112
1 Pirlat no Watong.
A haraidaan na kis tano tunotuno nong i burte no Watong,
aie nong i manga kanakana mah ta ira uno hartula.
2 Ira natine diet na dadasina tunotuno ta ira tamtaman.
Ma ira ut na takodas ta iakan ra pakana bung, diet na kap ra haraidaan.
3 No uno hala i hung ma ra haleng kinewa saakit,
ma ira uno takodasiana magingin i kis hatika taar.
4 A lulungo i bulo sare no kankado wara gaena no ut na takodas.
Iakano tunotuno, a ut na harmarsai ie ma i la gilgil ira bilbilai.
5 Nng 37:21A tahut na hanuat taar ta nong i marse nong i saring ie, ma i manga tabar ie,
ma i pakile mah ira uno pinapalim ma ra taktakodas.
6 Nng 15:5Pai tale tunat bia da gunei.
Da lik kawase hathatikane no ut na takodas.
7 Nng 57:7Pa na burut bia na seer ta sakana hinhinawas.
I tur dadas taar kanong i so tar no uno nurnuruan tano Watong.
8 Nng 27:1; 54:7I balaraan taar ma pa na burut
tuk bia na paas hasur ira uno ebar.
9 2Ko 9:9I te tabar harbasiane ira maris,
ma ira uno takodasiana magingin i kis hatika taar.
No hinsana na tamat ma diet na urur tana.
10 Mt 8:12; Snd 10:28No ut na sakena na nas kaiken ma na ngangar.
Na hatagiris ira ngisena ma na panim laah.
Ira masmasingan tano ut na sakena pa na hanuat tutun.