23
Dong bawa sang Tuhan Yesus pi gubernor Pilatus
(Mateos 27:1-2, 11-14; Markus 15:1-5; Yohanis 18:28-38)
1 Ma, yang urus parkara agama Yahudi dong tu, sonde ada pung hak ko hukum mati orang. Andia ko dong bawa sang Yesus pi mangada sang gubernor dari pamarenta Roma di situ, andia Pilatus. Dong mau ko gubernor yang hukum sang Dia.
2 Jadi, sampe di gubernor pung muka, ju dong kasi tau Yesus pung sala-sala dong, bilang, “Ini orang ni, tukang lawan pamarenta Roma. Dia ajar, bilang, orang jang bayar pajak kasi pamarenta. Dia ju angka diri bilang dia ni, Kristus, orang Yahudi pung raja.”
3 Dengar bagitu, ju gubernor tanya sang Dia, bilang, “Batúl, ko? Lu ni, orang Yahudi pung raja, ko?”
Tarús Yesus manyao, bilang, “Batúl. Sama ke pak omong tu.”
4 Pareksa abis, ju gubernor mangada itu kapala agama pung bos-bos deng itu orang banya. Ais dia bilang, “Bagini. Beta sonde dapa ini Orang pung sala sadiki ju.”
5 Ma dong batahan, bilang, “Sonde, pak gub. Ini orang pi ajar di mana-mana, tusu-tusu rakyat ko marontak. Dia bekin kaco mulai dari propinsi Galilea sampe di kota Yerusalem sini.”
Gubernor kirim Tuhan Yesus pi raja Herodes
6 Dengar bagitu ju, gubernor tanya sang dong, bilang, “Kalo bagitu, dia ni, orang Galilea, ko?”
Ju dong manyao, bilang, “Batúl, Pak. Dia dari Galilea!”
7 Dapa tau bagitu ju, gubernor kirim sang Yesus pi mangada sang raja Herodes, yang parenta propinsi Galilea. Itu waktu, dia ada di kota Yerusalem.
8 Naa, raja Herodes su dengar banya carita so'al Yesus, deng dia su kapingin lia sang Yesus dari dolu. Dia ada harap-harap ko bisa lia Yesus kasi tunju satu-dua tanda heran. Andia ko, waktu dong antar Yesus pi sang dia, dia pung hati sanáng.
9 Ju dia tanya macam-macam hal sang Yesus, ma Dia sonde manyao apa-apa.
10 Herodes masi ba'omong deng Yesus, ma kapala agama pung bos-bos deng guru agama dong mulai tudu ulang lai Yesus pung sala macam-macam.
11 Ais raja Herodes deng dia pung tantara dong mulai iko ejek deng olok-olok bekin hina sang Yesus. Ju dong kasi pake sang Dia satu baju bagus sama ke raja dong biasa pake, ais dong ejek tarús. Abis, dong kirim pulang sang Dia pi gubernor Pilatus.
12 Dolu, itu gubernor deng raja Herodes bamusu. Ma mulai itu hari dong dua basobat.
Gubernor kasi jato hukum mati sang Tuhan Yesus
(Mateos 27:15-26; Markus 15:6-15; Yohanis 18:39—19:16)
13 Abis ju, gubernor Pilatus pange itu kapala agama Yahudi pung bos-bos deng tua-tua adat laen dong, sama-sama deng itu orang banya, ko datang bakumpul dengar dia pung putusan.
14 Dia omong, bilang, “Bosong bawa Yesus datang sang beta, deng tudu sang Dia, bilang, Dia suka tusu-tusu rakyat ko malawan pamarenta Roma. Beta su pareksa sang dia alus-alus di bosong pung muka, ma beta sonde dapa Dia pung sala apa-apa.
15 Raja Herodes su pareksa sang Dia lai, ma sonde dapa Dia pung sala apa-apa ju. Andia ko dia kirim kambali ini Orang sang beta. Ini Orang sonde ada pung sala apa-apa, jadi beta sonde bisa hukum mati sang Dia.
16 Jadi, beta mau putus bagini: beta suru firuk sang Dia, abis beta lapás sang Dia.”
17-18 Dengar bagitu, ju dong mulai batarea rame-rame, bilang, “Sonde bisa! Bunu sang Dia. Lapás sang Barabas sa.”
[Dong batarea bagitu, tagal tiap taon kalo orang Yahudi dong bekin pesta Paska, gubernor biasa lapás satu orang bui iko dong pung mau.]
19 (Barabas ni, maso bui tagal dia jadi tukang kipas, marontak lawan pamarenta Roma di kota Yerusalem, deng dia ju bunu orang.)
20 Ma gubernor mau lapás sang Yesus. Jadi dia tanya ulang sang orang banya dong, bilang, “Karmana kalo beta lapás sang Yesus ni?”
21 Ma dong samua batarea rame-rame, bilang, “Sonde! Paku bekin mati sang Dia di kayu palang sa! Paku bekin mati sang Dia di kayu palang!”
22 Ma gubernor rasa itu sonde batúl, ais dia tanya ulang lai kali yang katiga, bilang, “Akurang ko beta musti paku bekin mati sang Dia bagitu? Dia pung jahat apa? Beta su pareksa sang Dia, ma beta sonde dapa satu alasan juga ko mau hukum bekin mati sang Dia. Jadi, biar ko beta suru firuk sang Dia sa, abis lapás sang Dia.”
23 Ma itu orang samua batarea lebe kuat lai, ko paksa mau paku bekin mati sang Dia di kayu palang. Ahirnya, gubernor sonde bisa tahan,
24 ju dia putus iko dong pung mau sa.
25 Ais dia lapás sang Barabas, yang tukang marontak deng tukang bunu orang tu. Ma dia sarakan Yesus pi dong pung tangan, ko biar dong bekin sang Dia iko dong pung mau.
Dong paku tagantong sang Tuhan Yesus di kayu palang
(Mateos 27:32-44; Markus 15:21-32; Yohanis 19:17-27)
26 Ais itu, dong hela bawa sang Yesus kaluar dari kota Yerusalem. Di tenga jalan dong katumu satu orang yang baru datang dari kota Kirene. Dia pung nama Simon. Dong paksa sang dia ko pikol ganti Yesus pung kayu palang, ais jalan iko Yesus pung balakang.
27 Itu hari, banya orang datang iko manonton sang Yesus. Ada ju mama-mama yang manangis makarereu sang Dia.
28 Dengar dong manangis bagitu, ju Yesus mangada sang dong, abis omong, bilang, “We! Mama-mama dari Yerusalem. Sonde usa manangis kasi Beta. Lebe bae manangis kasi bosong pung diri sandiri, deng bosong pung ana-ana dong.
29 Te nanti beso-lusa susa bésar mau datang, sampe orang omong, bilang, ‘Parampuan yang paling barontong, andia parampuan yang sonde parná barana, deng yang sonde parná kasi susu ana mera.’
30 Waktu itu susa bésar datang, orang dong sangsara mo mati, sampe dong minta, bilang, ‘Lebe bae, gunung-gunung rubu datang ko tendes ame sang botong su!’ Dong ju omong, bilang, ‘Deng sangsara bagini, lebe bae bukit-bukit kubur ame sang botong su!’
31 Naa, kalo orang bisa bekin susa bagini buat orang yang sonde ada pung sala, apalai deng orang jahat?”
32 Waktu tantara dong bawa sang Yesus tu, dong ju hela bawa dua orang jahat ko mau hukum bekin mati sama-sama deng Dia.
33 Dong sampe di satu tampa, nama ‘Tulang Kapala’. Ju dong paku sang Yesus deng itu dua orang jahat di dong satu-satu pung kayu palang. Ais dong tanam kasi badiri itu kayu palang dong. Dong gantong orang jahat satu di Yesus pung sablá kanan, deng yang satu lai di Dia pung sablá kiri.
34 [Itu waktu, Yesus sambayang, bilang, “Bapa! Lupa buang ini orang dong pung sala, te dong sonde tau apa yang dong bekin.”] Abis ju, tantara dong hela lot ko mau tau sapa yang dapa Dia pung pakean.
35 Banya orang datang manonton di itu tampa. Orang Yahudi pung bos-bos dong olok-olok sang Yesus, bilang, “Dia su kasi salamat orang laen, ma sonde bisa kasi salamat Dia pung diri sandiri. Kalo Dia ni batúl-batúl Kristus, yang Tuhan Allah su pili memang, na, tenga ko Dia turun sandiri dari itu kayu palang suda.”
36 Itu tantara dong ju ejek sang Dia. Dong kasi minum sang Dia anggor asam,
37 deng batarea olok-olok, bilang, “Kalo lu ni batúl-batúl orang Yahudi pung raja, na, kasi salamat lu pung diri suda!”
38 Dong tulis di satu papan, bilang,
“Ini orang Yahudi pung raja.”
Tarús dong paku itu papan di Yesus pung atas kapala, ko kasi tau alasan dong hukum sang Dia.
39 Satu orang jahat yang paku tagantong di Yesus pung sablá ju iko ejek, bilang, “Lu batúl Kristus, ko? Kalo bagitu, na, kasi salamat sang kotong samua su!”
40 Ma itu orang jahat satu togor sang dia, bilang, “Weh! Lu ni, sonde taku sang Tuhan Allah, ko? Te lu ju dapa hukum mati sama ke Dia.
41 Kotong dua kaná hukum pas deng kotong pung jahat. Ma ini Orang sonde bekin jahat apa-apa.”
42 Ju dia omong tamba, bilang, “Yesus, é! Nanti kalo Pak su maso pi Pak pung karaja'an, na, inga sang beta, é.”
43 Yesus manyao, bilang, “Beta janji! Ini hari ju, lu maso pi dalam sorga sama-sama deng Beta.”
Tuhan Yesus mati
(Mateos 27:45-56; Markus 15:33-41; Yohanis 19:28-30)
44-45 Itu waktu, su tenga hari. Ma matahari sonde bacaya, ais galáp gulita tutu ame itu tampa sampe jam tiga sore. Di Ruma Sambayang Pusat ada gorden bésar yang tagantong ko pele Tuhan Allah pung Kamar yang Paling Barisi. Takuju sa, itu gorden tarobe putus bagi dua.
46 Di Golgota, ju Yesus batarea, bilang, “Bapa! Sakarang Beta sarakan Beta pung roh pi di Bapa pung tangan.” Dia omong abis bagitu, ju Dia pung napas putus memang.
47 Ada komandán tantara Roma yang badiri deka di Yesus pung kayu palang. Waktu dia lia Yesus pung mati tu, ju dia puji Tuhan Allah, bilang, “Waa! Ini Orang batúl-batúl Orang hati lurus, ó!”
48 Waktu orang banya yang bakumpul di situ dapa lia Yesus pung mati ju, dong manyasal, ais pulang deng hati susa.
49 Ma Yesus pung orang dong ada badiri dari jao, ko lia Dia pung mati. Mama-mama yang iko sang Dia dari Galilea sampe di Yerusalem, ju ada di situ.
Dong kubur sang Tuhan Yesus
(Mateos 27:57-61; Markus 15:42-47; Yohanis 19:38-42)
50-51 Waktu Yesus su mati ju, ada satu orang cari jalan ko mau kasi turun Dia pung mayat dari kayu palang. Dia pung nama Yusuf, dari kota Arimatea. Dia pung hati lurus, bekin banya hal yang bae. Dia ada tunggu-tunggu ko Tuhan Allah kasi tunju Dia pung pegang parenta. Dia ju anggota yang dudu urus parkara agama Yahudi, ma dia sonde satuju deng dong pung putusan ko hukum mati sang Yesus.
52 Tagal dia mau kasi turun Yesus pung mayat dari kayu palang, dia pi mangada sang gubernor Pilatus ko minta mau urus itu mayat.
53 Dapa isin ju, dia pi kasi turun. Ais dia bungkus itu mayat deng kaen alus. Tarús dia pi taro itu mayat dalam satu lobang batu, yang orang baru pahat abis. Itu tampa kubur tu, balóm ada yang pake.
54 Yesus pung mati tu, kaná deng hari Jumat. Waktu Yusuf dong su kubur abis tu, hari su sore. Kalo matahari su tanggalám, na, orang Yahudi pung hari sambayang su mulai.
55 Itu mama-mama yang datang sama-sama deng Yesus dari Galilea, dong ju pi iko sang Yusuf ko mau tau dia taro itu mayat di kubur mana.
56 Lia bae-bae itu kubur pung tampa, ais itu mama dong pulang ko sadia rampe deng minya wangi. Waktu matahari tanggalám, ju dong barenti karjá, iko orang Yahudi pung atoran hari sambayang. Dong tunggu hari sambayang lewat, baru dong mau pi siram Yesus pung mayat.