1 Samuel - Aceh Bible - Old Testament / 1Samuel-14

Chapter 14

1 Bak siuroe Yonatan geupeugah ubak aneuëk muda nyang ba sinjata gobnyan, "Boh jak tajak, geutanyoe tateuka ubak pos Filistin di meurandeh jéh!" Teuma gobnyan hana geulakée idhin ubak bapak geuh.
2 Bak watéenyan Raja Saul teungoh geudong dimiyueb bak geulima di Migron, hana padubna jiôh nibak Gibea. Rakyat nyang seutôt gobnyan na kira-kira 600 droe le jih.
3 (Teungku imeum nyang ba Efod na kheueh Ahia aneuëk Ahitub, nyan kheueh syedara Ikabod aneuëk Pinehas, dan Pinehas nyan aneuëk Eli, teungku imeum TUHAN di Silo.) Meunan cit dirakyat hana jiteupeue bahwa Yonatan ka geujak nibak teumpat nyan.
4 Keu beureujang trok ubak pos Filistin nyan, Yonatan harôh geujak meulalu saboh barieh gunong nyang meuapet lé dua boh batée kareueng nyang meugigoe, nyang maséng-maséng batée kareueng nyan nan jih Bozes dan Sene.
5 Batée kareueng nyang disiblaih utara meuhadab u Mikhmas, dan nyang disiblaih u seulatan meuhadab teuma u Geba.
6 Dan geupeugah kheueh lé Yonatan ubak aneuëk muda nyan, "Jak geutanyoe tajak ubak pos ureuëng Filistin nyang kaphé laknat nyan. Mungken TUHAN geutém tulông geutanyoe. Sabab TUHAN geutem bri keugeutanyoe meunang, bah kheueh deungon ureuëng nyang jai meunan cit deungon ureuëng nyang nit."
7 Aneuëk muda nyan jijaweueb, "Peue mantong nyang keuneuk Teungku peubuet di ulôn kutem mantong."
8 "Get kheueh, meunyoe meunan," geupeugah lé Yonatan. "Bak watée tajeumeurang, geutanyoe teuma tapeuleumah droe ubak ureuëng-ureuëng Filistin nyan.
9 Meunyoe awaknyan jiyue dong geutanyoe dan tapreh sampoe awaknyan jijak ubak geutanyoe, teuma geutanyoe teutab mantong tinggai disinan bék tajeumeurang.
10 Teuma meunyoe awaknyan jiyuejak tanyoe ubak jih, meunan cit geutanyoe teuma tajak ubak awaknyan, lé sabab nyan kheueh tanda jih awaknyan ka geuseurah lé TUHAN ubak geutanyoe."
11 Bak watée gobnyan bandua jipeuleumah droe ubak ureuëng Filistin nyang na nibak pos rondo, jipeugah kheueh lé ureuëng-ureuëng Filistin nyan, "Ngieng kheueh, na ureuëng-ureuëng Ibrani nyang jiteubiet nibak uruek-uruek teumpat jimusöm!"
12 Óh lheuehnyan di ureuëng Filistin nyang teungoh meurondo nyan laju jitawök ubak Yonatan dan namiet geuhnyan, "Neu ek kheueh laju keuno mangat kamoe peuleumah sapeue-sapeue ubak gata!" Laju geupeugah teuma lé Yonatan ubak aneuëk muda nyan, "Gata seutôt kheueh laju ulôn, sabab awaknyan ka geuseurah lé TUHAN ubak Israel."
13 Sira jiseutôt lé aneuëk muda nyan Yonatan laju geumeuéue u ateueh. Bak watée Yonatan ka trok u ateueh, reubah meugageueng kheueh bubena ureuëng Filistin nyan sabab geu hawien ngon geupoh lé gobnyan, seudangkan dilikot gobnyan, aneuëk muda nyan laju jipoh maté bubena awaknyan.
14 Bak seurangan nyang phon nyan, Yonatan dan aneuëk muda nyan ka geupoh maté na kira-kira dua ploh droe di daerah nyang luwah jih na siper peuet heta.
15 Keujadian nyan ka jeuet teukeujot ubak dumna ureuëng Filistin nyang na didalam khimah-khimah meunan cit nyang na di dalam blang. Banmandum rakyat Filistin meunan cit deungon pos-pos teumpat meurundo jih jitamah lom deungon kawan ureuëng meurampok ka jeuet keuteumakot; dan bumoepi meuhayak, teuma teujadi kheueh karu ngon subra nyang hana meuteuntée le.
16 Bak watée nyan tantra Saul nyang teungoh jikawai di Gibea didalam wilayah Benyamin, deuh jikalon ureuëng-ureuëng Filistin nyan jiplueng keudeh keunoe hán meuho tujuan.
17 Dan geupeugah kheueh laju lé Saul ubak aneuëk buah gobnyan, "Gata itong kheueh laju banmandum tantra dan tapeureksa laju soe-soe nyang hana didalam kawan nyoe." Awaknyan laju jipeubuet peurintah nyan dan barô kheueh jiteupeue bahwa Yonatan dan aneuëk muda nyang gulam sinjata gobnyan nyang hanale didalam kawan nyan.
18 "Neuba laju keuno efod nyan," geupeugah lé Saul ubak Teungku Imeum Ahia. (Bak uroenyan Ahia geuba efod nyan dikeue ureuëng Israel.)
19 Bak watée Saul teungoh geupeugah haba deungon teungku imeum nyan, didalam khimah ureuëng Filistin ka meutamah karu nyang hana meuteuntée le, akhé jih Saul geupeugah ubak teungku imeum nyan, "Geutanyoe hana watée le talakée peutunyok ubak TUHAN"
20 Laju Saul dan banmandum ureuëng-ureuëng gobnyan deungon seureuntak geumaju u mideuen prang. Disinan deuh geukalon na karu ban salamle lamkawan ureuëng-ureuëng Filistin; awaknyan saléng jiserang dan saléng jimupoh sabe keudroe-droe.
21 Ureuëng-ureuëng Ibrani nyang na tinggai didalam daerah ureuëng Filistin, dan nyang ka jeuet keusipa-i awaknyan, laju meubalek haluan dan jimeusaho laju deungon Saul dan Yonatan.
22 Meunan cit deungon ureuëng-ureuëng Israel nyang mantong jimusöm di bukét-bukét Efraim, ban jideungoe bahwa ureuëng Filistin ka jiplueng, awaknyan pi laju jipeusaho droe deungon jijak prang bubena ureuëng Filistin nyan.
23 Awaknyan jimuprang deungon lumpah gura bansipanyang rot sampoe trok u Bet-Awen. TUHAN ka geupeuselamat Israel nibak uroenyan.
24 Bak uroenyan bubena ureuëng Israel dalam keuadaan leumoh sabab kadeuk that, sabab Saul ka geumeusumpah lagéenyoe, "Teukutok kheueh ureuëng nyang jimakheun peue mantong nibak uroenyoe sigohlom ulôn balaih dam ateueh musoh ulôn." Lé sababnyan kheueh hana meusidroe pih nyang na pajohbu nibak uroenyan.
25 Óh lheuehnyan trok kheueh laju awaknyan mandum bak saboh uteuen dan disinan laju meuteumé meulisan nyang lumpah that jai,
26 teuma hana meusidroe pi nibak awaknyan nyang na jijieb meulisan nyan, sabab awaknyan teumakot bak sumpah nyang ka geupeugah lé Saul.
27 Teuma Yonatan hana geuteupeu bahwa bapak gobnyan ka geuancam rakyat deungon sumpah nyan; sababnyan laju geusunyueng tungkat nyang na nibak jaroe gobnyan, dan tungkatnyan laju geutôb ateueh eumpung unoe nyan, lheuehnyan geucok meulisan nyan dan geujieb teuma. Óh lheuehnyan gobnyan laju ka teurasa puleueh graih dan ka teuma meurasa mangat tuboh geuh lagée ban nyang ka.
28 Óh lheuehnyan na sidroe lamkawan tantra nyan jipeugah ubak gobnyan, "Kamoenyoe banmandum ka hana meudaya sabab ka graih ngon deuk. Teuma bapak Teungku ka geuancam kamoe deungon sumpah, geupeugah, 'Teukutok kheueh ureuëng nyang jimakheun nibak uroenyoe.' "
29 Geujaweueb lé Yonatan, "Nyang lagéenyan ka hana patot geupeubuet lé bapak ulôn keu bansa geutanyoe! Ngieng kheueh, keuadaan ulôn jinoenyoe jiôh leubeh gét óh kalheueh ulôn jieb bacut meulisan nyan.
30 Seukira jih rakyat geubri idhin nibak uroenyoe teupajoh peunajoh nyang ka teureupah bak watée teupeutaloe musoh, ka pasti leubeh le lom ureuëng Filistin nyang bisa tanyoe poh maté!"
31 Bak uroenyan ureuëng Israel ka jipeutaloe ureuëng Filistin bak watée jimuprang bansipanyang rot ueh raya phon di Mikhmas laju trok u Ayalon. Teuma óh ka lheuehnyan awaknyan ka leumoh that-that,
32 akhé jih awaknyan laju jimeureubot jicok hareuta nyang teureupah lam jaroe musoh; awaknyan laju jicok bubiri dan leumô laju jisie nibak teumpat nyan cit teuma, dan lansong jipajoh uengkoet sie nyang mantong meudarah-darah nyan.
33 Hainyan laju teubri tée ubak Saul lagéenyoe, "Amphon deulat Po, rakyat ka meudesya ubak TUHAN sabab ka jipajoh uengkoet sie nyang mantong meudarah." "Gatanyoe banmandum peukhianat!" geupeugah lé Saul sira geukliek. "Tagule laju sianeuk batée raya keunoe bak ulôn."
34 Óh lheuehnyan geupeugah lom ubak ureuëng nyang ba haba nyan, "Gata jak kheueh beumeutabu lamkawan rakyat dan tayue kheueh awaknyan jiba leumô ngon bubiri jihnyan keunoe, mangat teusie di ateueh batéenyoe dan ta makheun teuma disinoe; deungon na lagéenyan awaknyan hana jipajoh uengkoet sie deungon darah jih dan hana teuma meudesya le ubak TUHAN." Bak malam nyan cit teuma banmandum rakyat laju jiba beulatang nyang jireupah didalam prang nyan dan laju jisie disinan.
35 Lé Saul laju geupeudong miseubah keu TUHAN; nyang kheueh miseubah nyang phon that geupeudong.
36 Óh lheuehnyan geupeugah kheueh lé Saul ubak aneuëk buah gobnyan, "Jak kheueh geutanyoe tajak prang ureuëng Filistin bak malam nyoe cit teuma laju ta rampok awaknyan sampoe án bungoh uroe dan tapoh maté teuma awaknyan banmandum." Awaknyan jijaweueb, "Bah neupeubuet lé Teungku Amphon peue nyang Teungku Amphon ngieng nyan gét." Teuma di teungku imeum geupeugah, "Bohjak kheueh geutanyoe talakée peutunyok leubeh ilée ubak Po teu Allah."
37 Dan geutanyong kheueh lé Saul ubak Po teu Allah, "Peu kheueh jeuet ulôn prang ureuëng Filistin ya Allah? Peu kheueh awaknyan TUHAN jok ubak jaroe ureuëng Israel?" Teuma nibak uroenyan Po teu Allah hana geujaweueb.
38 Sababnyan geupeugah kheueh lé Saul ubak peumimpén rakyat, "Tajak kheueh keunoe banmandum dan desya peu kheueh nyang ka gata peubuet nibak uroenyoe.
39 Ulôn meujanji deumi TUHAN nyang udeb, nyang ka geubri meunang keu ureuëng Israel, bahwa ureuëng nyang meusalah teuma geuhuköm maté, bahpi jihnyan aneuëk agam ulôn si Yonatan." Teuma hana meusidroe pih nyang jijeuet jijaweueb haba nyan.
40 Dan geupeugah kheueh lé Saul ubak banmandum rakyat Israel, "Gata banmandum tadong disiblaih nyoe." Jaweueb awaknyan, "Peue nyang keuneuk neupeubuet hai Teungku Po nyang ka neukalon nyan gét."
41 Óh lheuehnyan geumeudoa kheueh Saul ubak TUHAN, "Ya TUHAN, Allah ureuëng Israel, pakon nibak uroenyoe Droeneueh hana neujaweueb ulôn? TUHAN, neujaweueb kheueh ulôn meulalu batée-batée nyang suci nyoe. Meunyoe salah nyan na nibak ulôn atawa Yonatan, neujaweueb kheueh deungon batée Urim, teuma meunyoe salah nyan na nibak umat Droeneueh Israel, neujaweueb kheueh deungon batée Tumim." Dan geujaweueb kheueh lé TUHAN geutunyok ubak Yonatan dan Saul; deungon lagéenyan rakyat ka teujaweueb hana meusalah.
42 Laju geupeugah kheueh lom lé Saul, "Ya TUHAN, teuntée kheueh ulôn ngon Yonatan." Teuma Yonatan kheueh nyang geupeugah meusalah.
43 Laju geupeugah kheueh lé Saul ubak aneuëk geuh Yonatan, "Peue nyang ka gata peubuet hai aneuëk meutuah?" Geujaweueb lé Yonatan, "Ulôn ka ulôn cok bacut meulisan deungon ujong tungkat ulôn; kareuna nyan, ulôn kasiab keu maté."
44 Geupeugah lé Saul ubak aneuëk geuh Yonatan, "Seumoga ulôn geuhuköm lé Po teu Allah meunyoe gata hana ulôn huköm maté, Yonatan!"
45 Teuma rakyat geupeugah bak Saul, "Peu kheueh harôh Yonatan nyan teuhuköm maté? Hana! Kamoe meujanji deumi TUHAN nyang udeb, bahwa Yonatan hana jeuet gadôh meu sion ôk pih nibak ulée gobnyan. Kareuna deungon tulông TUHAN kheueh, gobnyan ka meuteumé meunang nibak uroe nyoe." Meunan kheueh Yonatan jipeuseulamat lé rakyat nibak teuhuköm maté.
46 Óh ka lheueh nyan ureuëng Filistin laju geugisa ubak wilayah droe jih keudroe sabab Saul hanale geutiyeub awaknyan.
47 Óh ka lheueh Saul jeuet keu raja di nanggroe Israel, gobnyan laju geupeubeudôh prang dipat mantong geujak lawan bubena musoh Israel, ngon ureuëng Moab geumuprang, ngon ureuëng Amon, dan meunan cit deungon ureuëng Edom banmandum ka geuprang, na teuma raja-raja di nanggroe Zoba, dan ureuëng Filistin. Dipat mantong gobnyan geupeubeudôh prang, sabe gobnyan meuteumé meunang.
48 Gobnyan geumuprang deungon lumpah hibat beuhe gagah beurani dan ka teuma geupeutaloe ureuëng Amalek, meunan cit geupeubeubaih Israel nibak keukuasaan ureuëng peurampok.
49 Aneuëk-aneuëk agam Saul na kheueh Yonatan, Yiswi dan Malkisua. Aneuëk gobnyan nyang inong geuboh nan Merab, dan nyang keudua geuboh nan Mikhal.
50 Peurumoh gobnyan nan jih Ahinoam, aneuëk Ahimaas; keu panglima tantra gobnyan na kheueh Abner aneuëk Ner, na kheueh apha Saul.
51 Kish bapak Saul, dan Ner bapak Abner, na kheueh aneuëk-aneuëk Abiel.
52 Siumu udeb gobnyan Saul geumuprang sabe deungon keubiet hebat geulawan ureuëng Filistin. Sabab nyan, meunyoe Saul geukalon ureuëng nyang teuga atawa beuhe, gobnyan laju geucok jeuet keu anggota tantra geuh.