1Binata pa ni ĀPO di Moyses a kāna, “Mapaparin ka so tabirnakolo a tolda. As myan so asa poho a kortina a mapīno a tela kan mabondal a bolabola a matatarek so kīta a asol, obi kan mabaya. Mapabordaan sa so sinan parswa a naypanyid dyirad sanay saw.* 2Machita paripariho rokod dan tabo kortina a asa poho kan apat a kayarda so kananaro kan dadwa kayarda so kawobong. 3Mapagsasāip saw dadimaw a kortina a payparinen a asa manaro a kapidāso. As komwan met maparin do dadimaw a kortina. 4Mapaparin ka so pamaosōkan saw a asol a tela a mapaonor do payis naw no tobwan no nasāipaw a kortina do manōmaw a pidāso. 5Mapaparin ka so dadima poho a pamaosōkan a para do asaw a kapidāso a kortina. As komwan met do somaronwaw a pidāso, as kan mapaysalap saw pamaosōkanaw. 6Mapaparin ka pa so dadima poho a sasadyit a balitok, kan maosar sa a pamaytapang so dadwaya napagsasāip a kortina a manglikmot so tabirnakolwaya a mapayparin sya a asa.

7“Mapaparin ka pa so asa poho kan asa panalob a kortina so tabirnakolwaw a naparin do boboh no kalding. 8Kāda asa dyirad dyaya a asa poho kan asa, ki paripariho rokod da. On, kāda asa, ki asa poho kan dadima kayarda so kananaro kan dadwa a kayarda so kawobong. 9Mapagsasāip saw dadimaw a kortina a payparinen a asa manaro a kapidāso. As komwan met do anem saw, ki mapayparin sa a asa kapidāso. Mapaytopid chanem naw a kortina tan maytapid a mapangay anchi do asdepanaw do toldaw. 10Mapaparin ka pa so dadima poho a pamaosōkan a mapaonor do payisaw no tobwan no nasāipaw a kortina do manōmaw a pidāso. As komwan met do asaw a pidāso. 11Sinpangan na, mapaparin ka pa so dadima poho a sasadyit a tombāga, as mapaōsok do pamaosōkan saw tan maytapang saw dadwaya pidāso a mayparin a asa. 12Iyaw sobraw do kanarwanaw no kortina, machibalaybay dananchi do dichodaw no tabirnakolo. 13Iyaw sobraw a godwa a kayarda do maychamibīt naw do kanarwan naw, ki mapabalaybay do payisaw no tabirnakolo tan nawriw mangtalob sya.

14“Mapaparin ka pa so dadwa a panalob so tabirnakolwaya a yapo do lālat saw no malloko a karniro a napanyibaya kan mapakatayhapotan so lālat saw no lombalomba.†

15“Mapaparin ka pa so parey sa a yapo do kayo a akasya a mapatnek a para do tabirnakolo. 16Kāda parey, ki asa poho kan dadima kadapan so kananaro, kan dadwa poho kan papito a polgada so kawobong, 17as kan myan dadwa mayengay a kokod na do kāda parey tan maimoha sa dyirad pangsapatos naw a mapaytatapang sira. Komwan met maparin do tabo kadwan saw a parey. 18Mapaparin ka pa so dadwa poho a parey do mangketaw do abagātan no tabirnakolo, 19kan apat a poho a pirak a pangsapatos. Taydodwa pangsapatos do kāda parey tan igpet naw dadwaw a kokod na. 20Do bīt naw do mangket do ammyānan no tabirnakolo, mapaparin ka so dadwa poho a parey, 21kan apat a poho a pirak a pangsapatos. Taydodwa pangsapatos do kāda parey. 22Mapaparin ka pa so anem a parey do dichodan naw do mangket do lāod no tabirnakolwaw, 23kan mapaparin ka pa so dadwa parey para do dadwaw a panōli na do dichodan. 24Siraw nya dadwa a parey do sōli, ki magdobli sa yapo do ibaba a maypatohos, as maikapet a maganay do tohos a maynamot do asa sinan singsing. Siraw nya dadwa a parey do panōli, ki komwan kaparinan da. 25Dawa, myan wawaho a parey kontodo asa poho kan anem a pirak a pangsapatos. Bāli, dadwa pangsapatos do kāda parey.

26“Mapaparin ka pa so asa poho kan dadima sintas a yapo do kayo a akasya. No dadima, ki para dyirad pareyaw do asaw a bīt na no tabirnakolo. 27No dadimaw, ki para do bīt naw, as kan dadimaw do mamanlāodaw do dichod no tabirnakolwaw. 28Iyaw mamanghobokaw a sintas do hobok daw no parey, ki magderecho a mandad tobwan naw. 29Mapakalopkopan saw pareyaw so balitok, kan mapaparin ka so sinan singsing a balitok a pakaikaptan dan sintas saw. Aran siraw balabat saw, ki pakalopkopan mo so balitok. 30Maipapatnek tabirnakolwaw sigon do plānwaw, ta naipaboya dana dyimo do tokon.

31“Mapaparin ka pa so kortina a maabel do mabondal a bolabola a matatarek so kīta a asol, obi, kan mabaya kan mapīno a tela. Mapabordaan sa so sinan parswa a naypanyid dyirad sanay saw. 32Mapalōdyit kortinaw do sasadyit saw a balitok do apataw a parey a maparin do kayo a akasya. Makalopkopan sas balitok parey saya, kan mapatnek sa do apat saw a pirak a pangsapatos. 33Mapalōdyit kortinaw do sasadyitaw, kan mapangay lakāsanaw no tōlag do dichodanaw no kortina. Iyaw kortinaw, mapaytawa so Masantwanaw a Yanan kan Kasasantwanaw a Yanan. 34Mapadātok tohongaw no pachipakawanan so gatos do Lakāsanaw no Tōlag do Kasasantwanaw a Yanan. 35Do gaganaw no Kasasantwanaw a Yanan, mapangay lamisaanaw do ammyānanaw no tabirnakolo. As mapangay pamadatōkanaw so soho do abagātanaw no tabirnakolo.

36“Do asdepanaw do tabirnakolo, mapaparin ka so kortina a maparin do mabondal a bolabola a matatarek so kīta a asol, obi kan mabaya, kan mapīno a tela, as kan mabordaan do rinayit no rayem. 37As mapaparin ka pa so para do dyaya a kortina so dadima parey a maparin do kayo a akasya a mapakalopkopan so balitok, kan mapangayan so balitok a sasadyit. Mapaparin ka pa so dadima tombāga a pangsapatos siras nya parey.”