9
Mimmi-gwensak anmarga gwalules
1 We-ibmarmar-guoed-sorbali, dule-suli-suli-itodigusadga bar negsichid naguosulid. Epennegwa, Bab-Dummad, Zabulón-dulemar-yala sabsur-odurdaksa gusad, Neftalí-dulemar-yala sabsur-odurdaksa gusbalid. We-yarmar Galilea-yargi bukwamalad. Yoedsega, Galilea-yargi nued binsanonikoed, e-nug-dummarbaa imakoed. Galilea-yala, Jordán-diwarsik, degi, demarse-nalemaidsik naid. A-yalagi, dule-Bab-wissurmalad bukwad.
2 Dulemar-negsichidgi-gudigusmaladi, neg-meegwad daksamalad.
Negsichidgi-bukwagusmaladga, neg mee gunonikid.
3 Bab-Jehová, bee be, dulemar-omelosad,
bee be, bela-bela-weligwar-itogega imaksad.
Igi dule ibmar-gwag-weenaile, weligwar itodae,
deyobi, be-asabinni weligwale na itomaloed.
Igi dule ibmar-nuegan-miminaile, weligwar itodae,
deyobi, be-asabinni weligwale na itomaloed.
4 Bee be, dulemar-wilebukwagusad ollor-imaksad,
sabsur-imaklebukwadgi be bendaksad,
mesagwar-imaklebukwadgi be ollor-imaksad.
Ar igi be, Madián-dulemar-obelosgusa,
deyobi, be e-isdarmalad imaksad.
5 Bila-onolegedgi-sapat-yolesmaladi, degi, bela mor-ablisbi-gusmaladi, soo-yagi ogumaklegoed,
sooga bela binyoed.
6 Ar susugwa-gwensak anmarga gwalulesad,
mimmi-gwensak anmarga uklesad.
A-machi gandikidba negseoed,
weyob nugguoed:
Binsaed-Daked-Wilub-Obichadye,
Bab-Dummad-Bela-Gangued-Nikadye,
Bab-Degisadeguadye,
Neg-Bogidikid-E-Dummadye, nugguoed.
7 E-gangued bela nasguoed,
e-neg-bogidik-seoed bela nasguoed, gwen berguosulid.
David-ologangi dummadga sigoed.
E-yalagi dummadga negseoed.
E-negseoedi, igar-napiragwadba yar-seoed,
innikigwadba negseoed,
emi-ibase, degisadegu negseoed.
Bab-Jehová-Bela-Gangued-Nikad we-ibmar-imakoedi, e-sabgued-oyomaidba, deyob imakoed.
Bab-Jehová Israel-dulemarse urwemaid
8 Isaías, Israel-dulemarga sogdebalid:
“Bab-Jehová Jacob-waganse e-gayaburba barmialid,
Israel-dulemarse e-gayaburba nonikid.
9 We-ibmar bela dulemar wisgumaloed,
Efraín-dulemar bela wisgumaloed,
Samaria-dulemar bela wisgumaloed.
Ar we-dulemar-san-dummarba-imakdimalad,
yeer-sogdimalad,
weyob sogdimalad:
10 ‘Ar negmar ayarele, akarsulid.
Ar anmar gannar akwagi-nuesaar sobmaloed.
Ar higuera-sapiwar-nagubirga-mamaid babatidele, baisulid.
Ar anmar a-muchub urwar mesoed.’
11 ”Degi-inigwele, Bab-Jehová, Rezín-sordamargi e-isdarmalad barmidagoed
Bab-Dummad e-sunnad Rezín-sordamargi e-isdarmalad-gwisguega imakoed.
12 Siria-dulemar dad-nakwedsik-bukwadi, degi, Filistea-dulemar dad-argwanedsik-bukwadi,
ilagwen-obeloga Israel-dulemar-imaksamalad.
”Weyob-gus-inigwele, Bab-Dummad-urwedi amba bogigumaisulid.
Amba Israel-dulemargi urwemaid.
13 ”Degi-inigwele, dulemar Bab-Dummad-sabsur-e-odurdaksad amba aku daksamalad.
Bab-Jehová-Bela-Gangued-Nikad e-bendakega gwen amissurmalad.
14 A-ulale, Bab-Jehová, ibagwen-nuedi Israel-dulemar-obelogoed.
Ibmar-dula-e-nono-egwanneyobi imakoed,
ibmar-dula-e-bunnu-immieyobi imakoed.
Sapi-ana-sikeyobi imakoed,
sapi-e-war-immieyobi imakoed.
15 Ar ibmar-dula-e-nono, girmar-dummagan-e-wilubganad, dule-nuga-nikamalad-e-wilubganad.
Ibmar-dula-e-bunnu, Bab-Dummad-gayaburba-barsogmalad-gakansaar-odurdakmaladid.
16 We-neggwebur-idumaladi, igar-noaledba dulemar-sesmalad.
Dule-eba-selesmaladi, aku neg-itodmalad, yoggudmalad.
17 A-ulale, Bab-Jehová, sapingan-gwen-yeer dakosulid,
dule-sergan-satemalad-gwen-yeer dakosulid.
Siamar-ei-sui-burgwismalad-gwen-yeer dakosulid.
Ar bela wemala, isgumaladbiid,
ibmar-isgana-imakmaladbiid,
galagwensuli sunmakmaladbiid.
”Weyob dulemar imakles-inigwele, Bab-Dummad-urwedi amba bogigumaisulid.
Amba anmargi urwemaid.
18 ”Ibmar-isgana sooyobi gued.
Igi-soo-gadele, gagan-ikobiid bela biin-imake,
ikomar bela biin-imake,
deyobi, ibmar-isgana-imaklegedi gued.
Igi soo-gaedi sapurgi sapi-bukwadi bela obeloge,
degi, geb burwa-bipirmakaledyob, waa ainakwiddae,
deyobi, ibmar-isgana-imakedi gued.
19 Ar Bab-Jehová-Bela-Gangued-Nikad-urwedbali yala duu gadoed.
Dulemar e-sapanga guoed.
Dulemar na e-gwenadgan wiledakosulid.
20 Gwen-gwen, mas-satedba e-argan-nuedsik ibmar-bukwad gutemaloed.
Degi-inigwele, amba ukudmaada itomaloed.
Baigana, e-argan-sapiledsik ibmar-bukwad gutemarbaloed.
Degi-inigwele, amba immelegosurmarbalid.
Dulemar e-mimmigangi aibitemaloed,
e-mimmigan-gutemaloed.
21 Manasés, sabsur-Efraín-imakoed,
Efraín, sabsur-Manasés-imakmogoed.
Geb ebobela Judá-yalagi sabsur-gwichigudmaloed.
”Weyob dulemar imakles-inigwele, Bab-Dummad-urwedi amba bogigumaisulid.
Amba anmargi urwemaid.”