30
Genuai Bidigo te po wali, te Isip dabego te Juda dabe tau sabo me usugobeo
1 Genuai Bidigo te po wali, “Te Juda hani, te
da augwali
eno wai bǫų hani dabe, augwali dolaibao.
Magi baso meni.
Augwali bidi po odisiąwai hani mu dao.
Augwaligo eno homu kolesaga wali me pabeo. Menio.
Augwaligo augwa homu kolesaga wali naga peyu,
augwaligo gasa bulu bidi dabe dali abagi
me olama, bidibao.
Tama tiyu, augwaligo dwai sęgę hauwa
augwa hasi tigide pesage holalio.
2 Augwaligo eno homu kolesaga hanalusiąma,
tama augwaligo Isip tuni bidi dali po wali pali dao.
Te Isip dabe dolaluama, augwali tau selama,
tama augwali me dolidali weyu.
3 Tiali goli, augwaligo homu kolesaga
geda munama, tama augwali geda
mubode augwali hale mu yaibao.
Te Isip tuni bidigo augwali te dolainu
ebo me togologobeo.
4 Te mu tama. Te Isip tuni bidigo aga
po sabilibo bidi dabe,
me aga ofisa bidi dabe aselama,
tama Juda hani deliba sisinagasali.
Te hanu Soanba, me hanu Hanesba sisinagaselama,
tama te teba asali Juda dabe dali po wagasalio.
5 Tiali goli, Juda dabego augwa hobede mu yaibao.
Magi baso meni. Te Isip dabego
magi sę me elama, augwali tau me sogobeo.
Mu menio. Augwaligo moni hale mu
te Juda dabeba sesaibao,”
Genuai Bidigo te po wali.
6 Genuai Bidigo te po te bulu hasa dabe te nai meni yai kemi sane bulu, te saut badu bulu nogi Negeb, tebolo te po wali. Genuai Bidigo te tama po wali,
“Te Juda dabego genuai bidi dabe
te olo kemi sane yai saut badu bulu badu bilali.
Te da te dwai pesage badu mu,
te bidi dabe te genuai sęgę sabo pesage mu.
Te pesagede te laion dabe, me bidi
gąǫ kelebo dwai gula mane,
me bola bilibo gula mane,
me gasa bulu hasa dabe me, te bulu badu bidibo.
Tiali goli, te genuai bidi dabego
te wiegi yai homua pai nai dabe
te augwa kibu kamel daide munama,
me donki kibu daide munama,
tama bomai sę mu elama,
te wiegi yai nai te gasa bulu
te augwali tau sabo usu isąyabo
buluba sela pali dao.
7 Te Isip dabego te gasa bulu bidi dabe
ili ili po olama, tau saibao po wabo dao.
Tiali goli, agai te sę ebo menio.
Tama tibaso, te Isip te gesi nogi te nogi ebao,
‘Te Olo Dulalubo Gula Mane dao,’ wabo,” te po wai.
Te we bidigo Godigo po odobo hagela yali
8 Genuai Bidigo enabolo te we bidigo
ebo kolesaga po te bukude asęao wali, me te po me
te masigi togalama, asęao wali.
Te da te po te tigidali sogo mu elaluama,
tama te we bidigo sulama,
tama augwali te po sela sąbo we bidi yabo omainu.
9 Magi baso meni. Augwali te bidi po
mu sela sąbo we bidi mu dao.
Tigidali sogo augwaligo Genuai Bidigo
po sela sąbo dao, te augwa Aya.
Te tigidali sogo augwaligo ili po olama,
tama augwaligo agai po oda mabo
po odobo hagela ebo dao.
10 Tama augwaligo Genuai Bidigo po
ola mabo profet bidi dabe dali e tama po wabo dao,
“Dage pedauwali pania siąo.
Dagego dabolo wiegi yai
doloba pai kolesaga wali pomainu da ola magimio.
Te dago odainu ebo po naga pusa mao.
Teda te dwai nai dabe munu me pedalogobeo.
11 Dage digibulu mu bidiyu,
tama dago sunumi paligimio.
Dago te Israel dabego Godigo po odobo da hagela ebao.
Aga te Wiegi Yai Doloba Pai Kolesaga
Naga Ebo God dao,” wali.
12 Tama tibaso, Israel dabego God
te Wiegi Yai Doloba Pai Kolesaga Naga Ebo God,
agai e tama po wali,
“Dagego eno dua dao wali po
sela sąnama, tudi ola manio.
Tama dagego te ili po olama,
te dolobo kolesaga dage tau saiba homu ebo
te mu dagego dąų walio.
13 Tama tibaso, dagego dwai kolesaga polo yalio.
Tama te dwai kolesagago dage mu tama dolaibao.
Te da te dwasianu dedage te obo ugwadu
tobolude elaluamo,
te genuai elasa pabo tiwai dao.
Tama deli sogo tama,
te obo togwa pelama, degasa pali.
14 Mu tama, dage te tǫ sene te alua pelama,
tama olo genuai me elalusiąma ebo tiwai yaibao.
Te isi dage tomode muabo, o te wę
te tuabo tiwai genuai olo me elalugobeo,” wali.
15 God, Israel dabego Genuai Bidi, aga
te Wiegi Yai Boma Pai Kolesaga Naga Ebo God dao.
Agai e tama po wali,
“Dage bugagia bidabo sunumi da, e tama dao.
Dage enaba ma aselama,
tama dage bugagia homu nagame elama, bidiąo.
Tama dagego ena deli naga wali asiąo.
Tama eno deli naga dage tau saibao.
Tama eno dage ma aselama,
tama dage bugagia tigidali sogo
bomo elama, bidaibao.”
Godigo te tama po wali.
Tiali goli, dagego agai te po wali pabo hagela mu yali.
16 Tama dagego te po wali, “Tagalama,
dago bomonama udabo kibu hos bidibao.
Tama da te kibu hosde dualama,
tama da wi paibao,” wali.
Te dagego te boi bidi dabede wi paibao
wabo po da, teda mu tama dao.
Tiali goli, tagala, dagego kibu hos
bomonama udabo da, tagalao.
Te boi bidi dabego hos kibu bomonama
mu dagego kibu hos nosali wali pobeasa asaibao.
17 Te dagego 1,000 ami bidi dabe
augwali boi bidi me deli aselama,
hwįaibao po wagasobo si da,
teda augwali wi mu elama, augwali wi paibao.
Tama ma, te boi bidi dabego ami bidi
a naga aselama, hwįaibao hae
wagasobo si da, teda dage hani tigidali wi ogodama,
wi peyu, te hanu taga paibao.
Tama te bidi me deli me bidigobeo.
Tama te hanu te bidi dabego bulu dude
plak ugwa walobo ni te bulu dude
tula ma elalubo tiwai yali gilama
tama agaduba elaluaibao.
18 Tiali goli, Genuai Bidi da,
tigidali sogo doloba pai kolesaga naga ebo God dao.
Tama tibaso, agai dage homu dene elama,
agai hobede ebo dage ola mawainu te tonalubao.
Te we bidi dabego Genuai Bidiba
homu kolesaga dąų olama,
tama agai augwali tau somainao olama,
tonaluali we bidi dabe da,
augwali wiegi yai homu pemene mu yaibao.
God aga we bidi dali wiegi yai sę mu yaibao
19 Te Jerusalemde megi bidalubo we bidi, tega, dage hobede elama, gela me wagobeo. Megi te Genuai Bidigo dage hobede elama, dage tau sabo deli naga no munalubao. Te dagego aga i olama, gedu haluasa po wabo si da, polo tama agai dagego i wabo odama, dage olo mu tau saibao. 20 Te mu tama, Genuai Bidigo dage moni sęgę somainogo yaibao. Tama dage te bidi nai me wę meniama, habuge yai bidi tiwai bidaibao. Tiali goli, aga digi dage dali bidama, tama dage bugagia elama waibao. Tama dagego aga munu me gegegobeo. Menio. Dagego aga duga gedugo ma sueibao. 21 Tama dage peyu, te mena sunumide geda muainu ebaso da, te dolo nogo badu sunumi badu, o pobase nogo badu sunumi badu me, teda agai dage tudi badu bidama, tama mena sunumidu painu yali, agai dage ola mawaibao. 22 Tama da, dagego duga tibo godigo piksa dabe saibao. Te da te bidi dabego nigilama, silva dali, gol dali sigo haluai piksa. Tama dagego te piksa dabe te dwai damua pai nai tonobo tiwai tonama, e tama po waibao, “Gedao. Dago nage subo hagela ebo.”
23 Tama Godigo tulubage te dagego bulali nai wai dabeba mawaibao. Tama te węgo dagego nai wai dabe bugagia mu holaibao. Tama dagego nai dabe hauwa mu elaluaibao. Tama te sogo dagego kau kibu dabego tuabo nosai dabe hauwa me elaluaibao. 24 Tama me, dage duga gide nai selama, tama duga gi tǫ elebo kau kibu dabe, me donki kibu dabe bugagia mawaibao. 25 Te Genuai Bidigo te dwai sogo te dagego boi bidi dabeba pedalomainu ebode, teda augwali subigila isila paibao. Tama augwaligo bomai obo dabe sese dola silaibao. Tama te sogo te wę dabe bulu dudu dabe asiyu, tama dage wę me habuge me egobeo. 26 Te sogo te polua te giliga tiwai bomo elama, mu nanaibao. Tama te sogo te giligago ula te bomo yai mu nanama, tama megi tama ula ebo edelama, mu nanaibao, te tigidali sogo ula ebo edelaibao. Te a naga olama, me badu nogo si sogo nanebo giliga deliba sisinama, deli bubugade nanebo tiwai yaibao. Te sę dabe te Genuai Bidigo aga we bidibolo mani sęgę dabe, me dene dabe mani sela sąbo sogo, te sę dabe yaibao. Tama agai augwali usu ma ilaibao.
Godigo te Asiria dabebolo dene mawaibao
27 Suama. Genuai Bidi digibulu
hogodoma, aga bomo dali, ula dali te asobao.
Agai wado elama, tama moni isi dali,
hano si, te pedalobao, te agai sębę ebo ola mayu,
te agai po wabo si da.
Te tigidali nai dabe ulubo isi agai keledu pedalobo.
28 Agai mobogo tigidali nai dolobo dao,
te wę asiyu, tigidali nai dabe
mesegelama, bidigo dogoniba usu ni pabo tiwai dao.
Genuai Bidigo te tigidali bulu tǫ
kantri dabe agai nogogo toulama,
pępębo dao, te augwali dolomainu.
Tama agai augwaligo homu kolesaga
dolama, tama augwaligo pabo
hagela ebo buluba odasa pabo dao,
te bidigo hosgo kelede ain dage
mubo tiwai dao, te hos kibu bugagia
dolasa pomai ebo gilama.
29 Tiali goli, Genuai Bidigo we bidi dagego da,
te sę dabe ebo subo sogo da,
teda dagego homu gana pabo balia te genuai lotu
wabo sogo wabo tiwai waibao.
Dagego te bidi dabe te Genuai Bidigo bulu duba holama,
tama wiegi yai homu eyu,
te genagego ona dabe elebo tiwai yaibao.
Genuai Bidi da, te genuai bomai masigi tiwai dao.
Tama aga te Israel dabego duala sabo pesage tiwai dao.
30 Genuai Bidigo bomonama mu hae olama,
tama agai bomonama i hae wabo
aga we bidi tigidaligo odama,
augwaligo agai sębę ebo mobo
augwaligo tigide dolomainu yaibao.
Aga te moni bomai isi te tigidali nai dabe
dabo isi, me moni genuai tulubage,
me wali, me talua ge tulubage dali,
tama aga asaibao.
Tama te be kulu obaso, te tigidali
we bidigo agai sębę ebo sueibao.
31 Genuai Bidigo dagą wabogo
te Asiria dabe wi mu ilaibao.
Tama agai aga keloa toulama,
te Asiria dabe genina mu elaibao.
32 Tama te Genuai Bidigo
te Asiria dabe elebo sogo da,
te Genuai Bidigo we bidigo wiegi yai
homu gana pelama,
tama augwaligo haniani hąbidi me
gita dabe te Genuai Bidigo nogo toulama,
te Asiria dabe eliyu, poge wabo te wali pelama,
augwaligo te nai elaibao.
33 Augwaligo te Asiria tuni bidi
ulabo isi tǫ dedage polo dodolama, elalubo.
Augwaligo te tǫ dedage genuai mu elama,
tama aiyanu mu dulai mu nigali,
tama augwaligo isi dabe hauwa mu polo sela muani.
Tama Genuai Bidi agai mobogo pona palebo si da,
te polo tama isi bogoli dala saibao.
Magi baso meni. Genuai Bidigo mobo
te posolai isi tiwai dao.