130
A ninge utano hinahaan uram Ierusalem.
1 Kra 3:55Watong, iau suah tupas ugu ing iau manga tapunuk.
2 2Sto 6:40Watong, hadade no ingagu.
Sa talingaam tano nugu tintaau wara gaiena harmarsai.
3 Ni 6:17Watong, ing bia kana u pakat kawase tar ira magingin sakena,
Watong, sige i tale bia na papas tano num harkurai?
4 KBk 34:7; Jer 33:8,9Iesen no num magingin wara liklik luban ira numehet magingin sakena,
bia mehet na ru ugu.
5 Nng 27:14Iau nanaho utano Watong. Masa, no nugu kidilona nilon i nanaho utana,
ma narako tano uno nianga iau so no nugu nurnuruan.
6 Iau nanaho utano Watong.
Ma no nugu magingin na nanahai huo i manga tamat saakit ta ira ut na harbalaurai tano pise na hala ing diet nahnahe no malaan.
Masa, i manga tamat saakit ta ira ut na harbalaurai ing diet nahnahe no malaan.
7 Ira Israel, muat na kis nanaho ma ra nurnuruan tano Watong,
kanong no uno harmarsai pa na pataam,
ma ira pakana bung bakut i kis taguro taar wara kapkap pukus muat.
8 Rm 3:24; Ep 1:7; Ta 2:14Aie at na kul halangalanga Israel
sukun ira udiet magingin sakena bakut.