26
Devit ga pit iakan ra ninge.
1 Snd 20:7; Hb 10:23Watong, hinawas palai bia iau pai gil ta sakena,
kanong iau te lon haruat ma ira bilbilai ing i kis tano balagu.
Iau te nurnur tano Watong
ma iau pai la lilik airuo.
2 Nng 139:23Watong, nes mur iau ma nu walar iau.
Silihe no nugu lilik ma no balagu mah.
3 Kanong warah no num harmarsai i la kis hatika taar menalua tagu,
ma iau la lalon ta ira num ngaas i tutun.
4 Nng 1:1Iau pai la kiskis tika ma ira ut na harabota,
ma pa ni haan tika mah ma ira ut na harababo.
5 Nng 31:6; 139:21Iau malentakuane ira kis hulungai ta ira ut na gil nironga,
ma iau malok bia ni kis tika ma ira ut na sakena.
6 Iau taptapir wara hamines bia iau pai gil ra sakena.
Iau ni hanuat kaia tano num suuh na tun hartabar, Watong,
7 Nng 9:1ma ni kakongane hatamat hani ira garam,
ma ni hinhinawas haan ta ira num tamat na melmel na gingilaan na kinarup.
8 Nng 27:4Iau sip no hala nong u la kiskis tana, Watong,
iakano sibaan nong no num minamar i la kiskis tana.
9 Nng 28:3Waak u kap se tar iau tika ma diet ira ut na sakena.
Waak u kap se tar no nugu lon tika ma ira ut na hinarubu bingibing,
10 ing ira lima diet i pingit sakena tupas ira mes,
ma ing ira kata na lima diet i hung ma no magingin na kukul ari wara gilgil sakena.
11 Iesen iau, iau mur ira takodasiana ngaas.
Kul halangalanga iau ma nu marse iau.
12 Nng 40:2; 22:22Ira kakigu i tur dadas taar tano malahena pise.
Narako tano tamat na kis hulungai, iau ni pirlat no Watong.