Kuyie mborɛ̀ n dɛ nsɔri,

di bo yĩ́mɛ kɛ dɔ̀ nní ncokù yɛtɑ̃rɛ̀ miɛkɛ tɛnɔ̀tɛ̀ kɔ̃mɛ?

2 Bɛyɛibɛ fĩ mbɛ tɑ̃nnɛ̀ ndɛ,

bɛ̀ sɛ̀unko bɛ pie nyi,

kɛ sɔri dibiìnnì miɛkɛ kɛ bo tɑ̃ wèè yɛ̀mmɛ̀ wenni.

3 Kɛ̀ dihɛì cɑ̀ɑ̀rɛ̀,

onitisɑ̀ù bo dɔɔ̀ bɑ?

4 Kuyie mbo ku cɛ̃sɑ̀ɑ̀tɛ̀ miɛkɛ nkɛ,

ku kpɑ̀ɑ̀tìkɑ̀rì bo kɛĩ́nkɛ̀ nkɛ,

kù wùómmu bɛnìtìbɛ̀ bɛmɔu,

kɛ yɛ̃́ bɛ yɛ̀mmɛ̀ miɛkɛ dòmmɛ̀.

5 Kuyie nyɛ̃́mu osɑ̀ɑ̀wè nɛ̀ oyɛiwe bɛ yɛ̀mmɛ̀,

kù í dɔ́ oyonkuwe.

6 Kuyie nyóó cṹũnní yɛhɑ̃ɑ̃kũɔ̃ nyɛ nɛ̀ mɛhɑ̃ɑ̃kpɛ̀rìmɛ̀ bɛnitiyɛibɛ ĩ́nkɛ̀,

bɛ kó tiyeti dɛ ntú.

7 Ti Yiɛ̀ nKuyie ntu timɔ́mmɔnti yiɛ̀ nwe,

kɛ dɔ́ wèè dɔ̀ɔ̀ri timɔ́mmɔnti,

bɛ̀ɛ̀ pĩ ntimɔ́mmɔnti bɛɛ̀ yóó kù yɑ̀.