12
Tuhan pung Roh kasi kuasa sang kotong ko bekin tugas macam-macam
1 Sodara sayang dong! Beta mau ko bosong mangarti so'al itu kuasa deng karunya yang Tuhan pung Roh ada kasi sang kotong ko kotong pake.
2 Bosong su tau, bilang, waktu bosong balóm jadi Tuhan pung orang dong, bosong maen basonggo barang-barang bisu. Bosong iko buta-buta sang dong.
3 Tagal itu, beta mau ko bosong mangarti, bilang, sonde mungkin ada orang yang ta'ika deng Tuhan pung Roh Barisi yang bilang, “Kutuk sang Yesus tu!” Deng sonde mungkin ada orang yang sonde ta'ika deng Tuhan pung Roh Barisi, bilang, “Yesus tu, beta pung Bos!”
4 Tuhan pung Roh ada kasi orang satu-satu deng dia pung karunya, ko dong kasi jalan dong pung tugas laen-laen. Ma samua karunya dong, datang dari satu Roh.
5 Orang dapa karunya macam-macam ko layani orang, ma dong samua cuma dengar dari satu Bos sa.
6 Orang dapa tugas macam-macam ko kasi jalan Tuhan pung karjá, ma cuma Tuhan Allah tu, yang tolong sang dong ko kasi jalan itu tugas samua.
7 Tuhan kasi tunju Dia pung Roh di tiap orang pung idop deng cara beda-beda, ma dia pung maksud ko samua dapa ontong sama-sama.
8 Dia kasi Dia pung Roh pung kuasa di Dia pung orang dong. Saparu tarima kuasa ko dong bisa pikir panjang, ais kasi nasiat yang pas. Saparu tarima kuasa ko kasi tau deng taráng, apa yang dong mangarti.
9 Saparu lai, tarima kuasa ko parcaya kuat sang Tuhan Allah, tagal dong ta'ika bae-bae deng Dia pung Roh. Saparu lai, tarima kuasa ko bekin bae orang saki.
10 Saparu lai, tarima kuasa ko bekin tanda heran macam-macam yang kasi tunju Tuhan Allah pung hebat. Saparu lai, tarima kuasa ko kasi tau Tuhan pung pasán sang Dia pung orang dong. Saparu lai, tarima kuasa ko dapa tau roh mana yang ba'akar di Tuhan Allah, deng yang mana yang sonde. Saparu lai, tarima kuasa ko bisa omong pake bahasa macam-macam. Saparu lai, tarima kuasa ko kasi tau itu bahasa dong pung arti apa.
11 Ma cuma satu Roh yang bekin ko dong samua bisa bekin itu tugas dong. Dia kasi orang satu-satu ko dong mampu karjá iko Roh pung mau.
Satu badan, deng dia pung bagian macam-macam
12 Beta mau banding itu karunya dong deng orang pung badan. Satu badan pung bagian ada macam-macam. Ma itu bagian macam-macam tu, ta'ika jadi satu badan sa.
Itu sama ke Kristus pung orang dong.
13 Kotong samua ta'ika deng satu Roh. Andia ko waktu kotong dapa sarani, kotong jadi sama ke satu bangsa. Biar kotong orang Yahudi, ko orang bukan Yahudi, orang budak ko orang bebas, Tuhan Allah kasi kotong samua satu Roh sa. Itu sama ke kotong samua minum aer yang bawa idop dari parigi yang sama.
14 Memang, badan tu, bukan cuma dari satu bagian sa. Te dia tu, jadi dari banya bagian.
15 Andekata lu pung kaki bilang, “Beta ni, bukan tangan. Jadi, beta sonde jadi bagian dari lu pung badan.” Biar dia omong bagitu, ma dia masi bagian dari lu pung badan. Batúl, to?
16 Deng kalo lu pung talinga bilang, “Beta ni, bukan mata. Jadi, beta sonde jadi bagian dari lu pung badan.” Biar dia omong bagitu, ma dia masi bagian dari lu pung badan.
17 Pikir do! Kalo lu pung badan cuma jadi satu mata sa, karmana ko lu bisa dapa dengar? Deng kalo lu pung badan cuma jadi satu talinga sa, karmana ko lu bisa dapa ciom bau?
18 Ma bosong su tau, Tuhan Allah bekin sang kotong jadi sama ke satu badan, deng Dia ator dia pung bagian macam-macam, iko Dia pung model.
19 Kalo kotong pung badan cuma jadi satu macam bagian, dia pung nama su bukan ‘badan’ lai, to?
20 Ma dia pung batúl, kotong pung badan ada pung bagian macam-macam. Itu yang bekin dia jadi satu badan anteru.
21 Orang pung mata sonde bisa anggap reme sang itu orang pung tangan, bilang, “Beta sonde parlú sang lu!” Deng orang pung kapala sonde bisa kasi tau sang itu orang pung kaki, bilang, “Beta sonde butu sang lu!”
22 Dia pung batúl, andia, ada badan pung bagian yang kotong anggap sonde kuat deng sonde pantíng, ma kotong masi parlú sang dong.
23 Ada bagian yang kotong anggap dong pung guna cuma sadiki sa, ma kotong masi piara bae-bae sang dong. Deng ada bagian yang kotong malu kasi tunju, ais kotong tutu bae-bae sang dong.
24 Ma kalo bagian yang sonde bekin malu sang kotong, kotong sonde bekin apa-apa sang dong.
Ma Tuhan Allah kumpul samua bagian ko bekin jadi satu badan. Ais Dia ator ko bagian yang kotong anggap sonde pantíng, kotong ju piara bae-bae sang dong,
25 te Dia sonde suka kotong pung badan tabagi-bagi. Dia mau ko samua bagian, satu balia deng satu.
26 Te kalo satu bagian dapa susa, na, samua ju rasa. Deng kalo satu ada tarima hormat, na, samua ju iko sanáng.
27 Bagitu ju deng bosong. Te bosong sama ke Kristus pung badan anteru. Tiap orang parcaya jadi sama ke satu bagian dari Kristus pung badan.
28 Te di orang parcaya dong pung teng-tenga, Tuhan Allah kasi kuasa ko bekin tugas macam-macam.
Partama, Dia utus orang saparu pi jalan kasi tau Dia pung pasán.
Kadua, Dia pake orang saparu jadi Dia pung jubir.
Katiga, Dia bekin orang saparu pintar ajar orang so'al Dia.
Tarús, Dia kasi kuasa sang orang saparu ko bisa bekin tanda heran macam-macam ko kasi tunju Dia pung hebat.
Saparu lai dapa kuasa ko bekin bae orang saki.
Saparu lai dapa karunya ko tolong orang.
Saparu lai dapa karunya ko bisa urus orang ko dong karjá sama-sama deng bae.
Deng Dia kasi kuasa sang orang saparu lai, ko dong bisa omong pake bahasa macam-macam.
29 Naa, bosong pung pikir karmana? Tuhan Allah utus samua orang ko jalan pi kasi tau Dia pung pasán, ko? Sonde. Dia bekin samua orang jadi Dia pung jubir, ko? Sonde. Dia bekin samua orang pintar mangajar, ko? Sonde. Dia kasi kuasa sang samua orang ko bisa bekin tanda heran, ko? Sonde.
30 Dia kasi kuasa sang samua orang ko bekin bae orang saki, ko? Sonde. Dia bekin samua orang bisa omong pake bahasa macam-macam, ko? Sonde. Dia bekin samua orang bisa kasi tau itu bahasa dong pung arti, ko? Sonde.
31 Naa! Bosong musti siap sadia ko tarima deng pake karunya yang lebe barguna kasi banya orang dong.
Biar bagitu, ma beta masi mau kasi tunju sang bosong jalan yang paling bae.