75
Eya manyuḵ gway mo, isi ki gwo jin onu ki: Dhalki sho’k ki ’ce’d mo. Gway ma Asap̱. A’di jin ta gway mo.
1 Am c̱ina /e mo jin ’boru /e bwa i is mo, ayy Arumgimis,
bwa jin ’boruwa ’bor bwa i is c̱ina aman /e mo.
Aman yuḵkina yuḵ ap̱o/ gway pini mo dhali deŋ dhan momer pini e mo kun miikina /e mo.
2 Ka tee jin karka/ ’pen ka pije/ mo tani
aha/ mina dwall gwo ki dar gi mii ma gwar ’de/ mo.
3 Ka ’cesh midi wuŋkul mo dhali aris ’kwani kun ’kon e a’di mo tani
a’di ta aha/ be jin ṯelki mom piti jin tana a’di akaḵ mo.
Doshi ma dhali ’cunycuri yan mo.
4 Aha/ mina o uni gwansan kun dhu ’ba/ ki ca gwo mo ki: Dhalku/ ’ba/ ki dhu ki ca mo
dhali aha/ mina o a’di jin ta thus ki thus gwo mo ki: Dhalku/ cem pini ki ’de’k ki mis mo.
5 Dhalku/ cem pini ki ’de’k ’kup̱ ki mis jin ḵa’dama/ ḵa’dam mo
walla o gwo mmo’theḵ ’ba/ imis mmo/ush ’kwani ga/ mo.
6 Haali/ yisa ’peni mom’pesho’k walla bora luŋgu’b mo
dhali yisa ’peni mombwaasho mo ip̱u’dkina mo jin ’deku is ki mis mo.
7 Hili a’di ta’da Arumgimis jin torki gwon dwall ’twa/a ’cesh mo
mmo’thi jan ’de/ ’ko’da ’cesh mo dhali cuwa kamuŋ kamu/ mis mo.
8 Haali/ e me’d gi Tap̱a mo tani aḵubbaaya diki’d mo
jin sekina yimana mura’th jin ḵa/u ki ŋah ŋah ki ’tha’da/ ’tha’da/ mo, jin ’koshu is ki ’bore/ mo.
Dhali a’di midi wol a’di ’peni jin p̱inu mo,
dhali aris ’kwani kun ta thus ki thus e mony’cesh mo
uni mini p̱i a’di ḵu’th mo ki ṯer ntaga ’cummam piti ilu/ mo.
9 Hili aha/ mina bwa ’kuny ki sule/ sule/ mo.
Aha/ mina yuḵ gway mmomaŋ Arumgimis ma Yakuub mo.
10 Aris ce gi uni kun ta thus ki thus mo tani mina a’di wa’b bwa mo
hili ce gi uni kun tana ḵar/e minu dhu ki ca mo.