1 Korintus
Leta Korintus de letlalawna id la Akhaya yapatni, la'a hairi Roma. Paulus ndella Korintus la anni id rehenu totpena nakot nohora Kot Kalwieda-Paitiota la' hande. Makden Korintus harahu ratlin nan e lirni pa rpesiaya (Makodlira 8:1-11). La' ler maka Paulus nwaran la Korintus de riy ida mak katu kwatutu nmai pia nwatutu Uplerlawna lirni la' hande. Nanni de Apolsu (Makodlira 18:24-19:1). E' ed mak kwatutu me nhima-nre'a makpesiay la Korintus.
La' pa ler maka Paulus ndella leta Epsus de ena'enyatga horta id la makpesiay la Korintus. La' horat di ralamni enakot nohora lirni-tunnu wotelu, de: 1) Nwahla ir tianni maka ir rhorat targ oleka la e' wa. 2) Enatlin nan oleka de makden Korintus to'a-taiya pa dom de rlernohora Paulus wniatutnu dom de rlernohora Apolsu wniatutnu onde riy dom to' owa'ana, me dom de rhi' do'a-ryap hiala. 3) Tunguru-tungkuru mak edon kaplola dom de rla' Korintus. Ir rwayotlia Paulus riwra Paulus edon rrekan wut lia riy maka Yesus Nhopan pa nodia Uplerlawna lirni-tunnu. La' hade pede na'enyatga horat di totpena nwahla ir tianni ne totpena nhopan pa ir rhoitio'or doin yehwa-liakta mak edon kaplola totpa rlernohora hihi'a-yapyapi mak kaplola pa riy makpesiay rhi' nana.
La' puk di de e rakot nohora emkadille:
1. Paulus nwak kalwieda (1:1-1:9)
2. Paulus nakot nohora makden Korintus to'a-taiya me rhi' oleka do'a-hala (1:10-6:20)
3. Wniatutu-wniaye'a la'a mak kmehlima me mak edon kmehlima ma'ta (7:1-40)
4. Wniatutu-wniaye'a la'a yamanna mak riy mak edon kpesiay ha rhoi-rtania la uplera-upmati (8:11-11:1)
5. Wniatutu-wniaye'a la'a krei-iskola yala'ani mak kaplola (11:2-14:40)
Yehwa liakat mak klol talan la patke'a mak kla' krei-iskola (11:2-16)
Wniatutu-wniaye'a la'a Uplerlawna meini (11:17-34)
Wniatutu-wniaye'a la'a ra'a-palu maka Uplerlawna Nhiwni Nala (12:1-14:40)
6. Wniatutu-wniaye'a la'a riy mak kmati hota rmori owa'ana (15:1-58)
7. Nnio'a-niatu hohoni (16:1-24)
1
Paulus nwak kalwieda
1-3 Ina-nara ama-hyali makden la Korintus. Miy di de krei wokni-le'enu mak Uplerlawna Npolga pa mlier la E mutnu mak kakleh do'a-hala. Mlier la E mutnu mak kakleh do'a-hala yoma miora Kristus Yesus mlia' ihru ida-ralm ida, de mior wutga mak kden meni-meni to'a, mak kola olek la Itmatromni Yesus Kristus tiernu. E' de ed maka it hononita Matromlawanni E'a.
Paulus a'u me it mutwualli Sostenes, ampak de Uplerlawna, it Amlawanni de, nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy.
Agodi plolli pa ghorta horat di, yoma a' di de maka Kristus Nhopan pa agodia Uplerlawna lirni-tunnu. Yoma Uplerlawna Nmeh'a Nran a lia E wniaror wamueheni.
Ra'a-palu (karunia) mak Uplerlawna Nala mai ita onnila itora Kristus tla' ida
4 Ina-nara ama-hyali, nhi'inde asiumbain rer pia a'u'uli-uwedia Uplerlawna mak akola tieru-gawur nehla la de yoma la'a E kalwiedni-paitiotni pa mliernan oleka ruri-lai la'a Uplerlawna, de lola Kristus Yesus.
5 A'u'uli-uwedia Uplerlawna yoma, onnila miora Kristus mlia' ihru ida, pede la' mormiormi-dardiarmi de mliernan mamainia E rurni-laini pa la' hya'a-hya'a to'a de miatu mikot nohora Uplerlawna lirni, me mlier la kirkira-ralma-riora samomuou la hare honona.
6 Ne la'a ruri-lai miaka ha mliernana re, pede hya' maka amakot nohora tiy miy la'a Kristus, de miat niohora de hade plola.
7 Mliernan oleka ruri-lai maka Ha Nala tiy miy die, pede la' lera-mela ri maka mpiewiei-mniarnar reria Orgahi-Orha'a Yesus Kristus maimiaini de mniair reria ruri-lai re honona.
8 Ne hota Uplerlawna Nmeh'a Nhi' aruri miy pia la'pa ntutu-nte'ela lerni-melli la' E maimiaini, totpena la'pa Orgahi-Orha'a Yesus Kristus Nmai owa'ana, de ta'en niana rto'on miy lia do'a-hala yoma mikleh oleka hala.
9 Hota Uplerlawna e Nhi' aruri-alai miy yoma edon Nhoratdoin E nnio'oni. E' de Uplerlawna E inhatta, mak kpol nian miy pia mlier teman la A'nani Yesus Kristus, Itmatromlawanni de, pa miora mlia' ihru ida-ralm ida.
Krei wokni-le'enu rahuri-rawo'ora pa to'a-taiya
10 Ina-nara ama-hyali, a'ultier di awuet la Yesus Kristus nanni totpena lira mak a'ukota tiy miy, mpiesiaya pa mliernohora. De awuak totpa miy hononmi yana mihuri-miwo'ora totpena yana to'a-tai miy. Mere totpa hononmi mlia' lir ida.
11 Ina-nara, a'ukot emkade yoma Klo'a rimormiorni rma raklak miy mai a'u riwra miy e mihuri-miwo'ora,
12 de rakotiwra, riy dom tiy miy riwra rlernohora Paulus a'u, dom de riwra rlernohora Apolsu, dom de riwra irlernohora Petrus, me la'pa dom to' de riwra irlernohora Yesus Kristus!
13 Mikot lira emkade de Yesus de e rhakar la'a-maiya! Paulus a' di edonna rwair wen a lia auwlakra yoma la' miy rerieimi! Me rharan miy miana edonna rwet la a na'nu toh!
14 A'u'uli-uwedia Uplerlawna yoma a'g edonna gharan mia'ta riy id tiy miy lia hande, enekneka agharania Krispus nor Gayus rmeh'a to'a.
15 Yanpa hota riy riwra agharania hare totpena irlernohora a'u.
16 O, yowa Stefanus me romni mniotni de a'g ed mak kharania. Mere a'g e ghoratreria de riy dom palia la hande de a'g edonna gharan mia'ta.
17 Yoma Yesus Kristus Nal a' die a'g edonna muai pia gharan riy. Mere Nal to' a' pua ukot nohora Kot Kalwieda-Paitiot della lol meni-meni. Hade ho'mana yana aniairia rimormiori nohkeran di kirkirni-ralma-rior samomuounu. Yanpa hota maka ukot nohora Yesus Kristus matmiatni la' auwlakra hananni, de hota ler la hamamuamua.
Uplerlawna Ntutga rurni-laini kirkirni-ralma-riorni la'pa lirni-yat wamueheni onnila Yesus Nmat lia it rerieini
18 Rimormior miak kharan nan matmiati-molmuolu plalahwa pa hota rrinnia la ai mormiori ralamni, de er mak kiwra kot maka ha mpahaur nohor la Yesus matmiatni la' auwlakra hananni de lir podpodku hade. Mere la'pa it hononita mak kharan nana yamori-yalewna, la it wniarorni de, emekneka Uplerlawna Nmeh'a Nala kot de pa Nod it la yamori-yalewna.
19 Yoma emeknekama la'a Puklawna lirni de Uplerlawna lirni mak kiwra:
“La' riy mak knairia rimormiori nohkerna kirkira ralma-rior samomuounu de hota Awueyata-wuaniaga kirkirni-ralma-riorni. Ne riy mak katu liawanni, de e lirni-yatnu mana A'uhmena-uprai.”
20 Pede riy mak katu kwarora-kwalaiya, me riy mak katu kwatutu-kwaye'a agama deullu-tatarni, la'pa riy mak katu kawo'or pa nod niana ir mutwualli wniarorni-wnialaini la'a lera-mela ri, de Uplerlawna Ntutga oleka de ira lirni-yat wamueheni mak klernohora nohkeran di wniarorni de hota nwal lia hamamuamua toh!
21 Uplerlawna Nhi' hade e Nlernohora E kirkirni-ralma-rior samomuou wamueheni. Wniarorni de totpa rimormiori kirkirni-ralma-riorni la'pa lirni-yatnu emkameni ho'mana hota taken niana rodi ir pa rla' Uplerlawna. Mere Enala lira-tunu la'a Yesus matmiatni mak amakot nohora di, mere rimormiori nohkerna ha riwra hamamuamua, de Nala na Namori-nalewna riy mak kpesiay.
22 Makden Yahudi rwak pa ramkek memna hihi'a-yapyapi mak kamehi-kayona nanpena rpesiaya. Ne makden Yunani mana rwahak lira-yatu la'a wniatutu-wniaye'a iskola totpena irpesiaya.
23 Mere am di de makot nohor to'a Yesus Kristus matmiatni yala'ani la auwlakra hananni totpena Namori-nalewn ita me la'a E wniatutnu-wniaye'eni. Kot de ed mak khi' yawuhi-yawe'et la makden Yahudi re ralma-riorni. Noma riy mak Yahudi atia'a re riwra lir podpodku re!
24 Mere hota la' riy mak Uplerlawna Npol nian oleka re, de la'a makden Yahudi me mak Yahudi atia'a re, de Uplerlawna Ntutga rurni-laini me kirkira-ralma-rior samomuounu onnila Nala Yesus Kristus pa Namori-nalewna ira.
25 Yoma hya' maka Uplerlawna Nhi' nana Nlernohora E ralma-rior wamueheni, de rimormiori rwarora-rwalaiya de ha podku re. Mere Uplerlawna hihi'ini-yapyapni nlernohora E kirkirni-ralma-rior samomuounu, de narehi-nalawan meman la rimormiori nohkerna wniarorni-wnialaini. Ne Uplerlawna hihi'ini la'a Yesus matmiatni, de rimormiori riwra hihi'ini de nakleha ruri-lai. Mere hihi'ini de nodi plolli pa nareh niana rimormiori rurni-laini honona.
Uplerlawna Npol it pa Nhi'a la a'nani de E edon Nwalir lia riy orkotkotni-ornananni
26 Ina-nara ama-hyali, mhioratreria la emkameni la' lerni Uplerlawna Npol miy. La' makpesiay miy die enekneka riy ida-woru rmeh'a er mak katu la rimormior yamkekni, onde er mak kodi plolli, onde rla' marna-wuhura.
27 Mere plola la Uplerlawna Nwaliria mak riy riwra podku-padku totpena rhi' amola-ma'a mak katu. Ne Uplerlawna Nwalir wialia riy mak kakleha weli mak edon kla' nana riy rieknenni pa na namola-nama'a mak ha rwetwet la nanni.
28 Uplerlawna Nwalir niana makla' hopopna-lili'iru ata-wa'ara, maka ha rmakriarnia, maka rimormiori nohkeran di rwarora de edon nodi untu. Mere Nwaliria re totpena na nweyata maran penpuenu-wuhur tetema tullu-petanni.
29 Uplerlawna Nhi' hade totpena riy id mana edonna natulu-napetan la Uplerlawna gaini ralamni.
30 Mere Uplerlawna Nmeh'a Nna'ohma pede ina-nara mieh'a miora Kristus Yesus her wiutu. Ne la'a itpuit la Yesus mak kmati lia it rerieini de pede itat niohora Uplerlawna kirkirni-ralma-rior samomuounu mai ita la'a Yesus matmiatni de. Yoma Yesus matmiatni de pede Uplerlawna Nhi' it pa totpena itora E' pa tkalwieda. Ne Enhi' it la E mutnu-rahanu maka Nwalir niana pa Ntuwu-nhaiya la do'a-hala ralamni.
31 Pede ina-nara ama-hyali, emekwalima maka rakot targa la Puka ralamni, de yana mpio'on atulga inon wamuehemi. Mere mikot nohora hya' maka Orgahi-Orha'a Nhi' nana la miy rerieimi totpa riy ra'uli-rawed E'a.