12
Jeremías-gandikidba-ibmar-sogsad
1 Ani Jeremías Bab-Jehováʼga sogded:
“Bab-Jehová, an bebo abin-abin-imakdele, be gusgu nabir-ibmar-sogdaed,
ar bedi dule-innikigwadid.
Degi-inigwele, an bese igar-soggwen wis egisgwersunno.
¿Ar ibiga dule-isganamarga ibmar-nueganbi naddae?
¿Ar ibiga dule-emar-yardakmalad gwen-bai itodasurmala?
2 Bee be we-dulemar urbedaed,
sapimaryobi bonisuli ganguddamalad,
deyob dunguddamalad,
sapi-sunmakedyobi nasguddamalad.
Unnila asginbi be-nug-ogannodimalad,
e-gwage-ulubgindi begi binsadisurmalad.
3 Bab-Jehová, bedi be an-wisid.
Be an-dakdiid, be an-wisid igi an begi binsae.
Igi sibad-wawaad e-oburgwileged-negse-selemaidae, deyob be we-dulemar sede.
Oburgwileged-ibaga be we-dulemar saboge.
4 ¿Sanagwadse we-napade gannar sanmakdoe?
¿Sanagwadse wede gaganmar gannar ainidagoe?
Emide, bela we-dulemar-isgued-ulale, ibmar-durgan girgumamaid,
degi, bela nuumar burgwemamaid.
Ar we-dulemarde sogmalad:
‘Bab-Dummad anmar-ibmar-imaked dakmaisurye.’ ”
Bab-Dummad-sogsad
5 Bab-Dummad, Jeremíasʼga sogded:
“Dule-abarmakmaladbo be abarmaknaile, be yegusdaedde,
degite, ¿igi-be dule-moligi-abarmakmaladbo be benguosunna?
Yar-bogidikidginbela be dobe-itodaedde,
degite, ¿igi be Jordán-bula-naidgi be dobe itogosuli?
6 Ar be-gwenadganbela, be-galagwenmalad-inigwele, begi dododimalad, begi yoledimalad.
Ar we-dulemar ibmar-nuegangi amba bega sunmakmalale, melle be we-dulemar itogo.
7 ”An-dulamargi an bangusad, an-dulamar an na obachad.
An-dulamar-na-sabesailadi e-isdarmaladga an urmaksad.
8 Ar an-dulamar, achumigur-nono-wawaad sapurba-gudiiyob angi gudmalad.
Binnasuli angi uurmakdemalad, a-ulale, an isdar-daked.
9 An-dulamar, igi nuu-e-absar-akar-akar-daklemalad sulubagise-balegilledidaeyobi gued.
¡Bela be dagmar!
Bela ibmar-durgan-ursirmalad, dulemargi-aibinega egi be dagmarsun.
10 Bukidar dule-isdarmalad-e-dummagan, an-uvaʼmar-digaled obelosad,
an-nainu bela oichosmalad.
An-nainu-yeerdaklegedi, nega-dulesulid-ollonaidga imaksamalad.
11 Bela an-nainu wiosmalad.
An-sunnagwad an daksad,
bela nainu-olloo imaksamalad,
bela swanga imaksamalad.
Ar dulemar yala gwen bai-daksurmarsoggu, bela yala swanga nagusad.
12 Bela yala-mullugan-negasulidganba, dule-isganamar nonimalad.
Bab-Jehová-e-es-suid bela we-yala obelogoed,
bela naga-nagase obelogoed,
gwen dule-wargwenga neg-bogidikid naguosulid.
13 Bemar orosgi-dakleged-digsamalan-inigwele, ikomarbi bega ainisad.
Be arbasmaladi, binsa be arbasmalad.
Bab-Jehová-e-urwed-ulale, bemar-ibmar-wessulidbali be bingegumaloed.”
14 Bab-Jehová weyob soged: “Dule-isganamar yar-baigan-dikarba-bukmaladi, an-dulamar-ibe an-yar-uksad-obelosmaladi, an bela e-yalagi we-dulemar-onogoed. Deyob an Judá-dulemar we-dulemar-abargi onomogoed. 15 Geb an onosad-sorbali, wile an an-dulamar dakoed, gannar na e-negmarse-dagega an imakoed, e-yalamarse-dagega an imakoed. 16 Ar we-dulemar-yarmar-baidginmaladi, an-dulamar-Baal-nuggi-ise-sogar-ibmar-imakleged odurdaksa-gusmaladid. Ar we-dulemar, an-dulamar-abargi gudigubimalale, an-igarmar-mamaid abingamalargebed, ise-sogar an-nuggi imakmarmogargebed. Weyob sogmalargebed, ¡Bab-Jehová-dula-maid-nugginye!”
17 Bab-Jehová soged: “Ar dule an-sogedba dasulirdi, bela an obelogoed.”