,
Dirava ena hesiai taumui e,
Ia garina o garimu taumui e,
Kikina badana, eda Dirava ba hanamoa.
6 Bena ere ta na kamonai, hutuma bada eredia na heheto, sinavai momo reḡedia na heheto, guba-rahu reḡedia na heheto. Eto,
Aleluia!
Lohiabada eda Dirava, siahu idoinai Diravana, ia mo Lohia.
7 Aita moale, aita hisi dae, ia mo aita heatolaia.
Badina be Mamoe Natuna ena headava negana vada eme gini dae,
Bona adavana vada e heḡaeḡae vaitani,
8 Dabua aukadia vada e hadokilai, ḡoevaḡoevadia bona kuroka-kurokadia.
Hari dabua aukadia na helaḡa taudia edia kara maoromaoro.
9 Bena aneru ese e hamaorogu, eto, A torea: “Mamoe Natuna ena headava anibouna e vavedia taudia be nanamo”. Ma eto “Ini na Dirava ena hereva momokani”. 10 Bena aena badinai na goru diho, baina toma henia diho nato, to e gwaugu tao, eto, Ene asio kara toma; lau danu hesiai taugu, oi bamomu bona varavaramu, Iesu ena hereva e badinamu taudia, bamodia danu. Dirava ba toma henia diho; badina be Iesu ena hereva na peroveta laumana.
11 Bena guba na itaia, e parara, bona hosi kurokurona ta e hedinarai, latanai e gui tauna ladana na “Abidadama” bona “Momokani”; ia na kara maoromaoro ai e hahemaoromu bona e tuarimu. 12 Matana na e kara lahi hururu-hururuna na heto. Kwarana ai na havava ḡaudia momo, latadiai lada ta e torea; a e torea herevana ta asi dibana, ia mo sibona. 13 Rara ai e urua diho dabuana hadokilaia. Ia ladana e hatoa “Dirava ena Hereva”. 14 Guba ena tuari oreadia na ia murinai ela: hosi kurokurodia ai e gui; dabua aukadia, ḡoevaḡoevadia bona kuroka-kurokadia, e hadokilai. 15 Uduna amo amo dare mai ganona e lasi, bese idau-idau idapalaidia. Auri itotohina amo baine reḡudia; bona siahu idoinai Diravana ena badu-ḡaraḡara vinena gabuna ai baine moidia tao. 16 Ena dabua ai bona mamuna ai lada ta e torea: “Pavapava edia Pavapava; lohia edia Lohia”.
17 Bena aneru ta na itaia, dina ai e gini, e lolo badabada, guba padanai e rohomu manudia e boi henidia, eto, Aoma, Dirava ena anibou badana ai ame hegogo, 18 pavapava hidiodia, bona tuari biagudia hidiodia, bona goada taudia hidiodia, bona hosi hidiodia, bona hosi ai e guimu taudia hidiodia, bona taunimanima iboudiai, ura kwalimu taudia bona e ḡuidia taudia, kikina badana hidiodia, bavani.
19 Bena daḡedaḡe ḡauna bona hanua hanua pavapavadia mai edia tuari oreadia ida na itadia, e hegogo, hari hosi ai e gui tauna mai ena orea ida bae tuari henidia totona. 20 Bena daḡedaḡe ḡauna e abia mauri, bona peroveta koikoina, hoa karadia daḡedaḡe ḡauna vairanai e kara dainai daḡedaḡe ḡauna toana e abia bona laulauna e toma henia diho taudia e koidia tauna, danu e abia mauri. Idia raruosi na mauridia ai lahi gohuna, teio e aramu gabuna, lalonai e tahodia dobi. 21 A oredia na hosi ai e gui tauna uduna amo e lasi darena ese e aladia mase, bena manu iboudiai ese hidiodi e ani, bogadia e kunu.