Barika birana Ala xa
1Sigi sariɲanxina. Tantun bɛtina. Bɛti baane kuntigin xa.
Dunuɲa muxun birin xa sɔnxɔ sɛwani Ala xa!
2Ɛ a xinla binya bɛtin ba!
Ɛ tantun gbeen fi a ma!
3Ɛ a fala Ala xa,
“I ya kabanako wanle magaxu!
I sɛnbɛn gbo han!
Nanara, i yaxune gaxuxin felenxi i bun ma.
4Muxun birin i batuma dunuɲa yi,
e tantun bɛtin ba i xa.
E i xinla tantunma bɛtini.”
Bɛti xuini te.
5Ɛ fa be!
Ɛ a mato Ala bata naxan liga!
A wanle magaxu adamadiine yɛ han!
6A fɔxɔ igen findi nɛn yire yixaren na,
en benbane yi gidi baan tagi e sanni.
Nayi, en xa ɲaxan a tan yi.
7A mangayaan nabama a sɛnbɛni habadan!
A yɛɛn tixi siyane ra,
nanara muxu yo nama murutɛ.
Bɛti xuini te.
8Siyane, ɛ barikan bira en ma Ala xa!
Ɛ a tantun xuini te!
9A bata siimayaan fi en ma,
a mi tin en yi bira.
10Ala i nxu rasariɲanma
sulun tɛɛni alo wure gbetina.
11I a liga nɛn nxu yi suxu,
i mɔn yi goron gbeen sa nxu xun ma.
12I tin nɛn nxu yaxune yi ti nxu fari.
Nxu yi dangu ige tilinxin nun tɛɛni.
Koni, i fa nxu ra dahamu bɔxɔni.
13N fama saraxa gan daxin na nɛn i ya banxini.
N bata dɛ xuiin naxan tongo i xa,
n na rakamalima nɛn.
14Dɛ ti xuini itoe falaxi nɛn
n yi tɔrɔni waxatin naxan yi.
15N sube turaxine bama saraxa gan daxin na nɛn,
n yi kontonne ba,
e tutin yi te kore.
N turane nun kɔtɔne fan bama nɛn.
Bɛti xuini te.
16Ɛ fa be! Ɛ ɛ tuli mati,
ɛ tan naxanye birin gaxu Ala yɛɛ ra.
A bata naxan liga n xa,
n na a falama ɛ xa nɛn.
17N bata a xili malina fe ra,
n yi a batu n dɛ xuiin na.
18Xa hakɛn yi ramaraxi n bɔɲɛni nun,
Marigin mi yi a tuli matima n xuiin na nun.
19Koni Ala yatin bata n namɛ,
a a tuli mati n ma maxandi xuiin na.
20N barikan birama Ala xa
amasɔtɔ a mi a mɛxi n ma maxandi xuiin na.
A mi a hinanna baxi n yii.