Nabi Yeremia - Aceh Bible - Old Testament / Jeremiah-5

Chapter 5

1 He peunduduek Yerusalem, taja-jak kheueh nibak jalan-jalan nyang na di banda gata! Mita kheueh dipat mantong, dan ngieng kheueh ngon mata ulée gata keudroe. Peureksa kheueh nibak padang-padang banda peu kheueh na meusidroe ureuëng nyang jujoe nyang jiuseuha seutia ubak Po teu Allah. Meunyoe na, TUHAN geupeu amphon keu Yerusalem.
2 Gata tapeugah bahwa gata taseumah TUHAN, padahai gata hana meuniet nyang lagée nyan.
3 Nyang sikeubit jih nyang geulakée lé TUHAN na kheueh keuseutiaan. TUHAN geuseunuet gata, teuma gata hana tapako. Gobnyan geupeureumok gata, teuma gata hana tatem geupeuruno. Gata kreueh that ulée, dan hana tatem meutobat ubak desya-desya gata.
4 Ulôn kupike, "Ah, awaknyan na kheueh rakyat jeulata nyang hana jiteupeue sapeue. Awaknyan meutindak bangai, sabab hana jiteupeue peue nyang geulakée dan nyang geutuntot lé TUHAN Po teu Allah nibak awaknyan.
5 Bah kheueh ulôn jak ubak ureuëng-ureuëng rayeuk, dan lôn meututoe deungon awaknyan. Pasti awaknyan jiteupeue peue nyang geulakée dan geu tuntot lé TUHAN Allah nibak awaknyan." Teuma, awaknyan banmandum hana cit jitem geupeurintah lé TUHAN; awaknyan hán jitem taát ubak Gobnyan.
6 Nyang kheueh sabab jih awaknyan jikeuneuk poh maté lé singa-singa nyang na di dalam uteun, jipriek-priek lé srigala nyang na di padang pasi. Rimueng tutul meuwot-wot keudeh keunoe jijak mita uempeun rab binéh-binéh banda awaknyan, dan soe mantong ureuëng nyang jiteubiet laju jiteugöm. Banmandum nyan teujadi sabab awaknyan ka le that meudesya, dan hana teukira le jipeulikot Po teu Allah.
7 TUHAN meufeureuman, "Keupeue Ulôn harôh Lôn peuamphon banmandum desya-desya umat Lôn? Awaknyan ka jitinggai Ulôn dan jiseumah nyang kon Po teu Allah. Ulôn nyang bri peunajoh ubak awaknyan sampoe awaknyan troe, teuma awaknyan teutab jipeubuet jinah, dan kayém that jijak saweue rumoh-rumoh inong lunte.
8 Awaknyan lagée guda agam nyang teumbon dan teuga nafeusu beureuhi jih; maséng-maséng jimeuheuet ubak peurumoh rakan jih.
9 Peu kheueh hana pantaih Ulôn huköm bansa nyang lagée nyan dan Lôn balaih peue nyang ka jipeubuet lé awaknyan?
10 Ulôn Lôn kirém musoh keu jijak cacah lampôh anggô awaknyan, teuma kon keuteupeu habéh. Ulôn ku yue musoh-musoh nyan keujigunteng carang-carang anggô awaknyan, sabab carang-carang nyan kon atra Lôn.
11 Umat Israel dan Yehuda bit-bit that ka jikhianat Ulôn. Ulôn, TUHAN, ka Lôn peugah haba."
12 Umat TUHAN jipeugah nyang hana beutôi keuhai TUHAN. Awaknyan jipeugah, "Ah, Gobnyan hana geupeubuet sapeue ateueh geutanyoe. Geutanyoe hana keunong bala dan hana teuma ta rasa prang meunan cit hana tarasa deuk.
13 Anggab kheueh nabi-nabi nyan angén jak, sabab peusan TUHAN hana bak awaknyan."
14 Laju TUHAN Nyang Mahakuasa meufeureuman ubak ulôn, "He Yeremia, sabab awaknyan ka jipeugah haba nyang lagée nyan, awaknyan keunong bala nyang meunurot awaknyan hana teujadi. Ulôn kupeujeuet tutoe haba Lôn lagée apui hu lam babah gata. Bansa nyoe jeuet lagée kayée nyang teutot, dan apui nyan jitot awaknyan sampoe habéh."
15 He bansa Israel, TUHAN teungoh geupeuteuka saboh bansa di nanggroe nyang jiôh keujijak prang gata. Bansa nyan ka na yoh awai ilée, basa jih hana gata teupeue. Awaknyan teuga lumpah na,
16 dan ureuëng-ureuëng timbak aneuk panah awaknyan gagah dan beuhe; awaknyan jipoh maté ureuëng laén hana gaséh sayang.
17 Awaknyan jipeuhabéh bubena hase tanoh dan peunajoh gata dan aneuëk-aneuëk gata jipoh maté. Beulatang peulara lagée leumô ngon bubiri gata jisie lé awaknyan, meunan cit deungon lampôh-lampôh anggô dan bak ara jikôh jipeuranab sampoe habéh. Banda-banda nyang meukuta nyang gata peubangga jipeuhanco sapan sapa.
18 TUHAN meufeureuman, "Bahpi lagée nyan, bak watéenyan umat Ulôn hana Lôn peubinasa.
19 Teuma meunyoe awaknyan jitanyong pakon Ulôn peubuet banmandum nyan ateueh awaknyan, tapeugah kheueh he Yeremia, bahwa lagée tôh awaknyan jitinggai Ulôn di nanggroe awaknyan keudroe keujijak meungabdi ubak dewa-dewa bansa laén, meunan cit awaknyan jeuet keu namiet ureuëng-ureuëng aséng di nanggroe laén."
20 TUHAN geuyue bak ulôn mangat lôn peutrok haba nyoe ubak keuturonan Nabi Yakub nyang tinggai di Yehuda,
21 "Deungoe kheueh nyoe, he gata ureuëng bodoh dan bangai! Nibak gata na mata teuma hana tameungieng, na geulinyueng teuma hana tadeungoe!
22 Ulôn kheueh TUHAN; pakon gata hana teumakot keu Ulôn? Nyang sikeubitjih gata yo keu Ulôn! Ulôn kheueh nyang peujeuet panté sampoe jeuet keubataih laôt nyang hana hase jilewat keu siumu masa. Laôt jeuet meugeulora dan geulumbang jeuet meungamuk, teuma hana jeuet jiliwat bak bataih nyang ka Lôn peuteuntée nyan.
23 Teuma gata teutab kreueh ulée dan teutab talawan Lôn; gata ka meunyeuleweng dan tatinggai Ulôn.
24 Hántom na taingat keu tahoreumat Ulôn, padahai Ulôn kheueh nyang kirém ujeuen, bah kheueh bak awai meunan cit bak akhé musém ujeuen. Dan Ulôn cit nyang bri keugata musém keumeukoh óh trok bak thon.
25 Teuma desya-desya gata nyan kheueh nyang peuhalang banmandum nyang gét nyan sampoe hana tateumé rasa.
26 He umat Lôn, lamkawan gata na ureuëng-ureuëng nyang jeuhet. Lagée ureuëng nyang jipreh taron teungoh teupasang keu teujak drob cicém, meunan kheueh awaknyan jipasang taron keu jijak drob manusia.
27 Lagée ureuëng jak jeue cicém sampoe cicém nyang jiteumé nyan laju jipasoe lam cintra, meunan kheueh teuma awaknyan jipasoe lam rumoh jih peunoh deungon barang-barang hase teumipée. Meunan kheueh awaknyan jeuet keu ureuëng meukuasa dan kaya-kaya,
28 lom teumbon ngon makmu. Keujeuhetan awaknyan ka hana le bataih. Awaknyan hana le jimeubuet ade ubak peukara aneuëk-aneuëk yatém ngon meuntui, dan hana jibila hak ureuëng-ureuëng nyang keunong tindéeh.
29 Teuma, Ulôn, TUHAN, Lôn huköm awaknyan deungon buet jih banmandum nyan; Ulôn kubalaih peue-peue nyang ka jipeubuet lé bansa nyoe.
30 Sapeue-sapeue nyang luwabiasa dan teumakot that-that meunan cit gli that teujadi di nanggroe nyoe:
31 nabi-nabi geuseumeungeut, sulet, teungku-teungku imeum jipeutimang umat meunurot keuheundak droe jih keudroe dan gata umat Ulôn galak ubak hai nyang lagée nyan. Teuma peue nyang gata peubuet meunyoe trok bak uroe akhé?"