RUT-GARDA
RUT
GEBE-SOGLENAID
Garda-nug
Rut-Garda. We-gardagine, bunagwa-Moabʼgined-Rutʼye-nugadgi bur sunmaklenaid. Rutʼde, Israel-dulesulid. We-garda iba-bulegangine, degi, Israel-dulemar-igar-nabomalad-ibagangine narmaklesad.
Rut-Gardagi weyob sunmaklenaid
Noemí wisgunonikid, Bab-Jehová e-dulamargi nued binsanoniye, ukud-dummad-naid bergusye, degi, Bab-Jehová mas-bukib ukdeeye. Noemí Judá-yarse gannar aligusad. Noemí, Rutʼbogwa Belén-neggweburgi gudii gusadgi sunmaklenaid.
We-gardagine, weyob ilemakar sunmaklenaid:
1. Elimelec e-gwenadmala Moab-yargi maigusmalad (1:1-5).
2. Noemí, e-bala-Rutʼbogwa, gannar Belén-neggweburse nonikid (1:6-22).
3. Rut, Booz-nainugi-gudiid (2:1-23).
4. Booz, Rut-nikubi gualid (3:1-18).
5. Booz, Rut-nikunonikid (4:1-17).
6. David-e-dadgan (4:18-22).
Be itogua.
1. ELIMELEC E-GWENADMALA MOAB-YARGI MAIGUSMALAD
1
(1:1-5)
Noemí gudii-gusad-igar
1 Deunni, igar-nabomalad-dummagan Israel-yar-semamaid-ibagangi, ukud-dummad Judá-yargi nagunonikid. Agala, dule-gwensak Judá-yargined Belén-neggweburgined, na e-ome, degi, e-masmala-warbogwadmala Moab-yarse nadegusmalad. 2 A-dule, Elimelec nugad. E-omedi, Noemí. E-machi-wargwen Mahlón-nugad, baiddi Quelión-nugmogad. A-dulemar, Efrata-dulemalad, Belén-neggweburginmaladid. A-neggwebur Judá-yargi-siid. Wemar, Moab-yarse modapmargua, agi megidapmalad.
3 Agi, Noemí-e-sui-Elimelec burgwenonikid. Geb Noemí e-sui-sorba na e-masmala-warbogwadmala wargwen besmalad. 4 We-masmala-ebogwad Moabʼgined ome-nikunonimalad. Gwensak, Orfaʼye-nugad, baiddi Rut-nugmogad. Geb Mahlón, degi, Quelión birgambe (10) ome-nika-gudii gusmalad. Agi, burgwenonimarmogad. 5 Degisoggu, Noemí na e-bendaked-sate gunonisunnad, ei-sui burgwis, degi, ei-masmala burgwisbar.
2. NOEMÍ, E-BALA-RUTʼBOGWA, GANNAR BELÉN-NEGGWEBURSE NONIKID
(1:6-22)
6 Degine, Noemí wisgunonikid, Bab-Jehová e-dulemargi nued binsanoniye, ukud-dummad-naid bergusye, Bab-Jehová mas-bukib ukdeeye. Geb degidbali, Noemí e-balamarmala, Moab-yargi-mai armarsunnad. 7 Degisoggu, Noemí, degi, e-balamarmala Moab-yargi-e-neggi noargusmalad. Na e-warbaa Judá-yarse nagab nadegusmalad.
8 Geb degine, Noemí igarba-nadapgua, e-balamarga sogded:
—¡Na bemar gannar be-nangan-negse namalo! Ar igi bemar dule-burgwismalad na be wiledaksamala, degine, igi be wile an-daksamarmoga, bitigi deyob Bab-Dummad wile-bemar-dakmogana gadin. 9 Bitigi Bab-Jehová gannar-sui-nikuega bemar-imaksana gadin, adi, bemar neguya-nuedgi wergudii-gumalagar.
Geb degine, Noemí, na-e-balamar-wagar usad, adi, sogegar, degimaloye. Geb agi, e-balamar bela-bela bodmalad. 10 Degine, geb Noemíʼga sogdemalad:
—Anmar beba be-dulemarse namarmogoed.
11 Noemí gannar amarga sogded:
—Na be-negse be namala. ¿Ar ibiga be anba namalosunna? ¿Ar ande gannar mimmigan-nikubalosi, be-suimarga gumalagar? Ar geg deyob gued. 12 Bunamala, gannar be namala. An seredgus, an sui-bar-nikuosulid. Ar amba an bemarga sogdibe: ‘An emi-mutikidba sui-nikuoye, an mimmigan-nikubaloye,’ 13 ¿ar bemarde, we-masmala-dunguedse abitomalosi? ¿Ar amar-ular, bemarde suisuli gudii gumalosi? Suli, geg bemar deyob gudii gumalad. Ar an bur bule bemarba nunmaked itonaid, ar Bab-Jehová bela-bela angi yolenaid.
14 Degine, e-balagan gannar bela-bela bodmarbalid. Geb Orfa e-saka-wagar napi-usad, adi, ega sogegar, degimaloye. Rutʼdi e-sakagi-bangubisulidba besad. 15 Agi, Noemí Rutʼga sogded:
—Be-aisu-omega-gusadba be namoga, ar edi e-dulemarse naded, e-bab-dummaganmarse naded. Eba be namoga.
16 Rut ega sogded:
—¡Mer be anga soge, an be-mete naye,
be angi banguye!
Ar bia be nadesogele, an beba naoed,
ar bia be megidapoe, agi an megidapmogoed.
Ar be-dulemar, an-dulemarga gumogoed.
Ar be-Bab-Dummad, an-Bab-Dummadga gumogoed.
17 Ar bia be burgoe, agi an burgwemogoed,
agi an diglemogoed.
Ar unnila burgwedsega anmar na bangudmaloed.
Ar degisulile, bitigi Bab-Jehová sabsur an-odurdaksunnana gadin.
18 Noemí deyob dakdegua, Rut eba nue-naye soge, agi, bar ega akar-sogsasulid.
19 Degine, geb Noemí, Rutʼbogwa nadmarsunnad, geb deyob Belén-neggweburse nonimalad.
Belén-neggweburse nonimargua, bela dulemar-aginmalad geger dakdemalad, geb sogdemalad:
—¿Wede, Noemíʼsursi?
20 Geb Noemí amar-abin sogded:
—Mer bar Noemíʼye be an-bimalo, ar Bab-Dummad-Bela-Gangued-Nikad nunmaked-dummad anga uksasoggu, a-ular, be an-bimarsunno, Maraʼye.
21 An bela-ibmar-nika nadegusanad.
Emisgindi, aka Bab-Jehová, ibmar-sate gannar an-obirisad.
Ar Bab-Jehová-sogedba-gusad,
degisoggu, ¿ibiga Noemíʼye anse bar gormalosunna?
Ar emisgindi, Bab-Jehová sabsur an-odurdaksad.
Ar Bab-Dummad-Bela-Gangued-Nikad boni-dummad angi barminonikid.
22 Deyob Noemí, e-bala-Rutʼmala Moab-akale, Belén-neggweburse nonimalad. Deunni, orosgisaar-dakleged-cebada gebe-weleded, a-ibagangi nonimalad.