9
Godigo we bidi wiegi yai homu elama, bidabo tuni bidi mani
1 Polobadu Genuai Bidigo te Naptaligo hanigo bulu pesage, me Sebulungo hanigo bulu dolai dao. Tama augwali hale dali mu bidai dao. * Te Asiria dabego boi hwįagaselama, Sebulun me Naptali hani sigo tǫ dabe sobadi, te gasa te pąde elaluali bulu dabe, me distrik dabe, te kantri Israel te not badu elaluali bulu dabe me salio. Te buku 2 King, Dąį 15:29, tede suao. Galili tǫ te gasa nogi te tǫ pedai badu kantri nogi me dao. Tiali goli, me sogo nosali da, te badu dabe te tamu węba pabo sunumide bida bida pabo bulu, me te wę Jordan ugwa bulu badu bulu dabe, me te Galili distrik bulu tigidali, me te Israel hani isąwai bidi dabe hauwa bidibo madi, te bulu dabe sese genuai nogi saibao. Tama augwaligo dwai sogo sia saibao. [Mt 4:15]
2 Te we bidi augwali moni hulia sai madi bilai goli,
megi augwali genuai ula suali.
Augwali hulia sai madi bidai goli,
megi da, augwaliba genuai ula pedalali.
[Mt 4:16; Lu 1:79]
3 Genuai Bidi, nago naga we bidi
genuai hani pedalomainu yalio.
Tama nago augwali wiegi yai homu emainu geninanio.
Augwali naga gedude wiegi yai homu yalio.
Te augwaligo augwa gi nai hasia inawai
siyu ebo homu tiwai yalio.
Tama me, te ami bidi dabego wąbi hwįnama,
gasa bidi dabe aiyaba elaluama,
te augwaligo sali nai dabe dobayu
ebo homu tiwai yalio.
4-5 Te we bidi dabe wiegi yai homu yali.
Magi baso meni.
Nago augwaligo boi bidi dabego bomo
polo toga sąyai da weyu,
te polobadu nago Midian hanigo bomo toga
Te boi bidi dabego naga we bidi tonaluama,
tama augwali genuai sęgę tolalumainu yai dao,
te bidigo sęga pai ni name kau kibu
dogoniba munama,
tama te kau kibugo sę emainu wąbi dagego elama,
tonalubo tiwai yai dao.
Tiali goli, nago te ni name dabe, me te wąbi dage dabe,
nago polo toga sąyai dao.
Te boi bidi dabego nai tama,
te boi bidi dabego nago we bidi dabe
dali dwai sę megi me egobeo.
Te boi bidi dabego gudama, hwįgi pabo
nai dabe sese isigo dela silaibao.
Te augwaligo moni su dabe, me hwįyu gudubo ugwa
te bidi kaneme dagana sali, te isigo delama, silaibao.
Te tigidali sęgę dabe sese silaibao.
Tama wiegi yai sogo ma asaibao.
6 Magi baso meni. Ogwa me ame neyu,
daba polo sabolali.
Te wai me deli Godigo dabolo mani.
Aga dago tuni bidi bidaibao.
Tama agai tama nogi dabe elaluaibao,
te Dwagi Yai Kolesaga Mu Mabo Bidi dao,
tama God Tigidali Bom o Elalubo Bidi,
tama Tigidali Sogo Bida Bida Pidu Bidibo Aya,
tama Bugagia Bidibo Page Sela Mayu,
me Tabi Nagame Ilibo Tuni Bidi.
Agai te tobage nogi dabe elaluaibao.
7 Te tuni bidi te tuni bidi Devit hasegelama, bidaibao.
Tama aga te Devitgo tuni bidi siade dualaluyu,
te we bidi dabe tonaluaibao.
Te agai gavmanigo bomo tigidali sogo
genuai holudaibao.
Tama hwįbo me menia pelama,
bugagia tigidali sogo bidaibao. Magi baso meni.
Te tuni bidi aga te tigidali sogo
dwagi yai doloba pai kolesaga naga ebo dao.
Tama agai te kolesagago aga
te bomai tuni bidi bidaibao,
te megi me, tigidali sogo nosali me.
Genuai Bidi Tigidali Bomo Elalubo Bidigo homugo
bomo mu elama,
we bidi dabe dali wiegi yai sę yabo homu ebao.
Tama tibaso, agai te sę dabe me elama, pedalaibao.
[Lu 1:32-33]
Genuai Bidigo Israel dabe dene mani
8 Genuai Bidigo polo wali, te agai
te Israel bulu dolaibao wai dao.
Te Jekopgo wąį hani dabe,
tama te dwai sogo augwaliba pedalobo sogo da.
9 Te genuai hanu Samaria we bidigo,
me gasa tigidali Efraim hani
bidi dabe, augwaligo koneaibao,
Genuai Bidigo te sę augwaliba te yali dao po waibao.
Te megi da, augwaligo homugo augwali
geninama mu dao olama,
augwa nogi ugwaba te sobao.
Augwaligo te po wali,
10 “Te boi bidi dabego dago brikigo
sęani be augwaligo hųgiyu,
me dago fik ni geliyu yali goli,
te dago tede moni homu egobeo.
Te olo nai dao.
Dago masigi togolama, wiegi yai
bomai be dabe sę yaibao.
Tama dago wiegi yai ni bǫ wai bulaibao,
te ni fikigo pesage hasegeleyu,” te po wali.
11-12 Genuai Bidigo Israel dabe dali sębę yali.
Tama tibaso, agai te boi bidi dabego homu hodolali,
te augwaliba wąbi hwįagasomainu.
Agai te Siria dabe te giliga asobo badu
bidigo homu hodolali, te tuni bidi Resingo hani,
tama me agai giliga dega
sabo badu bulu Filistia hanigo homu me
hogodolama, hwįagasomainu yali,
Israel dabe aiyaba elalumainu.
Genuai Bidigo te tama tiali goli,
tego agai sębę siligobeo.
Menio. Agai nogo me dodalubao.
13 Te Israel we bidi homu begelebeo.
Genuai Bidi Tigidali Bomo Elalubo Bidigo
augwali dene mani.
Tiali goli, augwali agaba ma asobeo.
14 Tama tibaso, Genuai Bidigo
te bulu Israel dene mawaibao.
Te deli sogo tama agai Israel dabego
tobolu dali, danu dali, si togaibao.
Me po begelama weyu, agai te wiegi yai
ni pam nologo dali, te olo sigi dali si togaibao.
15 Tobolu te polo monu dabe de genuai
nogi yai bidi sibolo wali.
Te danu te tibo po we bidibolo pusali
profet bidi dabebolo wali.
16 Te tobolu bidi dabego we bidi dabebolo
wiegi yai sunumi dali kolesaga si
ola mawai menio.
Tama tibaso, we bidi polo hagawali.
17 Tigidali we bidi God tagalama,
God dologode bidisąbo bidi polo gagawai dao.
Augwaligo tigidali po dabe,
kolesaga dabe mu dwai mu dao.
Tama tibaso, Genuai Bidigo tigidali mu dolaibao.
Agai te gesi bidi me bidimainu me sula tagalogobeo.
Tama agai te we sibi me hobede me egobeo.
Wilawe we dabe, me te tiana wai dabe,
agai hobede me egobeo.
Genuai Bidi agai te tama tiaibao.
Tiali goli, tego agai sębę siligobeo.
Menio. Agai nogo me balalubao.
18 Te we bidi augwa haniani dwai
kolesagago augwa ma dolali.
Te dwai nosaide isi dola selama,
te genuai nide dela selama,
moni busi dabo tiwai yali.
Tama genuai hano ugwaba holali.
19 Genuai Bidi Tigidali Bomo Elalubo Bidigo sębę
genuai mu elama,
tama agai tǫde we bidi tigidali dene mani.
Tama augwali silali, te isigo mone busi delama,
tigidali nai dabe dela silibo tiwai yali.
Te deli deli we bidigo homu kolesagago da,
gasa we bidi aiyaba elaluabo homu elalubo.
20 Tama augwaligo nai anoma elama, sabo sę ebo dao.
Tiali goli, tego augwaligo homu kolesaga pągąnabeo.
Augwali te bidi nai hauwa tuai goli,
augwali tabia pisąma ebo tiwai dao.
Tama augwaligo te kolesaga augwa deli
hani dali me ebo dao.
21 Te Manase hanigo Efraim hani
aiyaba elaluainu yaibao.
Tama Efraimgo Manase hani aiyaba
elaluabo homu yaibao.
Tama te hani sigo Juda dabe aiyaba
elaluabo homu yaibao.
Genuai Bidigo augwa digi augwa hasi
ma dolomainu yaibao.
Tiali goli, tego agai sębę ebo siligobeo.
Menio. Agai nogo me balalubao.
*9:1: Te Asiria dabego boi hwįagaselama, Sebulun me Naptali hani sigo tǫ dabe sobadi, te gasa te pąde elaluali bulu dabe, me distrik dabe, te kantri Israel te not badu elaluali bulu dabe me salio. Te buku 2 King, Dąį 15:29, tede suao. Galili tǫ te gasa nogi te tǫ pedai badu kantri nogi me dao.
†9:4-5: Polobadu te Midian dabego te Israel dabeba dwai sę ebaso, tama te bidi Gideongo nogode Genuai Bidigo augwaligo bomo togwaluai dao. Te buku nogi Tobolu Bidi, Dąį 6:16, me 7:9-25, tede te po dabe elalubo suao.