31
Bezaleel, degi, Aholiab, arbaega sulesmalad
(Éxodo 35:30–36:1)
1 Bab-Jehová Moisésʼga sunmakded, ega sogded: 2 “Nue be an-itogo. Hur-e-wagwa-Judá-yargined Uri-machi-Bezaleelʼye-nugad an susad. 3 We-Bezaleelʼga An-Burba an ega nue-uksad.
Nue-binsaed-nikagued an ega uksad,
nue-ibmar-magar-itogued an ega uksad,
nue-ibmar-wisigued an ega uksad,
degine, nabir-ibmar-obinyemaigued an ega uksad.
4 Adi, nabir ibmar yeerdakle-sobegar,
nabir orgi-arbaegar,
nabir manigi-arbaegar,
nabir esgoro-gordikidgi-arbaegar.
5 Degine, nabir akwa-nuegangi-arbaegar,
nabir akwa-nuegan ibmar-birgi siegar,
nabir urgomargi-arbaegar,
degine, nabir-galagwensuli ibmar-yeerdakle-imakegar.
6 ”Deginbali, Bezaleel-bendakega, Dad-dummad-Dan-wagwa Ahisamac-machi-Aholiab an susbalid. Dule-nue-ibmar-wisimalad, gatik-ibmar-wisguega an imaksad, adi, bela an-ibmar-sogsadba bega imakmalagar, we-ibmargi arbamalagar:
7 Dulemar-anbo-ambikued-neggi,
Dulemar-Anbo-Igar-Mesisad-Ulugi,
Dulemar-Anbo-Igar-Mesisad-Ulu-edugedgi,
degi, anse-goled-neg-sunna-selegedgi bela-ibmar-ebuleged sobegar.
8 Degine, mese, geb bela-eba-ibmarmar-ebulemalad.
Gwallu-sied-bela olobiid, geb bela eba-ibmarmar-ebulemalad.
Anga-ina-wawadikid-inciensoʼye-nugad-ogumakleged-aila.
9 Anga-ibmar-ogumakar-ukleged-aila,
geb bela-eba-ibmarmar-ebulemalad.
Dii-sied-esgoro-gordikidgi-sobaled,
geb bela e-malise-bakar, sobegarbar.
10 Degine, we-mormar makmarbaloed:
Aarón-mor-islidikmalad,
degi, e-masmala-mor-anse-dulemar-irwa-gorsokalir-yodamalad.
11 Olivo-gwallu-magega-ebuleged,
degi, ina-wawadikid Neg-Islidikidgi-ebuleged sobegarbar.
Wemala, Bezaleel, degi, Aholiab-ebogwa bela sobmaloed.
”Ar igi bela an bega sogsa, deyob sogedba imakmaloed.”
Obunnoged-iba-igar
(Éxodo 35:1-3)
12 Bab-Jehová Moisésʼga sogdebalid: 13 “Israel-dulemarga be sunmakoed, ega be weyob sogo: ‘Napira an bemarga soged, an-obunnoged-ibagi be obunnomalo, ar ade, wede bemar-ebo an-Igar-Mesnaid e-wilubga gued. Be-waganga we-Igar degisadegu mai guoed, adi, be wisgumalagar, ani an Bab-Jehová gued. Ani an be-sunonimalad, anga arbadii gumalagar.
14 Degisoggu, obunnoged-ibagi mer arbamalo, ar ade, a-iba bemargala iba-islidikidid.
A-ibagi, dule obunnogergebed.
A-ibagi, dule wis arbasale, we-dule e-dulemar-abargi Israel-dulemar-abargi-onolegoed.
15 Ibanergwa (6) arbalegoed,
ibagugledgindina (7), obunnoged-ibad.
We-iba Bab-Jehováʼgadid.
Ar doa-dule we-ibagi arbaye-sogele,
napira an bega soged, we-dule oburgwilegedsegad.’
16 ”Degisoggu, Israel-dulemala obunnoged-ibagi arbaosurmalad. E-waganmargala we-Igar degisadegu-mai guoed. 17 Israel-dulemar-anbo-we-Igar-Mesnaid e-wilubga guoed, degisadegu-maigu guoed. Ar Bab-Jehová, nibneg-nasikegala, napneg-nasikegala, ibanergwa (6) arbasad. Ibagugledgindi (7), bar arbassulid. Bab-Dummad a-ibagi obunnosad.”
5. BAB-DUMMAD ISRAEL-DULEMARBO GANNAR IGAR-MESISAD
(31:18–34:35)
18 Bab-Jehová, Sinaí-yargi Moisésʼbo-sunmaknaid-bergusgua, Israel-Dulemarbo-Igar-Mesnaid-e-wilubga-guega, Moisésʼga akwa-matargwagwad-matabo uksad. We-akwagi-Igarmar-narmaklesadi, Bab-Dummad na e-sunnad e-googi narmaksad.