1 Nabi Sulaiman geumeudoá, "Ya TUHAN, Droeneueh leubeh galak neutinggai didalam awan nyang seupôt.
2 Jinoe ulôn peudong keu Droeneueh geudong nyang meugah, keu teumpat tinggai Droeneueh siumu masa."
3 Óh lheueh geumeudoá, Nabi Sulaiman laju geupaleng ubak rakyat nyang teudong disinan, dan laju geulakée beureukat Allah keu awaknyan.
4 Geupeugah lé Nabi Sulaiman dalam munajab gobnyan ubak Allah, "Yoh masa ilée TUHAN ka neumeujanji ubak ureuëng syiek ulôn Nabi Daud lagée nyoe, 'Yoh phon that Ulôn peuteubiet umat Ulôn di nanggroe Meusé sampoe nibak uroenyoe, di nanggroe Israel hana meusaboh banda pih nyang Ulôn piléh keu jeuet keu teumpat teupeudong saboh rumoh iébadat keu Ulôn, dan hana meusidroe pi nyang Ulôn piléh mangat jeuet keupeumimpén umat Ulôn Israel. Teuma jinoenyoe Ulôn piléh Yerusalem sibagoe teumpat iébadat keu Ulôn. Dan gata hai Nabi Daud, Ulôn piléh mangat tapeurintah umat Ulôn.' Teupujoe kheueh Po teu Allah Israel nyang ka geupeuteupat janji geuh nyan!"
7 Lheuehnyan geupeugah lom lé Nabi Sulaiman, "Ureuëng syiek ulôn Nabi Daud ka geureuncana keuneuk geupeudong saboh rumoh iébadat ubak TUHAN Allah Israel.
8 Teuma TUHAN geupeugah ubak gobnyan, 'Meukeusut gata nyan jroh that.
9 Teuma, kon gata, aneuëk gata kheueh nyang peudong Baét Ulôn nyan.'
10 Jinoenyoe TUHAN ka geupeutrok janji Geuh. Ulôn ka jeuet keuraja Israel keugeunantoe ureuëng syiek ulôn, dan meunan cit di ulôn ka teuma ulôn peudong rumoh keu teumpat iébadat ubak TUHAN, Allah Israel.
11 Di dalam Baét TUHAN nyan ulôn keubah teumpat keu Peuto Peujanjian nyang asoe jih batée peujanjian TUHAN deungon umat Israel."
12 Nabi Sulaiman ka geupeugöt panggong peurunggu di teungoh-teungoh Baét TUHAN. Panyang ngon luwah jih na 2,2 metée, dan manyang jih na 1,3 metée. Dikeue rakyat nyang teuka keunan, Nabi Sulaiman laju geu-ék u ateueh panggong nyan, dan geudong geumeuhadab ubak miseubah. Banmandum ureuëng nyang na disinan deuh jikalon. Laju gobnyan geumeu teuôt, óh lheueh nyan geubeuôt ban dua blaih jaroe geuh sira geuleueng u langét laju geumeu doá,
14 "TUHAN, Po teu Allah Israel! Dilangét meunan cit di ateueh bumoe nyoe hana nyang hase lagée Droeneueh ya TUHAN! Droeneueh ka neupeutrok janji Droeneueh deungon cara ka neutunyok geunaséh Droeneueh keu umat Droeneueh nyang seutia lom taát deungon sipeunoh até keu Droeneueh.
15 Droeneueh ka neupeutrok janji Droeneueh ubak ureuëng syiek ulôn Nabi Daud. Peue nyang ka TUHAN peujanjinyan ka TUHAN peubuet nibak uroenyoe.
16 Meunan cit TUHAN ka neumeujanji ubak ureuëng syiek ulôn bahwa meunyoe keuturonan gobnyan bit-bit taát ubak huköm Droeneueh lagée gobnyan, teuma keu siumu masa sidroe lamkawan keuturonan gobnyan jimat peurintah lagée raja di Israel. Jinoenyoe, ya TUHAN Po teu Allah Israel, neupeutrok kheueh laju banmandum janji nyang ka TUHAN peujanji ubak bapak ulôn Nabi Daud, hamba Droeneueh nyan.
18 Teuma, ya Po teu Allah, peu kheueh beutôi-beutôi TUHAN neutem tinggai di ateueh bumoe nyoe di lamkawan manusia? Meunyoe tacok langét banmandum pih hana seb luwah keuteumpat Droeneueh, peue teuk lom deungon rumoh iébadat nyang ulôn peudong nyoe!
19 Ya TUHAN, Allah ulôn, ulôn hamba Droeneueh! Teuma, neudeungoe kheueh doá ulôn, dan neupeukabui kheueh peue nyang ulôn lakée.
20 Seumoga uroe ngon malam TUHAN neulindong baét nyoe nyang ka TUHAN piléh sibagoe teumpat iébadat keu Droeneueh. Seumoga teuma nibak teumpat tinggai TUHAN di syeuruga TUHAN neudeungoe dan neupeu amphon ulôn meunan cit desya umat Droeneueh Israel, pajan mantong kamoe meuhadab ubak baét nyoe dan kamoe meudoá ubak Droeneueh.
22 Meunyoe na sidroe ureuëng jitudoh meusalah ateueh ureuëng laén dan laju jiba ubak miseubah Droeneueh didalam Baét Droeneueh nyoe keu jimeusumpah bahwa jihnyan hana meusalah,
23 ya TUHAN bah kheueh TUHAN neudeungoe doá kamoe nyoe lam syeuruga dan neupeuputôh peukara hamba-hamba Droeneueh nyoe. Neu huköm kheueh nyang meusalah dan neupeubeubaih kheueh nyang hana meusalah.
24 Meunyoe umat Droeneueh Israel jipeutaloe lé musoh-musoh jih sabab awaknyan meudesya, laju jihnyan meunyeusai dan jihoreumat lom Droeneueh sibagoe TUHAN, óh lheuehnyan jijak ubak Baét Droeneueh nyoe sira jimeudoá jilakée amphon ubak Droeneueh,
25 seumoga TUHAN nyang na lam syeuruga neudeungoe awaknyan. Seumoga TUHAN neupeu amphon teuma banmandum desya umat Droeneueh nyoe, dan neupeuwoe awaknyan u nanggroe nyang ka TUHAN bri keu awaknyan dan keu indatu awaknyan.
26 Meunyoe umat Droeneueh meudesya ubak Droeneueh dan neuhuköm awaknyan deungon hana neupeutron ujeuen, laju awaknyan meunyeusai ngon jimeutobat ubak Droeneueh sira jihoreumat Droeneueh sibagoe TUHAN, óh lheuehnyan jijak meuhadab u Baét Droeneueh nyoe dan jimeudoá ubak Droeneueh,
27 ya TUHAN di syeuruga, neudeungoe kheueh awaknyan. Dan neupeu amphon kheueh desya-desya hamba-hamba Droeneueh umat Israel. Neupeuruno kheueh awaknyan mangat jipeubuet nyang beuna. Óh lheuehnyan, ya TUHAN, neupeutron kheueh ujeuen u nanggroe Droeneueh nyoe, nanggroe nyang ka TUHAN bri keu umat Droeneueh nyang ka jeuet keuhak milék jih keu siumu masa.
28 Meunyoe nanggroe nyoe teuka musém deuk atawa bala nyang parah that, atawa bubena seunaman jipeurusak lé angén seu-uem, hama atawa seurangga daruet, atawa meunyoe umat Droeneueh jiprang lé musoh, atawa jiseurang lé peunyakét,
29 seumoga TUHAN neudeungoe doá awaknyan. Meunyoe nibak umat Droeneueh Israel na nyang seudeh até jimeudoá ubak Droeneueh sira jileueng paleuet jaroe u langét jimeuhadab ubak Baét Droeneueh nyoe,
30 bah kheueh TUHAN nyang na lam syeuruga neudeungoe dan neupeu amphon awaknyan. Teuma Droeneueh kheueh nyang teupeue peue asoe até manusia. Sabab nyan neupeusaneut kheueh soemantong ureuëng nyan nyang sadub deungon buet jih,
31 mangat umat Droeneueh jitaát dan jitakot keu Droeneueh pajan mantong simantong awaknyan tinggai di nanggroe nyang ka TUHAN jok keu indatu kamoe.
32 Meunyoe ureuëng aséng nyang deungoe keuhai keu agongan dan teunaga Droeneueh, dan bahwa Droeneueh sabe lam siab keu neutulông, laju jihnyan jijak ubak Baét Droeneueh nyoe keu jijak meudoá ubak Droeneueh,
33 seumoga TUHAN nibak teumpat Droeneueh di syeuruga neudeungoe doá awaknyan dan neupeutrok peue nyang jilakée. Deungon na lagéenyan banmandum bansa nyang na di ateueh donya jituri Droeneueh dan jitaát ubak Droeneueh lagée umat Droeneueh Israel. Awaknyan teuma jiteupeue bahwa rumoh nyang ulôn peudong nyoe kheueh teumpat keujih iébadat ubak Droeneueh.
34 Meunyoe TUHAN neubri peurintah keu umat Droeneueh jijak muprang jak lawan musoh, dan dipat mantong kheueh awaknyan na, awaknyan jimeuhadab ubak banda nyang ka TUHAN piléh nyoe dan jimeudoá sira meuhadab keue baét nyoe nyang ka ulôn peudong keu Droeneueh,
35 seumoga Droeneueh nyang na didalam syeuruga neudeungoe doá awaknyan, dan neupeumeunang keu awaknyan.
36 Meunyoe umat Droeneueh jipeubuet desya ateueh Droeneueh -- nyang sikeubit jih hana meusidroe manusia pih nyang hana meudesya -- dan sabab beungéh Droeneueh neupeubiyeu mantong awaknyan jipeutaloe lé musoh dan laju jiba sibagoe tawanan ubak saboh nanggroe nyang jiôh atawa tô,
37 seumoga TUHAN neudeungoe doá awaknyan. Meunyoe nibak nanggroe nyan awaknyan jitinggai desya-desya jih, dan jimeudoá ubak Droeneueh sira jimeungaku bahwa droe jih nyan ka jipeubuet desya dan buet nyang jeuhet, neudeungoe kheueh doá awaknyan, ya TUHAN.
38 Meunyoe di nanggroe nyan awaknyan deungon ikhlas dan jujoe ka jitinggai desya-desya droe jih, dan jimeudoá ubak Droeneueh sira jimeuhadab u nanggroenyoe nyang ka TUHAN bri keu indatu kamoe, u arah banda nyang ka TUHAN piléh dan u rumoh iébadat nyang ka ulôn peudong keu Droeneueh nyoe,
39 teuma nibak lam syeuruga di teumpat TUHAN tinggai bah kheueh TUHAN deungoe doá-doá awaknyan dan neugaséh keu awaknyan. Neupeu amphon kheueh bubena desya umat Droeneueh.
40 Jinoenyoe, ya Allah ulôn, neungieng kheueh kamoe dan neudeungoe kheueh doá nyang jipeusampoe ubak Droeneueh nibak teumpat nyoe.
41 Neubeudôh kheueh jinoenyoe, ya TUHAN Po teu Allah! Dan meusajan deungon Peuto Peujanjian nyang teulambang sibagoe kuasa Droeneueh nyan bah kheueh TUHAN neutamong u dalam Baét Droeneueh nyoe dan neutinggai kheueh disinoe keu siumu masa. Neubri kheueh beureukat keumandum buet teungku-teungku imeum Droeneueh, dan seumoga banmandum umat Droeneueh mubahgia kareuna Droeneueh jroh that keu awaknyan.
42 TUHAN, Po teu Allah kamoe, bék kheueh neutulak raja nyang ka TUHAN piléh nyoe. Neuingat kheueh keugeunaséh Droeneueh nyang ka TUHAN bri keu hamba Droeneueh Nabi Daud."
