46
Babilonia-dulemar-e-bab-dummagan
1 Babilonia-dulemar e-bab-dummad-Belʼye-nugad dugdir naded,
bab-dummad-Neboʼye-nugad balimelleded.
Wemar-e-wilubgan-sobarmalad, ibmar-durgan-nabir-ibmar-semaladgi sesmalad.
Ar ade, wemar-e-wilubgan yeer-aidikued,
bela ibmar-durgan-nabir-ibmar-semalad-ebilis nasikdamalad,
ibmar-durgan nue-yegus itodamalad.
2 Bab-dummadyob-imaklemalad dugdir nadmalad,
napagi babatided,
gwen dukin na bendaksasurmalad,
degidba gales selesmalad.
3 Bab-Dummad weyob soged:
“Jacob-wagan, be an-itomar,
bela Israel-dulemar be an-itomar.
Sapibeneggi be maigu, an nue-be-akwisad,
an nue-be-nidii gusad.
4 Amba bemar seredgusale,
bato bemar nono-dagudikgusale,
amba an nue-be-nidii guoed.
Amba an-sunnagwad an be-sedioed.
Ani an bemar-obinnisad,
ani an bemar-bendakdii guoed.
Ani an be-sedioed.
Ani an igar-bulegangi be-ollorsaoed.
5 ”¿Doa-ebo be an-wilubdakoe?
¿Doa-ebo emar-daklege be an-imakoe?
¿Doa-yopira an-daklege be an-imakoe?
Suli. Gege be emaryob be an-imaked.
6 Ar dulemar gwenna-gwenna, binsa e-or sagumargi-bukwadi, obelodamalad,
e-manidi, nibirgi wilubsadamalad.
Geb dule-ibmar-sobed amidamalad,
adi, bab-dummadyob-imakleged sobegar.
A-bab-dummadyob-imakleged-nug-odummogega, e-asabinni yokorgi-sindigar sigdamalad.
7 Geb a-sorbali, a-bab-dummadyob-imakleged, gukingi-mai seddamalad.
Geb e-gwisguedgi ogwisgudapdamalad, bar onirdasurmalad.
Ar dule amba we-ibmar-sobaledse binnasuli-gornaile, amba e-abinsaosulid.
Degine, amba dule-bukib-binsadiid egi gwen bendaklegosulid.
8 ”Bemar, uyasulidamalad. We-ibmar be ebinsamalo.
¡Nue na be binsamalo, nue be itomalo!
9 Epenne ibmar-dikasurgus-gusmalad be ebinsamalo.
Ani an Bab-Dummadid, dule-baid sated,
Ani an Bab-Dummadid, dule-anyobid sulid.
10 Ani an sailanagi yoedse-ibmar-guoed owisoged.
Ibmar yoedse-guoedi amba dikasuli-gued-idu an soged.
An soged: An-ibmar-abegedi sogedba guoed,
an-ibmar-abegedba an imakoed.
11 Dule-gwensakse dikasuli dad-nakwedsik an gochad,
sulubagiyob dikasuli danikoed,
a-dule, anga an-ibmar-abeged-imakoed.
An-ibmar-sogsadi, sogedba-guega an imakoed.
An-igar-amisadi, an imakoed.
12 Gwage-dutusurmalad, be an-itomar.
Igar-napiragwadgi-dikasurgudimalad, be an-itomar.
13 An-igar-napiragwadi dikasur maisulid,
an-abonogedi bato warmaksad.
Sión-yala-abonoleged an imakoed,
Israel-dulemarga an-gandikid an ukoed.”