Kisin Kiraan Kitabuna

Sɛwana Alaa sariyana fe ra
1Sɛwan na kanne xa
fɛ mi naxanye kɛwanle ra,
naxanye sigan tima Alatalaa sariyan xɔn.
2Sɛwan na kanne xa
naxanye birama a maxadi xuine fɔxɔ ra,
naxanye a fenma e bɔɲɛn ma feu!
3E mi fe ɲaxin ligan mumɛ!
E sigan tima Alaa kiraan xɔn ma.
4Ala, i bata i ya fe ragidixine so nxu yii
alogo e xa suxu ki faɲi.
5A yi lan nun, n sigati kiin xa tinxinɲɛ ayi
alogo n xa i ya tɔnne suxu.
6N na n xaxili lu i ya yamarine birin xɔn ma,
n mi yagɛ mumɛ!
7N na i tantunma nɛn n bɔɲɛ fixɛn na,
n nɛma i ya kiti tinxinxine fe xaranɲɛ.
8N na i ya tɔnne suxuma nɛn.
I nama n nabeɲin mumɛ!
9Banxulanna a kɛwanle rasariɲanma di?
Fɔ a xa i ya falan nan suxu.
10N kataxi
n xa i fen n bɔɲɛn ma feu!
I nama tin n yi i ya yamarine beɲin.
11N bata i dɛ xuiin namara n bɔɲɛni,
alogo n nama yulubin liga i tan na.
12Alatala, n barikan birama i xa.
N xaran i ya tɔnne ma.
13N nan n xuini tema nɛn,
n xɛtɛ i ya kiti saxine ma.
14N sɛwaxin nan i ya maxadi xuine suxuma,
alo n na nafulu gbeen sɔtɔ.
15N na n mirima i ya fe ragidixine ma,
n yi i ya xaranne fɛsɛfɛsɛ.
16I ya tɔnne n kɛnɛnxi.
N mi ɲinanɲɛ i ya falan xɔn ma mumɛ!
17Fe faɲin liga i ya walikɛɛn xa,
alogo n xa lu n nii ra,
n yi i ya falan suxu.
18N yɛɛne rabi
alogo n xa i ya sariyan magaxune to.
19Xɔɲɛn nan n na dunuɲa ito yi!
I nama i ya yamarine luxun n ma.
20A rafan n ma
n xa lu i ya kiti saxine bun waxatin birin.
21I falan tima nɛn muxu dangaxi wasoxine xili ma
naxanye e masigama i ya yamarine ra.
22Marayagin nun maraɲaxun ba n ma,
bayo n bata i ya maxadi xuine suxu.
23Mangane bata e malan n xili ma,
koni n tan i ya walikɛna a mirima i ya tɔnne nan ma.
24I ya maxadi xuine n kɛnɛnxi,
e tan nan n maxadima.
25N saxi burunburunni.
Siimayaan fi n ma,
alo i a falaxi kii naxan yi.
26N bata n ti n kɛwanle ra,
i yi n yabi.
N xaran i ya tɔnne ma.
27N mali n xa i ya fe ragidixine kolon,
alogo n xa n miri i ya kabanako feene ma.
28N niin wugama sɔxɔlɛni.
N nakeli alo i a falaxi kii naxan yi.
29Wulen masiga n na,
i yi n xaran i ya sariyan ma i ya hinanni.
30N bata wa a xɔn, n xa tɔgɔndiya,
n yi tin i ya kiti saxine ma.
31Alatala, n bata bira i ya maxadi xuine fɔxɔ ra.
I nama tin, n yi yagi.
32N biraxi i ya yamarin kiraan fɔxɔ ra.
Amasɔtɔ i bɔɲɛ xunbenla fima n ma.
33Alatala, n xaran i ya tɔnne bunne ma,
alogo n xa e suxu waxatin birin.
34Xaxinla fi n ma,
alogo n xa i ya sariyan suxu n bɔɲɛn ma feu!
35N ti i ya yamarine kiraan xɔn,
amasɔtɔ na n kɛnɛnxi.
36I ya maxadi xuine sa n bɔɲɛni,
alogo n nama bira nafunla fɔxɔ ra.
37N xun xanbi so fe kobine yi,
alogo n xa siimayaan sɔtɔ i ya kiraan xɔn.
38I dɛ xuiin naxan tongoxi i yɛɛragaxu muxune xa,
na rakamali n tan i ya walikɛɛn xa.
39N natanga yagine ma
n gaxuma naxanye yɛɛ ra.
Amasɔtɔ i ya kiti saxine fan.
40N waxi i ya fe ragidixine suxu feni han!
N xa siimayaan sɔtɔ i ya tinxinni.
41Alatala, i ya hinanna xa n li.
N nakisi alo i dɛ xui tongoxi kii naxan yi.
42N xa nɔ n konbi muxune yabideni,
bayo n na n yigi saxi i ya falan nin.
43Tin n xa lu ɲɔndin falɛ waxatin birin,
amasɔtɔ n xaxili tixi i ya kitin nan na.
44N ni i ya sariyan suxuma nɛn waxatin birin,
habadan han habadan.
45N luma nɛn xɔrɔyani,
Amasɔtɔ n ni i ya fe ragidixine suxi.
46N ni i ya maxadi xuine fe falama mangane xa nɛn.
N mi yagɛ na ra mumɛ!
47I ya yamarine n kɛnɛnxi,
e rafan n ma.
48N na n yiine tima i ya yamarine bun ma nɛn,
e rafan n ma.
N yi lu n mirɛ i ya tɔnne ma.
49I xaxili lu i ya falan xɔn ma
n tan i ya walikɛna fe yi,
bayo i bata yigin fi n ma.
50N yi tɔrɔni waxatin naxan yi,
i n madɛndɛn nɛn
amasɔtɔ n bata kisi i dɛ xuiin ma.
51Wasodene n magelema han,
koni n mi i ya sariyan fataxi mumɛ.
52Alatala, n na n mirima i ya kiti saxine ma.
Waxati danguxine yi,
ne nan yi n madɛndɛnma.
53N na muxu ɲaxine to
naxanye e mɛma i ya sariyan na,
n xɔlɔma nɛn han.
54I ya tɔnne findixi bɛti ba xunna nan na n xa,
n xɔɲɛyani dɛnaxan yi.
55Alatala, n na n mirima i ma kɔɛɛn na,
alogo n xa i ya sariyan suxu.
56N gbeen findixi i ya fe ragidixine suxu feen nan na.
57Alatala, n gbeen findixi naxan na,
na ni ito ra,
i ya falan suxu feen na a ra.
58N ni i maxandima n bɔɲɛn ma feu!
Kininkinin n ma,
alo i bata dɛ xuiin tongo kii naxan yi.
59N bata n miri n yɛtɛ kɛɲaan ma,
n waxi bira feni i ya maxadi xuine fɔxɔ ra.
60N ni i ya yamarine suxuma nɛn mafurɛn,
n mi buma.
61Muxu ɲaxine bata lutin nati n yɛɛ ra,
koni n mi ɲinanma i ya sariyan xɔn ma.
62N kelima nɛn kɔɛ tagini i tantundeni
i ya kiti tinxinxine fe ra.
63N xɔyine nan i yɛɛragaxu muxune ra,
e nun naxanye i ya fe ragidixine suxuma.
64Alatala, dunuɲa rafexi i ya hinanna nan na,
n xaran i ya tɔnne ma.
65Alatala, i bata i ya falan nakamali,
i fe faɲin naba n tan i ya walikɛɛn xa.
66N xaran xaxilimayaan nun fe kolonna ma,
amasɔtɔ n laxi i ya yamarine ra.
67Benun n xa tɔrɔ waxatin naxan yi,
n bata yi tantan,
koni iki, n bata i ya falan suxu.
68I fan, i kɛwanle fan!
N xaran i ya tɔnne ma.
69Muxu wasoxine bata wulen sa n xun ma.
Koni i ya fe ragidixine suxi n xɔn ma
n bɔɲɛn ma feu!
70E bɔɲɛne mi fan,
koni i ya sariyana n tan kɛnɛnxi.
71A rafan n ma, n tɔrɔ,
alogo n xa nɔ i ya tɔnne kolonɲɛ.
72I ya sariyan nafan n tan ma
dangu xɛmaan nun gbetin wuli wuyaxin xa.
73I tan nan n daxi,
i yi n namara,
nayi xaxinla fi n ma,
alogo n xa i ya yamarine xaran.
74I yɛɛragaxu muxune sɛwama nɛn
e na n to waxatin naxan yi,
a n laxi i ya falan nan na.
75Alatala, n na a kolon
a i tinxin kiti sadeni.
I n nayagi nɛn amasɔtɔ i tinxin.
76I ya hinanna xa n nii yifan n ma
alo i dɛ xuiin tongoxi
n tan i ya walikɛɛn xa kii naxan yi.
77Kininkinin n ma
alogo n xa lu n nii ra,
amasɔtɔ i ya sariyana n kɛnɛnxi.
78Ala xa muxu wasoxine rayagi,
yo mi naxanye xa,
naxanye n tɔrɔma.
Koni n na n mirima i ya fe ragidixine nan ma.
79Ala xa a yɛɛragaxu muxune maso n na,
naxanye birin i ya maxadi xuine kolon.
80N xa i ya tɔnne suxu n bɔɲɛn ma feu,
alogo n nama yagi.
81Ala, n bata xadan i mamɛdeni n nakisi feen na.
N bata n yigi sa i ya falani.
82N yɛɛne bata bu i yɛɛ ra kira yitoɛ
i dɛ xuina fe ra,
n yi a fala, n naxa,
“I n malima waxatin mundun yi?”
83N bata liga
alo manpaan sa labana tɛɛn xun ma
naxan xaraxi ayi.
Koni hali na,
n mi ɲinanxi i ya tɔnne xɔn.
84N mɔn xa i legeden han waxatin mundun yi?
I na muxune makitima waxatin mundun yi
naxanye n bɛsɛnxɔnyama?
85Muxu wasoxin naxanye mi i ya sariyan suxi
ne bata yinla ge n yɛɛ ra n suxu feen na.
86I ya yamarine birin tinxin.
Muxune n tɔɲɛgɛma, n mali.
87A yi fa luxi ndedi n xa faxa,
koni n mi i ya fe ragidixine rabeɲinɲɛ mumɛ!
88N nakisi i ya hinanni,
alogo n xa i ya maxadi xuine suxu.
89Alatala, i ya falan luma nɛn habadan.
A luma nɛn ariyanna yi habadan.
90I ya tinxinyaan luma nɛn mayixɛtɛne birin xa.
I bata bɔxɔn dɔxɔ a dɔxɔdeni.
A mɔn luma mɛnna nin.
91Seene birin mɔn daxi i ya maragidini han to,
bayo e birin walima i xa.
92Xa i ya sariyan mi yi n kɛnɛnxi nun,
n yi faxama nɛn n ma tɔrɔni.
93N mi ɲinanɲɛ i ya fe ragidixine xɔn mumɛ,
amasɔtɔ i n nakisixi e tan nan xɔn.
94Bayo n ni i ya fe ragidixine fenma,
i tan nan gbee n na, n nakisi.
95Muxu ɲaxine n legedenma n faxa feen na.
Koni n na n ɲɔxɔ luma nɛn i ya maxadi xuine xɔn.
96N bata a kolon danna feen birin ma,
koni i ya yamarin tan dan mi na.
97I ya sariyan nafan n ma han!
N na n mirima a ma fɛriɲɛn gbɛn!
98I ya yamarina n findima xaxilimaan na
dangu n yaxune ra,
bayo a n yii waxatin birin.
99N dangu n karamɔxɔne birin na,
amasɔtɔ n luma n mirɛ i ya maxadi xuine ma.
100Xaxinla naxan n ma
na gbo xɛmɛ fonne gbeen xa,
amasɔtɔ n ni i ya fe ragidixine suxi.
101N bata tondi sigɛ kira ɲaxin birin xɔn,
alogo n xa i ya falan suxu.
102N mi n masigama i ya kiti saxine ra,
amasɔtɔ i tan yɛtɛɛn nan n xaranma.
103I dɛ xuine ɲaxun kumin xa.
104N xaxinla sɔtɔma i ya fe ragidixine nin,
nanara mayifu fe yo mi fa rafan n ma.
105I ya falan findixi kɛnɛnna nan na
n sanna bun ma,
naxan n siga kirani yalanma.
106N dɛ xuiin naxanye tongoxi i xa,
n bata n kɔlɔ
n ne rakamalima nɛn,
n yi i ya kiti tinxinxine suxu.
107Alatala n ma mantɔrɔne bata gbo ayi han.
N nakisi
alo i a fala n xa kii naxan yi.
108Alatala, n ma tantun xuiin nasuxu,
i yi n xaran i ya kiti saxine ma.
109N niin gbalon dɛ waxatin birin,
koni n mi ɲinanma i ya sariyan xɔn.
110Muxu ɲaxine bata lutin nati n yɛɛ ra,
koni n mi n masigama i ya fe ragidixine ra.
111I ya maxadi xuine nan n kɛɛn na habadan,
e tan nan n bɔɲɛn nasɛwama.
112N bata a ragidi n bɔɲɛni
n xa i ya tɔnne suxu, han n faxa.
113Nafigine mi rafan n ma,
koni i ya sariyan tan nafan n ma.
114N yɛ masansan wure lefaan nan i tan na.
N bata n yigi sa i ya falani.
115Ɛ tan fe ɲaxi rabane,
ɛ ɛ masiga n na,
alogo n xa n ma Alaa yamarine suxu.
116N sɛnbɛ so
alo i bata a fala kii naxan yi,
i nama n yigitɛgɛ.
117Findi n yigin na alogo n xa kisi,
n yi i ya tɔnne binya waxatin birin.
118Naxanye e masigama i ya tɔnne ra,
i ne makuyama i ra nɛn,
bayo e yanfan nan tun tima.
119I muxu ɲaxine birin wolima ayi nɛn kurun na,
nanara i ya maxadi xuine rafanxi n ma.
120N bata gaxu i yɛɛ ra,
n xuruxurun.
I ya kiti saxine bata n magaxu han!
121N tinxinna nun sariya kɛndɛn ligama,
i nama n nabeɲin n yaxune yii.
122I ya walikɛɛn xaxili ragidi
a i fe faɲin ligama a xa nɛn,
i nama tin
wasodene xa n ɲaxankata sɔnɔn.
123N yɛɛne bata bu i yɛɛ ra kira yitoɛ n nakisi feen na,
alo i dɛ xui tinxinxin naxan tongo n ma fe yi.
124N suxu i ya hinanni,
i yi n xaran i ya tɔnne ma.
125Xaxinla fi n ma
amasɔtɔ i ya walikɛɛn nan n na,
alogo n xa i ya maxadi xuine kolon ki faɲi.
126Alatala, i ya wanla kɛ waxatin nan ito ra,
amasɔtɔ yamana i ya sariyan kalama.
127Nanara, i ya yamarine rafan n ma xɛma faɲin xa.
128Nanara, n biraxi i ya fe ragidixi tinxinxine fɔxɔ ra.
Mayifu feene mi rafan n ma.
129Kabanako feen nan i ya maxadi xuine ra.
Nanara, n na e suxuma n niin birin na.
130I ya falane nan kɛnɛnna fima,
e tan nan xaxinla fima xaxilitaren ma.
131I ya yamarine xɔnla n suxuma
alo min xɔli gbeen naxan n dɛɛn naxarama.
132I yɛɛ rafindi n ma, i yi kininkinin n ma,
alo i darixi a ligɛ kii naxan yi muxune xa
i xinla rafan naxanye ma.
133N sigati kiin sɛnbɛ so i dɛ xui tongoxine xɔn,
i nama tin fe ɲaxi yo xa n nɔ.
134N xunba ɲaxankatatiine ma,
alogo n xa i ya fe ragidixine suxu.
135I nɔrɔn xa godo i ya walikɛɛn ma,
i yi n xaran i ya tɔnne ma.
136N yɛɛgen minima alo baana,
amasɔtɔ yamaan mi i ya sariyan suxuma.
137Alatala, i tinxin,
i ya kiti saxine fan tinxin.
138I ya maxadi xuine fixi tinxinna nun lannayaan nin.
139N na a to,
n yaxune ɲinanma i fala xuiin xɔn,
na xɔlɔma n ma nɛn han!
140I mi i dɛ xuiin kalɛ mumɛ!
E rafan n tan i ya walikɛɛn ma.
141N mi yatɛxi bonne yɛ,
e bata n naɲaxu,
koni n mi ɲinanma i ya fe ragidixine xɔn.
142I ya tinxinyaan luma nɛn habadan!
Ɲɔndin nan i ya sariyan na.
143Tɔrɔn nun kuisanna bata n yili,
koni i ya yamarine n kɛnɛnxi.
144I ya maxadi xuine tinxin waxatin birin.
Xaxinla fi n ma
alogo n xa siimayaan sɔtɔ.
145N bata n xui ramini i ma n bɔɲɛn birin na.
Alatala n yabi
alogo n xa i ya tɔnne suxu!
146N bata n xui ramini i ma.
N nakisi
alogo n xa i ya maxadi xuine suxu.
147N kurunma i maxandɛ, n mali.
N yigi saxi i ya falan nin.
148N xima n mirɛ i dɛ xui tongoxine ma nɛn.
149Alatala, i hinan.
N xuiin namɛ,
alogo n xa siimayaan sɔtɔ i ya kiti saxin xɔn.
150N nabilinna muxune biraxi fe ɲaxine fɔxɔ ra,
e yi e masiga i ya sariyan na.
151Koni i tan Alatala, i maso n na.
Ɲɔndin nan i ya yamarine birin na.
152N na a kolon xabu waxati xunkuye
a i ya maxadi xuine luma nɛn habadan.
153Ala, n ma tɔrɔn mato i yi n xunba,
amasɔtɔ n mi ɲinanxi i ya sariyan xɔn.
154N xun mayɛngɛ kitin sa,
i yi n xunba,
n yi siimayaan sɔtɔ
alo i a falaxi kii naxan yi.
155Muxu ɲaxine tan mi kisima,
amasɔtɔ e mi biraxi i ya tɔnne fɔxɔ ra.
156Koni Alatala, i ya kininkininna gbo,
n xa siimayaan sɔtɔ i ya kiti saxine xɔn.
157N yaxune wuya
naxanye n bɛsɛnxɔnyaxi,
koni n mi i ya maxadi xuine beɲinma.
158N na i ya fala suxutarene to,
na n xɔlɔma nɛn.
159Alatala, a mato i ya fe ragidixine rafan n ma,
n xa siimayaan sɔtɔ i ya hinanni.
160Ɲɔndin nan i ya falan birin na.
I ya kiti tinxinxine luma nɛn habadan!
161Mangane bata n ɲaxankata fu,
koni n gaxuma i tan nan keden ma fala yɛɛ ra.
162N sɛwaxi i dɛ xui tongoxine fe ra,
alo n na nafulu gbeen sɔtɔ.
163Wulen mi rafan n ma,
koni i ya sariyan nafan n ma.
164N ni i tantunma nɛn
dɔxɔɲa ma solofere lɔxɔ yo lɔxɔ
i ya kiti tinxinxine fe ra.
165Bɔɲɛ xunbeli gbeen na kanne xa
i ya sariyan nafan naxanye ma,
sese mi na kanne ratantanɲɛ.
166Alatala, n yigi saxi i tan nan ma marakisi yi,
n luma nɛn i ya yamarine suxɛ.
167N na i ya maxadi xuine suxuma nɛn n niin birin na,
bayo e rafan n ma ki faɲi.
168N bata i ya fe ragidixine
nun i ya maxadi xuine suxu,
i n kɛwanle birin kolon.
169Alatala, n ma mawuga xuiin xa i li.
Xaxinla fi n ma
alo i a falaxi kii naxan yi.
170I tuli mati n ma maxandi xuiin na,
i yi n nakisi
alo i bata dɛ xuiin tongo kii naxan yi.
171N ni i tantunma nɛn waxatin birin,
amasɔtɔ i bata n xaran i ya tɔnne ma.
172N bɛtin bama nɛn
lan i dɛ xui tongoxina fe ma,
amasɔtɔ i ya yamarine birin tinxin.
173N mali i sɛnbɛn nin,
amasɔtɔ n bata i ya fe ragidixine nan sugandi.
174Alatala, i ya marakisin xɔnla n na!
I ya sariyana n kɛnɛnxi.
175N xa siimayaan sɔtɔ
alogo n xa i matɔxɔ,
i ya kiti saxine yi n mali.
176N bata tantan kiraan ma
alo yɛxɛɛn naxan lɔxi ayi.
Fa n tan i ya walikɛɛn fen,
amasɔtɔ n mi ɲinanxi i ya yamarine xɔn.