2
Ome-nue-sabgulediid namaked
1 Sarón-neba-naidgi dutu-gwichidyob an gued.
Nebagi dutu-lirio-digar-gwichidyob an gued.
Sui-nue-sabgulediid namaked
2 An-ome-nue-sabesailad, ikoganba dutu-lirio-gwichiyobi,
omegan-abalagi gudiid.
Ome-nue-sabgulediid namaked
3 An-sui-nue-sabesailad sapimar-abalagi manzana-sapi-gwichiyobi, sapingan-abalagi gudiid.
A-sapi-urba-sigedi yeer an itodaed,
e-sana, yeer gulledaed.
4 An-sui, yeer-masgullegedse an-semai gusad,
agi e-sabed anga nue-oyosad.
5 Uva-odinnolegaledgi an-niga be ogannomala,
manzanaʼgi an-niga be ogannomala,
sui-abegedbina an nue-soged.
6 Bitigi, e-sakwa-sapiled an-nono-urba mesisana gadin.
Bitigi, e-sakwa-nueddi angaagwar an-imakena gadin.
Sui-nue-sabgulediid namaked
7 Omegan-Jerusalénʼginmalad, goe-sapurbarmalad-nukad an bemarga ise-wilegagwar soged,
melle be an-ome-nue-sabesailad an-ibe odakmalo,
melle be ese gormalo, na atakbiedba atakdagoed.
2. NAMAKLEGED-SOGBOGWAD
(2:8–3:5)
Ome-nue-sabgulediid namaked
8 ¡An-sui-nue-sabesailad-e-gaya gordani an itoged!
¡Be dakmala! ¡Wegi danikid be dakmala!
Yalaganba ichomakdanikid,
yar-mulluganba icho-icho danikid.
9 An-sui-nue-sabesailad goe-sapuryob daed.
An-sui-nue-sabesailad goe-sapur-senigwadyob gued.
Be dakmalana, anmar-galu-naba gwichid, galu-imbaba atakgwichid,
arbakee yawagak-senigwad-ollo-ollogwadba an-dakgwichid.
10 An-sui-nue-sabesailad anga sunmaksad.
Weyob anga sogded:
“An-ome-nue-sabesailad, be gwisguye.
¡Ome-yeerdakleged, be anba dagye!
11 Be dakena, dii-wied-ibagan bato nasye,
dii-wied bato bergusye.
12 Dutumar bato sapurba ainiarye.
Namakleged-ibagan noniye.
Suirgwamar-namakmalad, bela anmar-yargi itoleye.
13 Higuera-sapi bato sanmakdeeye,
uva-dub durbamakgwisye, e-dutumar bato oyapachaye.
¡An-ome-nue-sabesailad, be gwisguye.
Ome-yeerdakleged, be anba dagye!”
Sui-nue-sabgulediid namaked
14 Igi nuu akwa-imbaba, degi, yar-imbaba yaa-olloganagi dukue,
melle be deyob an-idu dukue.
Be-wagar anga be oyoge,
be-sunmaked-itogega be an-imake.
Ar be-gayaburba yeer itoledaed,
be-wagar yeer daklebalid.
Ome, e-suibo namakdemalad
15 Achu-asdubingiidmar anmarga be gamala.
We-achu-senigana nainu-oichoged gudimalad.
Ar anmar-ibe uva-dubmar-durbamakgwismalad wiogedid.
Ome-nue-sabgulediid namaked
16 An-sui-nue-sabesailad angadid, an egadmogad.
Dutumar-imbagi sibadmar-akwedii daed.
17 An-sui-nue-sabesailad, dad-argwaned-iduale,
negsichilealile, anse be dage.
Goe-sapurbalidyobi be abarmakdage,
yar-Beterʼye-nugad-yalaganba be abarmakdage.