12
आल थिचा चिक्शो मीश मुर
1 मिनु गो सरीङमी ठेयब चिन्ड का ताता। मेको चिन्ड दोदेंब बाक्त देंशा हना, मीश मुर का नां फेक्सीशा, तास्ला तारी राप्शो बाक्त। मेको आ पियामी १२ ओटा सोरुल के सिरपेच गुप्शो बाक्त।
2 मिनु मेकोमी कोव़ज कुरशो बाक्त। मोपतीके सुत्केरी रोइम श्येत जशा, आल थिचा कली ग्रीशो बाक्त।
3 मिनु गो सरीङमी अर्को चिन्ड का ताता। मेको चिन्ड दोदेंब बाक्त देंशा हना, ठेयब लल बुस्स का बाक्त। मेको बुस्स के ७ ओटा पिया नु १० ओटा ग्रोव़ बाक्तेक्म। आ ७ ओटा पियामी ७ ओटा मुकुट गुप्शो बाक्त।
4 मेको आ मीलुमी सरीङ ङा सोरुल भाग सां ङा भाग का कीशा, रागीमी तोक्तीमी। मिनु मेको ठेयब बुस्स मेको आल थिचशो मीश मुर आ ङोंइती राप्शा, आ आल ब्वचा कली रिम्शा बाक्त। दानीएल ८:१०
5 मिनु मेको मीश मुरुमी वोंइश आल का थित। मेको वोंइश आल नोले रागी ङा मुर आन कली फलाम के कोक्केमी सासन पाइब दुम्ब। मिनु परमप्रभु यावे आ स्वर्ग ङा गेय पाइबपुकीमी मेको वोंइश आल कली परमप्रभु यावे आ ठेयब नित्तीकेम लाइश्शा वोइक्तेक्म। भजन संग्रह २:९
6 मिनु मेको मीश मुर आल थिशा नोले गोरशो रागीमी प्रोक्त। मेकेर परमप्रभु यावेमी बाक्तीके ठीक पशो बाक्त। मिनु मेको कली हजार का सहे निक्शी ६० नाक्त थुल्तेक्म। प्रकाश ११:३
7 मिनु नोले स्वर्गमी परमप्रभु यावे आ ठेयब स्वर्ग ङा गेय पाइब मिकाएल माइश्शो नु आ गेय पाइबपुकी गारशा, ठेयब बुस्स नु आ गेय पाइबपुकी नु लडाइ पथ लाम्तेक्म।
8 मिनु ठेयब बुस्स आ गेय पाइबपुकी लडाइ पा ब्रुम्तेक्म। मिनु नोले मेको ठेयब बुस्स नु आ गेय पाइबपुकीमी स्वर्गमी बाक्तीक मथिदेम। उत्पत्ती ३:१
9 मिनु मेको ठेयब बुस्स आ नें मार बाक्त देंशा हना, माइत बुस्स, दियाबलस, सैतान बाक्त। मिनु मेको रागी रागी नेल्ल ङा मुर आन कली पाप पपाइक्चा कली रागीमी तोक्चा पुंइसीशो बाक्त। मिनु मेको आ गेय पाइबपुकी यो रागीमी तोक्चा पुंइसीशो बाक्तेक्म। प्रकाश २०:२; उत्पत्ती ३:१; लूका १०:१८
10 मिनु गो सरीङमी ठेयब सेंदा का नेंता। मिनु मेको सेंदामी “मुल थमा सुइक्ब आन कली आन पाप रे ब्रोंइतीके जाक्ने थुम्तु। आंइ परमप्रभु यावे आ सक्ति तांइसाक्व नु आ ख्रीस्त आ अधिकार जाक्त। मारदे हना थमा सुइक्ब आन कली दोस गेब रागीमी तोक्चा पुंइसाक्व। मेकोमी नाक्दो नाक्त इं परमप्रभु यावे आ ङोंइती आंइ लोक्ब आन कली दोस गेशो बाक्त। प्रकाश ११:१५
11 मिनु थमा सुइक्बपुकीमी सैतान कली ग्राशो बाक्तेक्म। दोपा सैतान कली ग्राशो बाक्तेक्म देंशा हना, पाठा आ हुश चढ़ेशोमी नु आन सांकछी आन पतीके सैतान कली ग्राशो बाक्तेक्म। मेकोपुकीमी आंम कली ममिम्थु, येसु ख्रीस्त आ पर्बम साइक्चा पुंइसीचा यो महिंम। प्रकाश ७:१४; प्रकाश ६:९
12 मोपतीके स्वर्ग नु स्वर्गमी बाक्ब नेल्ल ग्येरसीन। तन्न रागी नु समुन्द्रम श्येत दुम्चाप्तु। मारदे हना सैतान थाम्पा गाइश्शा, रागी नु समुन्द्रम यित। मारदे गाइक्ताक्व देंशा हना, मुल आ गेय पचा शुश नाक्त मली, दे तुइक्ताक्व” देंशो नेंता।
13 मिनु मेको ठेयब बुस्सुम आंम कली रागीमी तोक्शो तशा, मेको वोंइश आल थीब मीश मुर कली “साइक्नुङ” दे खेदा पाप्तु।
14 मिनु मेको मीश मुरुमी ठेयब ककाकुली आ फ्रां निक्शी ताक्तु। मारदे ताक्तु देंशा हना, मेको ठेयब बुस्स रे ब्रोंइशा, गोरशो रागीमी बेरशा, प्रोक्चा कली ताक्तु। मेको गोरशो रागीमी परमप्रभु यावेमी आ दाक्ची ना सम्म मेकेर थुल्शो बाक्त।
15 मिनु मेको ठेयब बुस्सुमी “मेको मीश मुर कली योल्दल” दे आ शोव़ रे खोला खोदेंशो पा शुश ब्वाक्कु ग्रुंइताक्व।
16 रागीमी चहिं मेको मीश मुर कली वारच पाप्तु। दोपा वारच पाप्तु देंशा हना, रागी आ शोव़ पाक्शा, मेको ठेयब बुस्स आ शोव़ रे ग्रूशो खोला कली दाक्तु।
17 मिनु मेको ठेयब बुस्सुमी मीश मुर प्रोक्शो तशा, गाइश्शा, मेको मीश मुर आ चच युइ नु राम्शी पथ लत। आ चच युइ चहिं सु नम देंशा हना, परमप्रभु यावे आ शेंशो लोव़ टीब नु येसु कली थमा सुइश्शा, आ लोव़ पाइब नम।
18 मिनु मेको ठेयब बुस्स समुन्द्र आ नेक्था राप्शा, रिम्शा बाक्त।