1 Teungoh Ezra geumeudoá sira geumo dan geumeungaku desya dikeue Baét TUHAN, le that-that ureuëng Israel jijak keunan keujijak meusapat, bah kheueh nyan ureuëng agam, meunan cit deungon ureuëng inong dan aneuëk miet. Awaknyan jidong meulingka sira jimo teuga-teuga.
2 Óh lheuehnyan Sekhanya bin Yehiel nibak kawöm Elam, jipeugah ubak Ezra, "Kamoe ka meudesya ubak TUHAN sabab ka kamoe meukawen deungon bansa aséng. Bahpi lagée nyan mantong na harapan keu ureuëng Israel.
3 Jak kheueh geutanyoe ta meusumpah ubak Po teu Allah, bahwa geutanyoe teuma ta use banmandum ureuëng inong nyan meunan cit deungon aneuëk-aneuëk jih nyan. Kamoe teuma kamoe seutôt bandum naseuhat droeneueh meunan cit naseuhat ureuëng laén nyang jihoreumat peurintah Allah. Dan kamoe teuma kamoe horeumat ubak Huköm Allah.
4 Droeneueh kheueh nyang wajéb nyang cok tindakan, kamoe teuma kamoe tulông droeneueh deungon sikeubit até. Neutindak kheueh deungon teugaih sampoe seuleusoe."
5 Lé sababnyan geupeuphon kheueh lé Ezra geucok tendakan. Gobnyan laju geuyue ubak teungku-teungku imeum ulée, ureuëng-ureuëng Lewi dan ureuëng-ureuëng Israel nyang laén mangat jimeusumpah bahwa awaknyan bit-bit jipeubuet usui nyang geupeusampoe lé Sekhanya nyan.
6 Óh ka lheueh awaknyan jimeusumpah, dan geujak kheueh laju Ezra nibak leuen Baét TUHAN dan geujak tamong u dalam teumpat tinggai Yohanan bin Elyasib meudom di sinan. Gobnyan hana geutem makheun meunan cit hana geujieb ié sabab pikeran geuh suntok that watée geupike keu pi-e ureuëng-ureuëng nyang teuböih nyan.
7 Óh lheuehnyan laju teutabu saboh maklumat nyang teupeumaklum u bansaboh Yerusalem dan Yehuda keu mandum ureuëng nyang ka jiwoe nibak teumpat jih teuböih, mangat jimeusapat di Yerusalem.
8 Barang gasoe hana jiteuka lam teumpo lhée uroe, keu ureuëng nyan teuma teucok banmandum hareuta jih dan keu ureuëng nyan hanale teuanggab sibagoe anggota masyarakat. Maklumat nyan jiteken lé peumimpén rakyat.
9 Óh ka na lhée uroe, nibak tanggai dua ploh buleuen sikureueng, banmandum ureuëng agam nyang na tinggai di daerah Yehuda dan Benyamin jijak u Yerusalem laju jimeusapat dileuen Baét TUHAN. Bak watéenyan ujeuen jitreun keubit that tajam. Banmandum ureuëng nyan yo meukot-kot sabab sijuek meunan cit sabab udara jih leupie that dan sabab peunteng jih meusapat disinan.
10 Óh lheuehnyan Ezra laju geudong dan geumeututoe ubak awaknyan. Gobnyan geupeugah, "Gatanyoe banmandum ka meudesya sabab lé gata ka leubeh meutamah desya ureuëng Israel sabab ka tameukawen deungon ureuëng inong bansa aséng.
11 Sabab nyan, tameungaku kheueh desya gata ubak TUHAN, Allah nyang geuseumah lé indatu geutanyoe, dan tapeubuet kheueh laju peue nyang hase teupeugalak até gobnyan. Beujiôh kheueh gata nibak ureuëng aséng nyang na tinggai di nanggroe geutanyoe dan ta use kheueh banmandum ureuëng binoe gata dan bansa aséng nyan."
12 Awaknyan banmandum meusigoe jijaweueb deungon su nyang meutaga, "Kamoe teuma kamoe seutôt naseuhat droeneueh."
13 Laju jipeugah lé awaknyan lom, "Teuma nyang na teuka keuno ramé that dan ujeuen pih jitôh lumpah teuga, kamoe hana ék kamoe dong diluwa nyang lagéenyoe. Dan nyoe bukon peukara nyang hase teupeuseuleusoe lam watée sa atawa dua uroe, sabab jai that-that nibak kamoe nyang rhoh lam desya nyoe.
14 Neupeu idhin kheueh keu peumimpén kamoe mangat jeuet gobnyan tinggai di Yerusalem dan geu uroih keuhai nyan. Lé tieb-tieb ureuëng nyang na tinggai di banda-banda kamoe, nyang na peurumoh jih nibak bansa aséng, bah kheueh jijak paih bak watée nyang ka teupeuteuntée, meusajan deungon bubena peumimpén dan bubena hakém banda awaknyan maséng-maséng. Deungon na lagée nyan Po teu Allah hana geubeungéh le keu geutanyoe sabab desya nyan."
15 Hana meusidroe pi nyang na usui keuhai geuhon reuncana nyan, seulaén Yonatan bin Asael dan Yahzeya bin Tikwa, jisukong teuma lé dua droe ureuëng Lewi, na kheueh Mesulam dan Sabetai.
16 Ureuëng-ureuëng nyang teuböih nyang ka geuwoe nyan teutab geukeuneuk peujak reuncana nyan, lé sabab nyan Teungku Imeum Ezra geupiléh laju na meupadub droe lamkawan ulée-ulée kawöm, laju geucetet nan-nan awaknyan. Bak tanggai sa buleuen siploh awaknyan geupeuphon sidang keu geuseulidék peukara nyan.
17 Lam teumpo lhée buleuen óh lheuehnyan barô kheueh meuhase geupeuseuleusoe geupareksa ateueh banmandum ureuëng agam nyang ka meukawen deungon ureuëng inong bansa aséng.
18 Nyoe kheueh dafeutar nan-nan ureuëng nyang meukawen deungon bansa aséng: Teungku-teungku Imeum, teudafeutar deungon kawöm: Kawöm Yesua deungon syedara-syedara gobnyan, aneuëk-aneuëk Yozadak: Maaseya, Eliezer, Yarib dan Gedalya.
19 Awaknyan meujanji jitaleuek peurumoh jihnyan, óh lheueh nyan laju jipeuseumah bubiri agam keu keureubeuen peuamphon desya awaknyan keudroe.
20 Kawöm Imer: Hanani dan Zebaja.
21 Kawöm Harim: Maaseya, Elia, Semaya, Yehiel dan Uzia.
22 Kawöm Pasyhur: Elyoënai, Maaseya, Ismail, Netaneel, Yozabad, dan Elasa.
23 Ureuëng-ureuëng Lewi: Yozabad, Simei, Kelaya (teuhôi cit deungon nan Kelita), Petahya, Yuda dan Eliezer.
24 Kawöm meuca-e: Elyasib Ureuëng nyang jaga pintoe geureubang Baét TUHAN: Salum, Telem dan Uri.
25 Ureuëng-ureuëng Israel nyang laén: Kawöm Paros: Ramya, Yezia, Malkia, Miyamin, Eleazar, Malkia dan Benaya.
26 Kawöm Elam: Matanya, Nabi Zakharia, Yehiel, Abdi, Yeremot dan Elia.
27 Kawöm Zatu: Elyoënai, Elyasib, Matanya, Yeremot, Zabad dan Aziza.
28 Kawöm Bebai: Yohanan, Hananya, Zabai dan Atlai.
29 Kawöm Bani: Mesulam, Malukh, Adaya, Yasub, Seal dan Yeramot.
30 Kawöm Pahat-Moab: Adna, Kelal, Benaya, Maaseya, Matanya, Bezaleel, Binui dan Manasye.
31 Kawöm Harim: Eliezer, Yisia, Malkia, Semaya, Simeon, Benyamin, Malukh dan Semarya.
33 Kawöm Hasum: Matnai, Matata, Zabad, Elifelet, Yeremai, Manasye dan Simei.
34 Kawöm Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai.
38 Kawöm Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya dan Yusuf.
43 Kawöm Nebo: Yeiel, Matica, Zabad, Zebina, Yadai, Yoël dan Benaya.
44 Banmandum awaknyan ka jimeukawen ngon inong nibak bansa aséng. Lé sababnyan, peurumoh-peurumoh nyan jitaleuek dan laju jiuse meusajan deungon aneuëk-aneuëk awaknyan.
