49
Coré-wagan we-namaked narmaksad. Namakmalad-e-iduedga soglenaid.
1 Bela bemar, nue an-itomar.
Bela bemar, we-napneggi-bukmalad, nue be an-itomar.
2 Dule-dummagan, dule-binsarmalad,
dule-mani-nikamalad, dule-wilegana, nue be an-itomar.
3 An sunmakoedi, nue-binsaed-nikaa an sunmakoed.
An-ulubgi-binsaedi, nue-magar-itole an sogoed.
4 Ibmar-binsaed-nikaa-soglemalad nue-itoakwaa an sogoed.
Gar-arpa-ogorsiidgi we-ibmar-soglegoed-e-obared an bega odulogoed.
5 Ar bonigan dani-sogele, ¿ibiga dobee an itogoe?
Dule-isganamar an-ebilis ambikunonimalale, ¿ibiga an dobguoe?
6 Dule-mani-nikadba-dobsuli-itodimalad, na e-ibmar-nikadba san-dummarba-imakdimalad,
¿a-dulemarde an dobguode? Suli, an dobguosuli.
7 Dule wargwensaale na dukin bendakosulid.
Na dukin burgwedgi san-onogegala,
geg Bab-Dummad-bennuked.
8 San-onolegedi gargesailad.
San-onolegegala, mani unniguarsulid.
9 Dule degisadegu dula-gudii guosulid.
Dule burgosurdeeye sogsulid, burgwedsegad.
10 Bela dulemar burgwedbiid,
dule-binsaed-ibedi, dule-binsaedsulidi, bela burgwedsemalad.
E-ibmar-nikadi dulemar-baiganga beoed.
11 Ar nainu ichesur-nikus-inigwele,
neg-uangi degisadegu mai guoed.
12 Ar dule mani-ibed-inigwele, degisadegu dula-gudiguodeeye sogsulid.
Ibdurganyobi burgwemarmogoed.
13 Weyobi, dulemar e-manigi-alakwaa-gudimaladi, berguddamalad.
Na dukin san-dummarba-imakmaladi, weyobi, berguddamarmogad.
14 Igi sibad-iduged e-sibad-wawaad-semaidae,
deyobi, burgwed we-dulemar-semai gumogoed.
E-neg-dummagan-nuegan-daklemaladgi, dikasuli e-mui neg-uangi nungumai guoed.
Yoedsega dule-nuegan negsemamai gumaloed.
15 Ar Bab-Dummaddi burgwedgi an-ollorsaoed,
Bab-Dummad eba an-sedoed.
16 Dule-wargwen mani-ibedga-gudele, mer bai be dako,
e-neg yeerdakle nadele, mer geg be dako.
17 Ar we-dule burgwidele, na e-ibmar sedosulid,
e-ibmar-yeerdaklemalad eba naosulid.
18 Ar we-napneggi dula-gudigua, weligwar itodigus-inigwele,
dulemar e-nug-odummodigusmar-inigwele,
19 we-dule, e-babgan-burgwismogayobi, burgwemogoed,
we-napneggi bar gudii guosulid.
20 Ar dule mani-ibed-inigwele, na aku itoged,
ede ibdurgan-burgweyobi, burgwemogoed.