1 Yohanis
Horok Lirna La'an
Ri Kristen man minle nonolu ra'aheni ri ma naran Yohanis man hi'i horok eniyeni, la lere an hi'i horok eni minle nin kota Epesus. An aku horok eni laa ri Kristen na'akeme man minle propinsi Asia Tatane. Lere an hi'i horok eniyeni ai na'ileheredi me'e.
Lere Yohanis hi'i horok eni, meser agame nammori aile man wakuku ha ma ka namlolo. Hi ra'aheni Kristus ka namwali ri morimori ma nadedem naise maika, maa Ai namwali roh mehe, de ha ma namwali noro ri kemen kan min haida. Hi ra'aheni lo'o ik hi'i ha man ailanna, onne kan min haida ono ik kemen mehe man ailanna. Yohanis na'aheni rir wanakuku onne na'akeme sala wake'e! Ai na'aheni Yesus namwali Makromod Lalap Ananne, la namwali ri mormori naise maika, la Ai kemen naise ik kemen haenhi. Lo'o ik kauroin Makromod Lalap kokkoo ik teunohi Nin hini'i wenewhe, de kak hi'i dohohala, maa ik lernohi Nin keneri hono'ok man hopon ik ida ma naramyaka ida.
Yohanis hi'i horok eniyeni leke ri ma akin naili'il Makromod Lalap Anan rauroin kokkoo hir lernaledi or'ori dardari ma kan horu (5:13). An horok panaeku namehin ma na'alapa ik akin haenhi leke ik kauroin kokkoo ik kamwali Nin ri (2:3, 5-6; 3:10, 14, 24; 5:11-12, 18-20). Ai na'aheni lo'o ik akin naili'il ik Makromod Yesus, ik ka kamka'uk kamriri lolo Makromod Lalap leken kalarna (2:28; 3:19-22; 4:16a, 17-18; 5:14).
Horok Ihin
1. Yohanis nala wanakunu man hari horok eni (1:1-4).
2. Ik min lolo Makromod Lalap Nin Ropropo raram (1:5-2:27).
a. Lo'o ik kauroin Makromod Lalap, ik kak minle noho momohon la ik hi'i wewehe Nin keneri hono'ok (1:5-2:17).
b. Ik akin naili'il Yesus, de kauroin Ai penia man Makromod Lalap kikan namwali Rai laa ewi-ewi (2:18-27).
3. Ik kamwali Makromod Lalap ananhe (2:28-4:6).
a. Iknik morimori ka namnehe noro Hayakyak Makromon nin ri (2:28-3:24).
b. Ik kauroin Yesus ma namwali Rai laa ewi-ewi, namlolo kokkoo namwali ri mormori la Ai kemen naise ik kemen haenhi (4:1-6).
4. Ik akin naili'il Makromod Lalap, la ik kauroin Ai penia raramyaka onno (4:7-5:12).
a. Ik ida ma naramyaka ida (4:7-5:5).
b. Ik akin naili'il Yesus de kauroin Ai onne Makromod Lalap Anan man maki leke nala morimori man ma'aruru wake'e maika (5:6-12).
5. Yohanis konohi horok eniyeni nin panaeku (5:13).
6. Yohanis nala wanakunu man horu (5:14-21).
1
Lira ma nala or'ori dardari
1 Horok eni ihin na'ono Lirna ma nala or'ori dardari man ailedi nano nonolu wake'e lere noho eni ka namwali makun. Am dernedi Ai ma namwali Lirna onne la modi ai makam do'onedi la tukuledi Ai me'e. Ai onne Yesus Kristus, Lirna ma nala or'ori dardari eni.
2 Or'ori dardari onne maiyedi noho wawan, la am do'onedi me'e. Onne peni ai mamwali man kuku maka Ai ma nala or'ori dardari ma kan horu eni. Ende am konohi mi inhawa man nonolu am dederne la dodo'on eni. Nonolu Ai ma nala or'ori dardari eni minwuku noro Aman, maa lere eniyeni hariyedi mayai me'e.
3 Am konohi mi hahaa na'akeme man am do'on la derne, leke lere eniyeni mi moro mayai minwuku kodi honorok aki mahaku la kauroin wewerre hi'ihehewi ik koro iknik Ame noro Anan Yesus Kristus moriwuku wawa'an.
4 Am hi'i horok eniyeni leke ik na'akeme akin nahuwa'anedi kokkoo.
Makromod Lalap siksik lerlere
5 Lira man am dederne nano Ai eni, am loikaru ki mi. Nou eni na'aheni, “Makromod Lalap onne penia siksik lerlere, la lolo Ai onne ha man metmetek kalkala ida kaale.”
6 Lo'o ik ka'aheni, “Ik koro Ai moriwuku wawa'an,” maa ik mori aile metmetek kalkala raram makun, ik mehe wukupohedi ik me'e lolo iknika wanakunu noro iknike hini'i wenewhe.
7 Lo'o ik mori mamani lolo ropropo raram naise Makromod Lalap aile lolo ropropo raram mamani, ik ida man mori wawa'an noro ida, la Makromod Lalap Anan Yesus rarna na'amouwedi ik honorok akin nano dohohala na'akeme.
8 Lo'o ik ka'aheni iknik dohohala kaale wake'e, mehe kapohedi ika me'e, la ka kauroin panaeku ma namlolo lolo Makromod Lalap kalarna.
9 Makromod Lalap namkene hi'i Nin nou la hi'i ha ma namlolo mamani, de lo'o ik konohi mouropo iknik dohohala Makromod Lalap, Ai na'ohu nahala iknik dohohala, la na'amou na'adewe ik honorok akin nano hini'i wenewhe man sala na'akeme.
10 Makromod Lalap na'aheniyedi ri morimori na'akeme hi'iyedi dohohala, de lo'o ik ka'aheni kak hi'i dohohala, onne nin panaeku ik ka'aheni Makromod Lalap ma napoho. Enla Ai Lirneni kan minle ik raramne.