1Hozrot Isa hirbar mosido gia hamaila, hono ola eḳ beṭa asil, tar eḳ at bemare hukai gese. 2Tain Zummabare ou beṭare bala ḳoroin ki na deḳar lagi Forishi mozobor ḳoezon manshe tan bae kub kial raḳla, tara saila tan kunu kut bar ḳoria fando falaita. 3Isae ou hukna at-ala beṭare ḳoila, “Oba, hoḳolor samne aia ubao sain.” 4Beṭa aia harle tain hoḳol manshore zikaila, “Sab oḳol, Zummabare kita ḳora zorur, nek kam, na bod ḳam? Zanor hefazot ḳora, na zane mara?” Ikan hunia tara muk bond ḳori boiroila. 5Tarar monor i fashan halot dekia, Isar dilo kub duk hamailo. Tain tarar bae saia gusa ḳori hou bemari beṭare ḳoila, “Tumar atḳan baṛao.” He tar at baṛaiteu agor laḳan fura bala oigelo. 6Ikan dekiau Forishi oḳol loge loge baroigela, gia Raza Herudor manshor loge milia Isare ḳatol ḳorar foramish ḳorla.

7-8Bade Isae tan shagrid oḳolre loia aoror faro gelagi, hono-o bout manush tan ḳore ḳore gela. Tan nanan muzeza ar keramotir ḳobor faia, Ehudia zila, Galil, Zeruzalem, Idum, Zordan gangor hofar, Shur ar Sidon elaḳa taki ou manush oḳol aisla. 9Manshor biṛ dekia tain shagrid oḳolre ḳoila, “Tumra amar lagi eḳan nao zuit ḳoro, arnae manshe ṭela-dakka ḳaia amar ufre aia foṛiziba.” 10Tain bout bemarire shifa ḳorae bemari manshe tane soita ḳori ṭelia dakkaia aia tan ufre foṛizita. 11Ar zin-but oḳole tane deḳleu tan samne maṭit foṛia soizda ḳoria sillaia ḳoito, “Afneu Allar ḳas maear zon Ibnulla.” 12Oile Isae tarare kub ḳoṛaḳoṛi hukum dita, “Ḳobordar! Tumra amar forisoe zair ḳorio na.”

13Bade Hozrot Isa faṛor ufre gelagi, gia tan fosond ḳora kisu shagridre tan ḳandat ḍaḳaia nila. 14-15Era aia harle erar maz tone barozonre tain alog korla, era zanu tan loge loge roin, ar zin-but saṛanir ḳemota dia erare toblig kamo bezita faroin. Ou barozon oila tan sahabi. 16Tain Saimonor noea nam raḳla Fitor. 17Zibudiar dui fua Iakub ar Hannan, tain erar noea nam dila Bunergosh, mani megor ḍaḳor fua. 18Andrias, Filif, Bortolmoe, Moti, Tumas, Alfir fua Iakub, Toddey, muktizudda Saimon, 19ar Ihuda Iskariat, ou Ihudae bade beimani ḳoria Isare dushmonor ato doraia disil.

20Hozrot Isa eḳ baṛit gela. Ono aiao oto beshi manshe biṛ bandila, biṛor lagi Isae ar sahabi oḳoleo ḳana ḳaita farla na. 21Tan bai-biradore i ḳobor hunia tanre on taki bar ḳori neoat aila, era ḳoila, “Tar to mata ḳaraf oigese.” 22Zeruzalem taki ḳoezon moulana aisla, tara ḳoila, “Zinor bashsha Bel-Sobule tare asor ḳorse. Ou Bel-Sobulor bole he zin-but saṛae.” 23Ikan hunia Isae ou moulana oḳolre daro anaia kichcha dia ḳoila, “Shoetane kila shoetanre ḳedae? 24Kunu deshor bitre doladoli lagi gele i desh to ar ṭike na. 25Oula kunu foribaror mazeo zebla doladoli lagi zae, ou foribaro ar ṭike na. 26Te shoetaneo zudi nizor maze doladoli lagai dey, he-o to ṭikto nae, binash oizibo. 27Ashol hasa ḳota oilo, kunu ḍaḳait ḍaḳatit aia foela ou baṛir bolala mul girostre na bandile, he luṭ-toraz ḳorto farto nae. Oile tare bandia harle luṭ-toraz ḳorto farbo. 28Hunoukka, ami hasa ḳota ḳoiram, manshor tamam nomunar guna ar kufurir mafi ase, 29oile Pak Ruhur befare kufuri ḳorle, kunumonteu i gunar mafi milto nae. I guna ruz hashor forzonto zari roibo.” 30Isar ufre zine asor ḳorse, moulana oḳole ou ḳota ḳoae tain tarare oula zuaf dila.

31Ou shomoe Hozrot Isar ma ar baiain aia bare tone tan gese ḳobor faṭaila. 32Oile sairo galabae manshor biṛ lagail asil, manshe tanre ḳoila, “Huzur, afnar amma ar baiain aia bare afnar tallash ḳorra.” 33Tain ḳoila, “Amar ma ar baiain ḳe?” 34Ḳoia tain sairo galar manshor bae saia ḳoila, “Huno, erau to amar ma ar baiain. 35Zera Allar morzi zugaia soloin, tarau to amar ma, ar bai-boin.”