Lukas - Audio Book: Holy Bible - New Testament / Luke-2 Mary and Joseph in Bethlehem

Chapter 2

1 Bak watée nyan Kaisar Agustus geupeutron titah mangat banmandum wareuga neugahra keurajeuen Roma teudafeutar droe keu teuseunsus.
2 Seunsus nyang phon that nyoe teupeuna watée Kirenius jeuet keu gubunur nanggroe Siria.
3 Banmandum ureuëng bak watée nyan jijak dafeutar droe nibak banda jih maséng-maséng.
4 Yusuf pih laju geujak nibak Nazaret u Galilea, u Betlehem di Yudea, teumpat lahé Raja Nabi Daud; sabab Yusuf keuturonan Nabi Daud.
5 Yusuf geudafeutar droe meusigoe ngon Maryam tunangan geuh nyan, nyang teungoh mume.
6 Watée awaknyan ka troh u Betlehem teuka kheueh watée jih nibak Maryam keuneuk geupeu lahé aneuëk.
7 Laju geupeu lahé sidroe aneuëk agam, aneuëk Gobnyan nyang tuha. Aneuëk nyan laju geubalot ngon ija tumpée, dan geukeubah laju lam palong nyang meuasoe jeurami; sabab awaknyan hana meuteumé teumpat mudom.
8 Bak malam nyan na ureuëng-ureuëng meurabe nyang teungoh jirabe beulatang jih lam blang naleueng nyang na di daerah nyan.
9 Hana teusangka-sangka malaikat Tuhan laju geupeuleumah droe ubak awaknyan, dan cahya trang nyang teuka nibak Tuhan laju teupanca ateueh awaknyan sampoe-sampoe awaknyan ka peungéh ngon trang, dan awaknyan lumpah teumakot.
10 Teuma laju geupeugah lé malaikat nyan, "Bék teumakot! Sabab ulôn nyoe lôn teuka keuneuk jakba haba gét keu gata -- haba nyang lumpah mangat até keu mandum manusia.
11 Uroenyoe, di banda Nabi Daud ka lahé sidroe Raja nyang peuseulamat gata na kheueh Almaseh, Tuhan.
12 Nyoe kheueh tanda jih: Gata teuma meurumpok ngon sidroe aneuëk manyak nyang teubalot ngon ija tumpée, dan teuéh lam saboh palong."
13 Ngon hana teusangka-sangka malaikat nyan meusajan ngon malaikat laén, nyang geupujoe Allah. Awaknyan jipeugah,
14 "Teupujoe kheueh Allah di langét nyang paleng manyang! Dan di ateueh bumoe, seujahteura kheueh manusia nyang peugalak até Tuhan!"
15 Óh ka lheueh malaikat-malaikat geutinggai awaknyan dan geuwoe lam syeuruga, ureuëng-ureuëng meurabe nyan laju jimarit sabe keudroe-droe, "Jak tajak u Betlehem dan takalon peue nyang ka teujadi nyan. Nyang ka geubri tée lé Tuhan keu geutanyoe."
16 Awaknyan laju jijak, óh troh keunan laju meurumpok ngon Maryam dan Yusuf, meunan cit aneuëk manyak nyang teungoh teu éh lam palong.
17 Watée jingieng lé ureuëng meurabe nyan aneuëk manyak nyan, awaknyan laju jicalitra peue nyang ka geupeugah lé malaikat keuhai aneuëk manyak nyan.
18 Dan mandum ureuëng hireuen peue nyang ka jipeugah lé ureuëng meurabe nyan.
19 Teuma Maryam geukeubah banmandum nyan lam até geuh dan geupike ngon teumanueng banmandum nyang teujadi nyan.
20 Ureuëng-ureuëng meurabe nyan laju jigisa u blang naleueng sira jipujoe dan jipeumulia Po teu Allah, sabab banmandum nyang ka lheueh awaknyan deungoe dan awaknyan kalon, paih that lagée nyang geupeugah lé malaikat.
21 Óh watée aneuëk manyak nyan ka meu-umu lapan uroe, laju teupeusunat. Dan awaknyan laju geuboh nan gobnyan Isa, nan nyang geubri lé malaikat ubak gobnyan sigohlom gobnyan mume lam pruet ma geuh.
22 Troh kheueh watée jih Yusuf ngon Maryam geupeuna adat peusuci meunurot huköm Nabi Musa. Dan awaknyan geuba aneuëk manyak nyan u Yerusalem keu geujak peujok ubak Tuhan.
23 Sabab na teutuléh lam huköm Tuhan nyang su jih lagée nyoe, "Tieb-tieb aneuëk agam nyang tuha, aneuëk nyan harôh teujok ubak Tuhan."
24 Meunan cit awaknyan kana meukeusut keuneuk geupeu seumah keureubeuen, na kheueh sipasang cicém teukukur atawa dua boh cicém mirah pati nyang mantong muda, lagée nyang ka teupeuteuntée lam Huköm Tuhan.
25 Bak watée nyan di Yerusalem na sidroe ureuëng nyang nan jih Simeon. Jihnyan ureuëng gét, nyang teumakot keu Po teu Allah dan teungoh jipreh-preh watée jih Allah geupeuseulamat Israel. Roh Allah na meusajan gobnyan,
26 dan Roh Allah ka lheueh geubri tée ubak gobnyan bahwa gobnyan hana maté sigohlom geukalon Raja Peuseulamat nyang ka geupeu janji lé Tuhan.
27 Deungon geubimbéng lé Roh Allah, Simeon laju geutamong lam Baét Tuhan. Bak watée nyan Yusuf dan Maryam laju geupeutamong Isa nyang mantong ubit nyan keu teupeubuet upacara lagée nyang ka jipeurintah lé huköm agama.
28 Teuma lé Simeon laju geucok aneuëk manyak nyan dan laju geutiengkue, óh lheueh nyan laju geupujoe Po teu Allah,
29 "Jinoenyoe, ya Tuhan, droeneueh ka neupeutroh janji. Bah kheueh namiet Droeneueh nyoe meuninggai deungon aman.
30 Sabab ngon mata ulée lôn keudroe ka lheueh ulôn kalon Peuseulamat na kheueh nyang teuka nibak Droeneueh.
31 Peuseulamat nyan ka Droeneueh keubah keu banmandum bansa:
32 Lagée peungéh nyang trang nyang teupeudeuh rot ueh keu bansa-bansa laén, keu teujak ubak Droeneueh; na kheueh trang nyang teupeuteuka keuhoreumatan keu umat Droeneueh Israel."
33 Ayah ngon ma aneuëk nyan hireuen that watée geudeungoe peue nyang jipeugah lé Simeon keuhai aneuëk gobnyan.
34 Simeon laju geubri beureukat keu awaknyan sira geupeugah ubak Maryam, ma aneuëk nyan, "Aneuëk nyoe ka geupiléh lé Po teu Allah keu geupeu hanco dan geupeu seulamat jai that ureuëng Israel. Gobnyan jeuet keutanda nibak Po teu Allah, nyang hana jitueng lé ureuëng ramé,
35 dan deungon na lagée nyan teubuka kheueh peue nyang na teukandong lam até awaknyan. Seudeh ngon pilu teuma jitôb-tôb lam até gata lagée mata peudeueng nyang tajam."
36 Na teuma sidroe nabi inong nyang ka tuha lumpah na. Nan nabi nyan Hana, binti Fanuel, asai nibak sukée Asyer. Óh ka lheueh tujoh thon geumeukawen,
37 Hana ka jeuet keu inong balée sabab ka meucre ngon lakoe geuh, jinoenyoe meu-umu lapan ploh peuet thon. Hántom na geutinggai Baét Tuhan. Uroe ngon malam gobnyan meuiébadat keu Po teu Allah nibak teumpat nyan ngon cara geumeudoá dan puasa.
38 Paih bak watée nyan gobnyan pih teuka, laju geupujoe Po teu Allah dan geumeututoe keuhai aneuëk nyan ubak banmandum ureuëng nyang ka teupreh-preh watée Allah geupeu meurdehka Yerusalem.
39 Óh ka lheueh geupeubuet banmandum Huköm Tuhan lé Yusuf dan Maryam, awaknyan laju geuwoe u Nazaret di Galilea.
40 Aneuëk nyan meutamah rayeuk dan teuga. Gobnyan lumpah bijaksana dan that-that geugaséh lé Po teu Allah.
41 Tieb-tieb thon ureuëng syiek Isa geujak u Yerusalem keu geujak peuraya Uroe Raya Paskah.
42 Dan watée Isa ka meu-umu dua blaih thon, awaknyan geujak ubak teumpat peurayaan nyan sisuai lagée nyang ka-ka.
43 Óh ka lheueh peurayaan nyan awaknyan laju geuwoe, teuma Isa, Aneuëk geuhnyan, mantong tinggai di Yerusalem, lé ayah ngon ma Geuh hana geuteupeue.
44 Awaknyan geupike Isa na rhoh lamkawan. Óh ka lheueh geujak siuroe seupôt baroe kheueh geumita Gobnyan lamkawan waréh kawöm atawa rakan-rakan geuh nyang laén.
45 Teuma nyang geumita nyan hana meuteumé, dan awaknyan laju geugisa u Yerusalem keu geujak mita Gobnyan.
46 Óh ka lheueh na lhée uroe geumita-mita, laju meurumpok ngon Gobnyan lam Baét Tuhan. Gobnyan teungoh geuduek sira geudeungoe gurée-gurée agama seumeubeuet dan geumeuseu-eue jaweueb.
47 Banmandum ureuëng nyang deungoe Gobnyan teuhireuen-hireuen watée jideungoe peue-peue nyang geujaweueb carông lumpah na.
48 Ureuëng syiek Gobnyan pih lumpah hireuen watée geungieng Gobnyan. Mak Gobnyan laju geupeugah ubak Gobnyan, "Neuëk, keupeue kah peubuet mandum nyoe ateueh kamoe? Ayah ngon ma gata ka hék that-that kamoe jak mita Gata!"
49 Geujaweueb lé Isa, "Keupeue ayah ngon ma neujak mita Ulôn? Peu kheueh ayah ngon ma hana neuteupeue bahwa ulôn nyoe na lam rumoh Bapak Ulôn?"
50 Teuma awaknyan hana muphom peue nyang geupeugah lé Isa nyan.
51 Óh lheueh nyan Isa laju geuwoe meusajan-sajan ngon gobnyan u Nazaret, dan taát that ubak mandua ureuëng tuha geuh nyan. Banmandum nyan geukeubah mantong lé ma geuh lam até gobnyan.
52 Isa meutamah rayeuk dan meutamah-tamah bijaksana, dan lumpah geugaséh lé Po teu Allah dan jigalak lé manusia.