41
Nailikgued-anga-osuloye Bab-Dummadga soged
David, namakmalad-e-iduedga we-namaked narmaksad.
1 Dule, dule-wileged-bendakedgi binsaele, Bab-Jehová, a-dulegi nued-binsaed.
Ar ade, ibagan-isgana ega nagunonikile, Bab-Jehová we-dule-bendakoed.
2 Bab-Jehová we-dule-edarboed,
we-napneggi dula-gudii imakoed,
we-napneggi we-dulegi nued-binsalegoed.
E-isdarmaladga we-dule-urmakosulid.
3 We-dule nailikgumaile, Bab-Jehová bendakoed.
Bab-Jehová we-dulega nailikgued osulogoed.
4 Bab-Dummadga, an sogsad:
Bab-Jehováʼye, wile be an-dake.
Ar an begi nos-inigwele,
an-nailikgumaid be anga osuloge.
5 An-isdarmalad angi isdar sunmakmalad, sogmalad:
“¿Wede sana burgoe? ¿Wede sana berguoe?”
6 Anse atakdanimalale, gakansaar anga sunmakmalad.
Geb nadmalogua, angi sunmakdedamalad.
7 Dule-isdar-an-dakmalad danar ambikunonimalogu,
angi urwebukdamalad.
Angi isdar binsabukdamalad, sogbukdamalad:
8 “We-dule-nailikgumaidi gwisguosulid, burgoed. Boni-dummad egi naid.”
9 Ar an-ai-nued-anba-masgundiid, an-egi-bensur-gudiid,
a-bela angi aibitemogad.
10 Bab-Jehováʼye, wile be an-dake.
An-nailikgumaidi, be anga nudake,
adi, an-isdarmaladgi an gwisguegar.
11 An-isdarmalad-angi-nakosulidba an magar dakoed,
yeer-ito an be-imaksad.
12 Bab-Dummad, an isgussulidba, be an-ogannodii guoed,
be-asabin-gudigu be an-imakoed.
13 ¡Israel-e-Bab-Dummad-Jehová, be-nug odummolesun!
Birga-birgaba degisadegu be-nug odummoledii gusun.
¡Deyob gusunno!