132
Bab-Dummad Davidʼga ibmar-imakoye sogsad
We-namaked, Jerusalénʼse-nakwe-nadapir, namakleged.
1 Bab-Jehová, David be ebinsao,
e-bukib-binsaedba-wile-itoged bela be ebinsao.
2 Bab-Jehová, David bega-ibmar-ise-sogar-imaksad be ebinsae,
Jacob-e-Bab-Dummad-Bur-Birigined bega ibmar-imakoye-sogsad be ebinsae,
deun, David weyob sogsad:
3 “An-negse an nag-obiosulid,
bipisaale an gasgi obunnogosulid,
4 gabemai an saosulid,
wis-ibya-muruu an imakosulid.
5 Bab-Jehováʼga-neg-amiedse, an deyob guoed.
Jacob-wagan-e-Bab-Dummadga-neg-amiedse, an deyob guoed.”
6 Anmar Efrata-neggweburgi-gudigu, Bab-Dummad-Dulemarbo-Igar-Mesisad-Ulugi dulemar-sunmake an itosmalad.
Geb anmar Quiriat-Yearimʼgi Ulu-amismalad.
7 Geb anmar sogdemalad: “Anmar Babse-goled-negse namar,
e-asabin sindigale anmar signamar.”
8 Bab-Jehová, be-obunnoged-negse be dage,
be-Ulu-gandikidmala be asega dage.
9 Be-dule-irwa-bese-gormalad, e-mor-yomalayobi, igar-innikigwad imakmar.
Bega-innikigwadba-nanadimalad, weligwaledba namakmar.
10 Be, be-mai-David-sabedbali,
be-nuggi-nugsalegaled, melle wagar-biriar be dako.
11 Bab-Jehová Davidʼga ibmar-ise-sogar-sogsa-gusadi, bar osulogosulid.
Weyob ega sogsad: “Be-wagan-gwensak beyob reyga an omesoye.
12 An bemarbo-igar-mesisad-sogedba be-wagan nanaele, an-igar-mamaidgi-an-e-odurdakoedba nanaele,
e-mimmigan reyga degibi megmarmogoed.”
13 Ar Bab-Jehová, Sión-yala-nug-imaksad,
egi-megega abesad.
14 Weyob sogsad: “We, an-obunnoged-negga degisadegu gudii guoed.
Wegi an-ologana an sioed, ar an deyob abeged.
15 E-mas gatik-obinebaka-merguega an imakoed,
e-dule-wilegana masgi an oimmogoed.
16 Amba deyob, e-dule-irwa-Bab-Dummadse-gormaladga bendakleged-mola an ega yooed,
e-dule-nuegan, weligwaledba namakmaloed.
17 ”Wegine, David-e-gangued-gannar-nikuega an imakoed.
An-nuggi-nugsalegaled gwallu-meegwadyob negsemai-guega an imakoed.
18 E-isdarmalad, binged-dummad-nikuega an imakoed.
Davidʼdina e-ologurgin-dakarmakaled yooed.”