76
A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Asap ga pit iakan ra ninge na lotu.
1 Ares Iudeia diet nunure ne God.
No hinsana i tamat saakit ares Israel.
2 Nng 27:5; Stt 14:18No uno palpalih ie kenam Ierusalem.
No uno taman ie kenam Saion.
3 Nng 46:9Kaia ga warat ira lulungo na rumus ing di lalapot me,
ira bahbahit ma ira wise, ma ira linge na hinarubu.
4 No minamarim i murarang palai.
Mehet nas no num dadas ing u ga ubu ira num ebar aram ra uladih.
5 Ais 10:12Ira dadas na umri diet ga noh bia taar um,
diet ga kubaba saakit.
Ma taie tikai ta ira umri pa ga tale bia na harubu baling um.
6 KBk 15:1,21God ta Iakop, no mamahien ta ira num nianga na harboor
ga harsomane ira hos ma ira umri diet kisi tar ira hos, kaik diet te noh na minaat.
7 1Sto 16:25Augu sen mon nong da burte ugu.
Pai tale bia tikai na tur menalua taam ing u ngalngaluan.
8 Meram ra ula mawe u ga hinawas tano harpidanau,
ma no ula hanuo ga burut ma ga kis matien,
9 ing augu, Watong, u ga taman tut wara gil harkurai
waing nugu halon diet bakut tano ula hanuo ing di haliare diet.
10 KBk 9:16; Rm 9:17A tutun bia ira tunotuno diet la ngangar wara hinarubu, iesen i la hatahuat pirhakasing tupas ugu.
Ma u la bulbul tikane diet ing diet pa ga hiruo.
11 Sav 5:4-6I tahut bia muat na pakile haruatne ira numuat kunubus uram hono Watong no numuat God.
Ma i tahut bia ira mes na matanaiabar ta ira hanuo hutet ta muat,
diet na kap hawaat ra hartabar uram ho Nong da burtei.
12 I kutus no lon na latlaat ta ira ut na gil harkurai.
Ira king tano ula hanuo diet burtei.