1 Lagu-lagu peulajaran Asaf.
2 Ulôn keuneuk peugah peupatah dan misé umpama, dan ulôn peusaheh hiém yoh masa ilée,
3 hai-hai nyang kamoe deungoe dan kamoe teurimong, nyang jikisah lé indatu kamoe.
4 Kamoe hana kamoe söm sibagoe rahsia keuhai nyan ubak aneuëk-aneuëk kamoe; kamoe keuneuk peugah hainyan ubak angkatan óh lheueh kamoe keuhai kuasa TUHAN dan karya-karya Gobnyan nyang raya, dan buet-buet Gobnyan nyang ajaéb.
5 Ubak bansa Israel Gobnyan geubri huköm Geuh, dan ubak keuturonan Nabi Yakub peurintah Gobnyan. Gobnyan geuyue indatu geutanyoe mangat geupeurunoe hainyan keu aneuëk-aneuëk awaknyan,
6 mangat angkatan nyang lheueh nyan jituri Gobnyan, dan geupeusampoe teuma ubak aneuëk-aneuëk awaknyan.
7 Deungon na lagée nyan awaknyan pih jitroh harapan ubak Allah, dan hana jituwoe ubak buet Gobnyan, dan sabe lam taát ubak peurintah Gobnyan,
8 mangat awaknyan hana lagée indatu awaknyan, nyang galak ubak beurontak dan bak buet doraka; angkatan nyang guyah iman jih, dan hana seutia ubak Po teu Allah.
9 Sukée Efraim nyang meuseunjata panah dan busur, laju jiplueng bak watée teungoh muprang.
10 Awaknyan jiliengkeue peujanjian Allah ngon awaknyan, dan hana jitem taát deungon huköm Gobnyan.
11 Awaknyan tuwoe deungon buet-buet Gobnyan, dan hai-hai nyang ajaéb nyang geupeuleumah ubak awaknyan.
12 Dikeue indatu awaknyan, Allah geupeugôt buet ajaéb di nanggroe Meusé, di ateueh darat Zoan.
13 Gobnyan geuplah laôt, laju geupeujeumeurang awaknyan; ié laôt nyan geupeudong lagée ié lam kulam.
14 Gobnyan geupeuintat awaknyan deungon awan jeuet keupayong bak watée uroe dan deungon apui hu bak watée malam.
15 Gobnyan geuprah gunong batée di padang pasi, dan geubri ié jieb bak awaknyan nyang meulimpah ruwah.
16 Bukét batée geupeurintah beu jiteubiet ié, dan laju ié ji ile lagée ié krueng.
17 Teuma awaknyan sabe meudesya ubak Allah, di padang guron nyan awaknyan beurontak ubak Nyang Mahamanyang.
18 Awaknyan jisaja ji ujoe Allah, deungon cara jilakée peunajoh nyang jihawa.
19 Awaknyan jilawan Po teu Allah sira jipeugah, "Peu kheueh hase Allah geubri keu geutanyoe peunajoh di padang pasi?
20 Keubit beutôi Gobnyan geuseukok gunong batée nyang kreueh, sampoe jiteubiet ié lam batée nyan deungon kancang that. Teuma peu kheueh Gobnyan hase geukeubah ruti keu awaknyan dan geubri uengkot sie keu umat Gobnyan?"
21 Ban geudeungoe nyang lagée nyan, Allah beungéh lumpah na dan laju geuseurang awaknyan deungon apui hu; beungéh Gobnyan ateueh awaknyan meutamah-tamah,
22 sabab awaknyan hana jipeucaya ubak Allah, ubak kuasa Gobnyan nyang hase geupeuseulamat awaknyan.
23 Bahpi meunan Gobnyan geupeurintah ubak langét jeuet jibuka bubena babah pintoe langét nyan.
24 Laju Gobnyan geupeutron gandom lam syeuruga, manna keu peunajoh awaknyan.
25 Gobnyan geubri keu awaknyan peunajoh nyang meulimpah; awaknyan jimakheun ruti malaikat.
26 Meunan cit Gobnyan geuyue pôt angén timu; meunan cit lé kuasa Gobnyan angén seulatan pi laju jipôt.
27 Gobnyan geupeutron laju cicém-cicém keu umat Geuh, jeumeulah jih na lagée anou di pasi nyang hana teukira.
28 Geupeurhot laju cicém-cicém nyan nibak khimah-khimah di seukeulileng teumpat awaknyan tinggai.
29 Dan jimakheun kheueh laju awaknyan sampoe án troe, sabab Po teu Allah ka geubri peue nyang jilakée lé awaknyan.
30 Teuma bahpi ka na nyang lagée jilakée nyan, teuma nafeusu awaknyan gohlom cit meurasa pueh; jadi, teungoh awaknyan mantong jimakheun,
31 Po teu Allah beungéh that-that dan geulawan awaknyan; laju geupoh maté bubena ureuëng-ureuëng Israel nyang mantong muda-muda dan peukasa.
32 Bahpi meunan umat Gobnyan teutab meudesya, buet-buet nyang ajaéb nyang ka geupeuleumah teutab hana jitem peucaya.
33 Dan Allah laju geupeuhabéh udeb awaknyan lagée nafáh, thon-thon awaknyan jipeuhabéh dalam keuadaan teumakot.
34 Pajan mantong Allah geupoh maté napadub droe lamkawan awaknyan, nyang laén meunyeusai dan laju jiwoe ubak Gobnyan.
35 Awaknyan laju ji ingat bahwa Allah na kheueh nyang lindong gobnyan, dan bahwa Nyang Mahamanyang nyang peuseulamat awaknyan.
36 Teuma awaknyan jimeusulet bak Gobnyan, peue-peue mantong nyang jipeugah lé awaknyan na kheueh sulet bandum.
37 Awaknyan hana seutia ubak Gobnyan dan hana jimumat ubak peujanjian Gobnyan.
38 Teuma Allah geugaséh dan geupeu amphon umat Gobnyan, dan hana geupeubinasa awaknyan. Ka kayém that Gobnyan geupeuteun beungéh Geuh, dan hana geupeutrok mureuka Gobnyan.
39 Gobnyan geuingat bahwa awaknyan na kheueh makhluk nyang fana, lagée angén lalu dan hana jiriwang le.
40 Ka kayém that awaknyan jibeurontak keu Gobnyan, dan jipeusakét até Gobnyan watée di padang pasi.
41 Meu ulang-ulang awaknyan jiujoe Po teu Allah, jipeususah Nyang Kudus, Allah Israel.
42 Awaknyan hana ji ingat ubak keukuasaan Gobnyan, nibak uroe awaknyan geupeubeubaih nibak musoh,
43 bak watée Gobnyan geupeugöt buet-buet nyang ajaéb di nanggroe Meusé, dan mujizat-mujizat dipadang Zoan.
44 Krueng-krueng awaknyan geu ubah jeuet keudarah, sampoe awaknyan hana hase jijieb ié krueng nyan.
45 Gobnyan geuseksa awaknyan deungon lalat nyang jai, dan geupeubiyeu tanoh awaknyan jipeumuseunah lé cangguek.
46 Gobnyan geupeutron ulat deungon daruet, nyang jipeuhabéh hase panen dan hase ladang.
47 Gobnyan geupeurusak bak anggô awaknyan deungon ujeuen batée, dan bak-bak ara awaknyan deungon iémbon beuku.
48 Gobnyan geupeubiyeu ujeuen es rhot jitimpok ateueh beulatang peulara awaknyan, dan geulanteue jisama bubena beulatang peulara awaknyan.
49 Gobnyan geupeulheuh banmandum beungéh Geuhnyan nyang hu meuháb-háb deungon cara geuyuejak saboh pasokan malaikat mawöt nyang peujeuet awaknyan putôh asa.
50 Gobnyan hana geupeuteun beungéh Geuh nyan atawa geuweueh inseh ateueh udeb awaknyan, teuma geupeubinasa udeb awaknyan deungon peunyakét sampar.
51 Gobnyan laju geupoh maté aneuëk agam nyang tuha lam tieb-tieb keuluwarga ureuëng Meusé.
52 Gobnyan geupimpén umat Geuh lagée kawan bubiri, dan geupeutakteh awaknyan meulalu padang pasi.
53 Dalam bimbéngan Gobnyan awaknyan aman dan hana teumakot, dan musoh awaknyan ka habéh ngob lam laôt.
54 Laju umat Gobnyan geuba ubak tanoh nyang suci, ubak gunong-gunong nyang geureubot keudroe.
55 Dikeue umat Gobnyan laju geu use bubena peunduduek nyang na disinan laju geubagi-bagi nanggroe nyan keu mandum sukée bansa Israel, umat Gobnyan, sampoe awaknyan hase jitinggai nibak khimah-khimah musoh.
56 Teuma awaknyan beurontak dan jiujoe Po teu Allah Nyang Mahamanyang, peurintah-peurintah Gobnyan hana jitaát.
57 Awaknyan meukhianat lagée indatu droe jih, dan hana hase teupeucaya lagée aneuk panah nyang keuwieng.
58 Awaknyan jilawan Allah deungon teumpat seumah beurala, dan jipeujeuet Gobnyan ceumeuru deungon patong-patong awaknyan.
59 Ban geungieng nyan, Po teu Allah lumpah beungéh, dan geutulak awaknyan meuntah-meuntah.
60 Gobnyan geutinggai khimah Geuh di Silo, teumpat tinggai Gobnyan lamkawan manusia.
61 Gobnyan geupeubiyeu Peuto Peujanjian Geuh jiteun; lambang keumuliaan Gobnyan jireubot lé lawan.
62 Gobnyan beungéh ubak umat Geuh, milék pusaka Gobnyan, dan geupeubiyeu awaknyan jipoh ngon jicang maté deungon peudeueng.
63 Peumuda-peumuda awaknyan jipajoh lé apui; hana nyang tem meukawen deungon aneuëk-aneuëk dara awaknyan.
64 Teungku-teungku imeum awaknyan jipoh maté deungon peudeueng, inong-inong balée awaknyan hana hase jimo ba-e.
65 Teuma TUHAN geubeudôh lagée ureuëng ban beudôh éh, lagée ureuëng teuga nyang ban lheueh jieb ié anggô.
66 Gobnyan laju geuseupôt sampoe jisurot bubena lawan Gobnyan, dan geupeutaloe awaknyan keu siumu masa.
67 Teuma Gobnyan geutulak keuturonan Nabi Yusuf dan hana geupiléh sukée Efraim.
68 Nyang geupiléh na kheueh sukée Yehuda, dan Bukét Sion nyang geucinta.
69 Gobnyan geupeudong Baét Geuh lagée Baét Geuh nyang na di dalam syeuruga, dan lagée bumoe, khong ngon kukoh keu siumu masa.
70 Gobnyan geupiléh Nabi Daud hamba Geuh nyan, dan geucok gobnyan nibak kawan beulatang peulara,
71 nibak teumpat gobnyan peulara nang bubiri, keu geurabe Israel umat Gobnyan.
72 Nabi Daud geupeulara awaknyan deungon jujoe dan ikhlas, dan geubimbéng awaknyan deungon áref dan bijak sana.
