1 Ubak Yoab teupeusampoe bahwa Raja Nabi Daud geumo ba-e ngon geumeukabong keu Absalom.
2 Dan keuhai meunang nibak uroenyan ka meu-ubah jeuet keu seudehan ubak banmandum tantra Nabi Daud kareuna awaknyan jideungoe bahwa raja teungoh keupeuratok aneuëk agam gobnyan.
3 Deungon cara seungab-seungab awaknyan jigisa u banda, bak lagée tantra nyang meurasa malée kareuna jipeuplueng droe nibak mideuen prang.
4 Raja geusöm muka gobnyan sira geumeuba-e ngon su nyang meuleungkeng, "Oh aneuëk ulôn! Aneuëk ulôn Absalom! Absalom, aneuëk ulôn!"
5 Yoab laju geujak meuhadab ubak raja dan geupeugah, "Bak uroenyoe Teungku Amphon ka neupeumalée aneuëk buah Teungku Amphon, padahai awaknyan kheueh nyang ka peuseulamat nyawöng Teungku Amphon, nyawöng aneuëk agam ngon aneuëk inong Teungku Amphon, meunan cit deungon peurumoh dan gundek Teungku Amphon.
6 Teungku Amphon ka neugaséh keu ureuëng-ureuëng nyang jibanci keu Teungku Amphon, teuma Teungku Amphon neubanci ubak ureuëng nyang jigaséh keu Teungku Amphon! Deungon jeulaih that Teungku Amphon ka neupeuleumah bahwa banmandum peuwira meunan cit deungon tantra Teungku Amphon nyan hana meu areuti nibak Teungku Amphon. Teuma leumah jih Teungku Amphon leubeh that-that galak meunyoe nibak uroenyoe Absalom mantong na udeb dan kamoenyoe banmandum maté!
7 Nyang sigét jih Teungku Amphon neubeudôh dan neujak uluwa keu teupeuteunang até aneuëk buah Teungku Amphon. Ulôn meusumpah deumi TUHAN, meunyoe Teungku Amphon hana neuteubiet neujak meurumpok ngon awaknyan, teuma nibak malam nyoe cit teuma hanale na ureuëng meusidroe pih nyang jitem na deungon Teungku Amphon. Nyan na kheueh sibagoe beuncana nyang paleng rayeuk nyang teuma Teungku Amphon rasa siumu udeb Teungku Amphon."
8 Óh lheuehnyan geubeudôh kheueh raja dan geujak laju uluwa, dan geuduek laju to ngon pintoe geureubang. Aneuëk buah gobnyan jideungoe bahwa gobnyan ka na disinan, laju awaknyan banmandum teuka jijak meuhadab. Bak watée nyan banmandum pasokan Israel ka jipeuplueng droe, dan jijakwoe u rumoh jih maséng-maséng.
9 Lamkawan banmandum sukée Israel teuka kheueh seuleuseh paham ka jimeudakwa ngon jimeudakwi sabe keudroe-droe. Kheun awaknyan, "Raja Nabi Daud ka geupeuseulamat geutanyoe nibak ureuëng Filistin dan meunan cit ka geupeu lheueh geutanyoe nibak musoh-musoh nyang laén, teuma jinoenyoe gobnyan ka geupeuplueng droe nibak Absalom dan geutinggai nanggroenyoe.
10 Absalom tanyoe baiát jeuet keu raja, teuma jinoenyoe ka maté didalam mideuen prang, pakon hana meusidroe ureuëng pih jiuseuha jiba peuwoe Nabi Daud mangat geuwoe keunoe?"
11 Tutoe haba nyan trok cit ubak Raja Nabi Daud. Sabab nyan gobnyan geuyue laju Teungku Imeum Zadok dan Teungku Imeum Abyatar geuyuejak tanyong ubak peumimpén Yehuda lagée nyoe, "Pakon gata ka jeuet keu nyang keuneuleueh keu teujak sambot ngon teujak iréng raja geuwoe lom teuma ubak meuligoe gobnyan?
12 Neupeugah kheueh laju gata waréh syedara ulôn dan kawöm keurabat ulôn? Pakon jeuet gata nyang keuneuleueh neulakée mangat ulôn woe?"
13 Meunan cit teuma lé Nabi Daud geupeugah geuyue peusampoe ubak awaknyan mangat jijak peugah ubak Amasa lagée nyoe, "Bukon kheueh gatanyoe sabat ulôn? Phon bak saátnyoe gata ulôn angkat jeuet keu panglima tantra ulôn keugeunantoe Yoab. Kira jih Po teu Allah geupoh maté ulôn meunyoe hainyan hana ulôn peubuet!"
14 Meunan kheueh cara jih Nabi Daud ka meuhase geucok até banmandum kawöm Yehuda sampoe awaknyan jikirém peusan ubak raja mangat geuwoe ubak meuligoe meusajan banmandum deungon dumna peugawée gobnyan.
15 Óh lheueh nyan raja pih geubeurangkat dan trok laju nibak Krueng Yordan, bak watée nyan di ureuëng-ureuëng Yehuda ka teuma sampoe u Gilgal keu jijak tueng raja dan jikawai gobnyan teujeumeurang Krueng Yordan.
16 Simei aneuëk si Gera, ureuëng Benyamin nyan jiba teuma na siribée droe nibak sukée Benyamin dan bagaih-bagaih jiteuka meusigoe deungon ureuëng-ureuëng Yehuda nyan keu jijak sambot raja. Meunan cit deungon Ziba namiet keuluwarga Saul, meunan cit deungon ban limong blaih droe aneuëk gobnyan nyang agam dan dua ploh droe namiet gobnyan; awaknyan ka jijeumeurang Krueng Yordan sigohlom raja teuka keunan.
18 Awaknyan jibantu keuluwarga raja geujeumeurang krueng nyan dan jipeubuet laju peue mantong nyang geuyue lé raja ubak gobnyan. Bak watée raja geukeuneuk jeumeurang krueng, Simei laju jisujut dikeue gobnyan dan jipeugah,
19 "Ulôn meulakée, bah kheueh Teungku Amphon hana neu anggab ulôn teutab meusalah. Bah kheueh Teungku Amphon neupeu tuwoe peue nyang ka ulôn peubuet nibak uroe Teungku Amphon neutinggai Yerusalem.
20 Ulôn ka insaf, bahwa ulôn ka lôn peubuet desya, dan lé sabab nyan, lamkawan sukée-sukée nyang na tinggai di daerah utara ulôn kheueh nyang phon-phon that teuka jak sambot Teungku Amphon nibak uroe nyoe."
21 Ban geudeungoe nyang lagée nyan di Abisai aneuëk Zeruya jipeugah, "Simei ka patot teuhuköm maté sabab jihnyan ka jikutok raja nyang ka geupiléh lé TUHAN."
22 Teuma Nabi Daud geupeugah ubak Abisai dan Yoab aduen gobnyan, "Bék taikot jampu urusan ulôn. Keupeue awaknyoe tapeususah ulôn? Bak uroenyoe ulôn ka jeuet keuraja lom ateueh Israel, dan hana jeuet na ureuëng Israel nyang teuhuköm maté."
23 Óh lheueh nyan geumeusumpah kheueh raja ubak Simei, "Ulôn jamin bahwa gata hana teuhuköm maté."
24 Meunan cit si Mefiboset cucoe Saul, jiteuka keu jiseutôt sajan jak sambot raja. Gobnyan hana jihrah gaki geuh, hana teuma jigunteng janggot geuh, dan hana teuma jirhah peukayan jih yohphon Nabi Daud geutinggai Yerusalem sampoe gobnyan deungon seulamat teuma geugisa.
25 Bak watée Mefiboset teuka di Yerusalem keu jijak sambot raja, geupeugah kheueh laju lé raja ubak jihnyan, "Hai Mefiboset, pakon gata hana tajak deungon ulôn nibak watée nyan?"
26 Jijaweueb lé Mefiboset, "Nyang ulôn peumulia Teungku Amphon, Teungku kon neuteupeue bahwa ulôn nyoe capiek. Ulôn yue peulayan ulôn sipeusiab keuleudée nyang hase ulôn pasang di teueh rhueng jih mangat jeuet ulôn seutôt Teungku Amphon. Teuma ulôn ka jikianat lé peulayan nyan.
27 Kon nyan mantong, ulôn jifiteunah teuma teuhadab Teungku Amphon. Teuma Teungku Amphon na kheueh ban lagée malaikat Allah. Sabab nyan neupeubuet kheueh laju peue nyang Teungku Amphon anggab gét.
28 Banmandum kawöm keuluwarga bapak ulôn ka pathot neuhuköm maté lé Teungku Amphon, teuma ulôn nyoe ka Teungku bri idhin keu meusajan lôn makheun ngon Teungku Amphon nibak meuligoe. Jinoenyoe ulôn hana beurani le lôn lakée peue mantong nibak Teungku Amphon."
29 Geujaweueb lé raja, "Hana peureulée le tapeugah peue mantong. Ulôn ka lôn cok keusimpolan keu ulôn bri peue mantong hareuta Saul keu gata dan keu Ziba."
30 Laju jijaweueb lé Mefiboset, "Bah kheueh atranyan jicok lé Ziba banmandum. Ulôn ka puih sabab Teungku Amphon ka neuwo deungon seulamat."
31 Meunan cit si Barzilai ureuëng Gilead nyan teuka di Rogelim keu jijak iréng raja geujak jeumeurang Krueng Yordan.
32 Barzilai bak watée nyan ka tuha that, umu gobnyan ka na lapan ploh thon. Gobnyan ureuëng nyang kaya that yoh mantong raja tinggai di Mahanaim yoh watée ilée, Barzilai nyan kheueh nyang peuna peunajoh keu raja.
33 Raja geupeugah ubak ureuëng nyan, "Gata seutôt kheueh laju deungon ulôn u Yerusalem, teuma disideh ulôn jok peue mantong nyang gata peureulée."
34 Teuma jijaweueb lé Barzilai, "Ulôn nyoe hana panyang le umu, dan udeb ulôn nyoe hana treb le. Lé sababnyan keupeue kheueh guna jih ulôn nyoe lôn seutôt deungon Teungku Amphon u Yerusalem?
35 Umu ulôn nyoe ka lapan ploh thon, dan hana le peue nyang ulôn harab nyang hase teubri keuteupeu mangat até ulôn. Ulôn nyoe hana le nyang mangat peue nyang ulôn makheun dan peue teuma nyang ulôn jieb, dan punyueng ulôn hana hase le ulôn deungoe su nyang meureudu ureuëng meuca-e. Ulôn teuma jeuet keubeuban u ateueh Teungku Amphon.
36 Ulôn nyoe hana patot ulôn teurimong upah nyang rayeuk nyan. Teuma ulôn nyoe meuheut ulôn keuneuk iréng Teungku Amphon meupadub langkah mantong di meurandeh Krueng Yordan.
37 Óh lheueh nyan, bah kheueh ulôn nyoe lônwoe u rumoh dan meuninggai disinan, óh lheueh nyan jipeukubu bak binéh jrat bapak ulôn, teuma nyoe kheueh aneuëk ulôn nyang nan jih Kimham. Neupeu idhin kheueh jihnyan ji iréng Teungku Amphon dan neupeubuet kheueh ateueh jihnyan peue nyang Teungku Amphon ngieng nyan gét."
38 Geujaweueb lé raja, "Kimham teuma ulôn ba dan ulôn uroih lagée nyang gata lakée, dan peue mantong nyang gata lakée ubak ulôn teuma ulôn peupeunoh."
39 Óh ka lheueh geupeugah nyan, Nabi Daud dan banmandum aneuëk buah gobnyan laju geujeumeurang Krueng Yordan. Sigohlom nyan Nabi Daud geucôm leubeh ilée Barzilai sira geulakée idhin. Óh lheueh nyan geuwoe kheueh laju si Barzilai u rumoh gobnyan.
40 Banmandum pasokan Yehuda dan siteungoh nibak pasokan Israel ji-iréng raja jak jeumeurang Krueng Yordan nyan. Óh ka lheueh nyan raja laju geujak u Gilgal, dan Kimham geuba sajan deungon gobnyan.
41 Óh ka lheueh nyan teuka kheueh banmandum ureuëng Israel jak meuhadab ubak raja dan jipeugah ubak gobnyan, "Teungku Amphon, pakon kheueh syedara kamoe nyang ureuëng Yehuda nyan jipike bahwa awaknyan kheueh nyang na hak jijak tueng ngon jikawai Teungku Amphon meunan cit deungon banmandum keuluwarga Teungku Amphon dan mandum aneuëk buah Teungku Amphon nyang meusajan-sajan teujeumeurang Krueng Yordan?"
42 Laju jijaweueb lé ureuëng Yehuda nyan, "Nyan ka patot hak kamoe, sabab raja nyan na kheueh sabat kamoe. Peue pasai jeuet keubeungéh gata? Peu kheueh keubutohan kamoe geutanggong lé raja, atawa ka geubri sapeue-sapeue hadiah keu kamoe?"
43 Jijaweueb lé ureuëng Israel nyan, "Hak kamoe u ateueh raja nyan na siploh goe lipat nibak hak gata, bahpih raja nyan na kheueh rakan nyang krab deungon gata. Pakon gata ngieng enteng teuhadab kamoe? Bék tuwoe gata bahwa kamoe kheueh nyang phon-phon that usui keu teuba raja mangat teupeuwo!" Teuma di ureuëng Yehuda leubeh kreueh nibak ureuëng Israel dan hán jitem taloe.
