Rut - Aceh Bible - Old Testament / Ruth-3

Chapter 3

1 Na meupadub na treb teuma óh lheuehnyan, Naomi geupeugah ubak Rut, "Ulôn harôh lôn useuha mangat gata meuteumé tameurumoh tangga lom dan mubahgia.
2 Gata takeureuja meusajan deungon ureuëng inong diblang Boas, bukon? Ingat, Boas nyan na kheueh syedara geutanyoe. Sabab nyan, gata deungoe kheuehnyoe! Bak malamnyoe gobnyan teuma geujak ceumeulo ubak jambo pui teumpat gandom gobnyan teutamon di blang geuh.
3 Tajak manoe kheueh laju, taboh kheueh laju minyéuk mangat bée dan tasok kheueh peukayan gata nyang paleng lagak. Laju gatajak ubak teumpat Boas di teumpat geuh meukeureuja nyang teungoh geuceumeulo gandom nibak mu jih. Gata preh kheueh gobnyan disinan sampoe gobnyan seuleusoe geumakheun, teuma bék sampoe geuteupeue bahwa gata na disinan.
4 Gata ngieng kheueh dipat teumpat gobnyan éh. Meunyoe gobnyan ka geuteungéuet, tapeurab kheueh laju ubak gobnyan dan gata buka laju ija silimbot gobnyan, laju gata-éh nibak gaki gobnyan. Eunteuk gobnyan teuma geubri tée bak gata peue nyang harôh gata peubuet."
5 "Gét, Mak," geujaweueb lé Rut, "ulôn teuma lôn peubuet banmandum nyang ka Mak peugah."
6 Dan geujak kheueh laju Rut u teumpat ureuëng meukeureuja nyang teungoh jilo gandom mangat leukang nibak mu jih. Disinan gobnyan geupeubuet banmandum nyang geupeugah lé mak tuwan geuh.
7 Óh ka seuleusoe Boas geupajoh bu, gobnyan ka meurasa puih dan até geuh pi ka mangat. Laju gobnyan geujak éh to ngon aneuk gandom nyang meutamon. Deungon seungab-seungab Rut teuka ngon geupeurab ubak gobnyan laju geubuka ija seulimbot Boas dan geupeureubah laju droe geuh nibak gaki gobnyan.
8 Watée teungoh malam hana teusangka-sangka Boas teujaga nibak teungeut dan geukeuneuk balék badan geuh. Gobnyan keubit that teukeujot bak watée geungieng na sidroe ureuëng inong ka teu-éh nibak gaki geuh.
9 "Soe ureuëng nyoe?" geutanyong lé Boas. "Ulôn Rut, Pak!" seuôt Rut. "Bapak na kheueh keuluarga kamoe nyang paleng to nyang harôh meutanggong jaweueb ateueh udeb ulôn. Rila kheueh Bapak neucok ulôn jeuet keu peurumoh Bapak."
10 "Seumoga TUHAN geubri beureukat ateueh gata, hai aneuëk ulôn," geupeugah lé Boas. "Teubandeng deungon peue nyang gata peubuet ateueh mak tuwan gata, teuma buet gata nyang jinoenyoe ka teutunyok cinta nyang paleng raya. Gata jeuet mantong tamita lakoe lamkawan ureuëng kaya atawa ureuëng gasin, teuma hainyan hana gata peubuet.
11 Lé sabab nyan, bék kheueh gata khawate, Rut, banmandum nyang lakéenyan teuma ulôn peubuet; sabab mandum ureuëng nyang na di banda nyoe ka jiteupeue bahwa gata na kheueh sidroe ureuëng inong nyang gét budo.
12 Keubiet beutôi that, ulôn harôh meutanggong jaweueb ateueh udeb gata, sabab ulôn na kheueh keuluwarga gata nyang paleng tô. Teuma mantong na sidroe teuk ureuëng nyang paleng meutanggong jaweueb u ateueh udeb gata. Dan gobnyan na kheueh keuluarga nyang leubeh to nibak ulôn.
13 Malam nyoe gata tinggai mantong disinoe. Singoh beungoh ulôn tanyong peu kheueh jihnyan jitem meutanggong jaweueb ateueh gata atawa hana. Meunyoe jihnyan jitem, bah kheueh; teuma meunyoe jihnyan hana jitem, teuma ulôn meujanji deumi Po teu Allah nyang udeb, ulôn teuma lôn peubuet tanggong jaweueb nyan. Jinoenyoe ta-éh kheueh mantong disinoe sampoe beungoh uroe."
14 Dan geuéh kheueh Rut disinan to ngon gaki Boas. Óh singoh beungoh suboh mantong reuneue-reuneue, Rut ka geubeudôh mangat bék jingieng lé gob. Sabab Boas hana geutem meusidroe ureuëng pi bahwa Rut na teuka u teumpat nyan.
15 Geupeugah kheueh lé Boas ubak Rut, "Gata sut laju ija sawak gata dan gataleueng laju." Teuma Rut laju geuploh ija seulendang geuh dan laju geuleueng Boas laju geuro u dalam ija sawak nyan na kira-kira dua ploh kilo gram gandom. Laju gandom nyan geubeuôt u ateueh baho Rut. Óh ka lheueh nyan Boas laju geujak u banda.
16 Óh watée katrok geuwoe Rut u rumoh, laju geutanyong lé mak tuwan geuh, "Peue nyang ka teujadi, hai aneuëk?" Dan Rut laju teuma geucalitra banmandum nyang geupeubuet lé Boas keu gobnyan.
17 "Dan," geupeugah lé Rut lom, "bahpi gobnyan nyang ka geubri gandomnyoe keu ulôn, sabab geupeugah lé gobnyan bahwa ulôn hana jeuet ulôn woe ubak Mak ngon jaroe nyang soh."
18 Laju geupeugah lé Naomi, "Tapreh mantong, hai aneuëk, sampoe gata tangieng pakriban keuneuleuh jih teuma. Boas hana seungab sigohlom peukaranyoe seuleusoe geupeubuet nibak uroenyoe cit teuma."