5
Elel eke si kʼakmn wus es
1 Ɛgŋ fɛŋ ekʼub nawrɛ eke Jesu el Krist a, el Nyam ecʼiy. Ɛtŋ ɛgŋ fɛŋ ekʼam erur Ɛs Nyam a, am erur in ecʼey a yɛji. 2 Eke sʼam erur Nyam ɛtŋ sʼam ↄsu in e sol a, ke sʼúw any eke sʼam erur Nyam ecʼey a yɛji. 3 Nyam ecʼerur a anŋ in e sol a ecʼↄsu ɛm. Ɛtŋ in e sol a ↄ́tum, 4 aŋke ɛgŋ fɛŋ ekʼel Nyam ecʼiy a akm wus es; ɛtŋ ɛy ecʼↄmn e sʼↄny Nyam ɛm a anake bʼakm wus es a.
Ów yecʼɛm eke wɛl kʼub nawrɛ eke Jesu el Nyam ecʼIy
5 Bwo ecʼɛgŋ akm wus es, ekʼow elm ɛgŋ a ekʼub nawrɛ eke Jesu el Nyam ecʼIy ab ee? 6 Jesu Krist in obi ow wus af aŋa, wɛl okʼr mij nuŋ, ɛtŋ lʼuw lʼok mebl es; lʼɛcr mij ok nuŋ ɛm, lʼuw lʼok mebl es ɛsɛ ɛgŋ af; ów yony na ɛm, Abŋ Lala ij daŋku eke ów amua el nawrɛ, aŋke Abŋ Lala ↄ́nym yadŋ. 7 Ów nyahan anŋ eke okr af am ij daŋku nyam: 8 Abŋ Lala, mij lele mebl ab.
9 Si bʼɛgŋ agŋ e daŋku ij a sʼeb, kↄ Nyam e daŋku ij a agb akm agŋ ecʼa, aŋke Nyam in obi ij daŋku Jim e nuŋ af. 10 Ɛgŋ ekʼub Nyam Jim nawrɛ a, daŋku ij na anŋ in ɛm; ɛgŋ ekʼubm nawrɛ a bʼↄb Nyam yadŋ, aŋke lʼubm Nyam e daŋku ekʼij Jim e nuŋ af a nawrɛ. 11 Ɛtŋ daŋku ij a el: Nyam ↄŋ ɛy sel ekʼↄnym nuŋ, ɛtŋ sel a anŋ Jim ɛm.
12 Ɛgŋ ekʼeb Jim a ɛŋn sel; ɛgŋ ekʼebm Jim a ɛŋnm sel.
13 Mʼam nↄn ów amua mʼↄŋ ↄny, yecʼɛtŋ ke úwr any eke, ekʼam ubr Nyam ecʼIy a nawrɛ a, ke ɛŋan sel ekʼↄnym nuŋ.
Nyam ŋↄŋn e lɛc
14 Eke si bʼim in ogŋ, ke sʼↄny lokm susu, aŋke low fɛŋ eke si bʼow sʼibrm in ecʼerur ɛm a, li bʼow lʼiri ɛy lebl. 15 Ɛtŋ eke sʼuw any eke li bʼiri ɛy lebl a, ke ob fɛŋ eke si bʼow sʼibrmʼn a, sʼúw any eke sʼɛŋn ŋ̂.
16 Ekʼɛgŋ nyam am ɛkn lisijim ekʼam kok sikpl ekʼelm luw ecʼa, ni ŋↄ́ŋn Nyam, ke Nyam ↄ́ŋ lisijim na sel. Na ow el agŋ eke bi kok sikpl ekʼelm luw ecʼa e lís e low. Gbɛkↄ sikpl nyam anŋ ekʼel luw eci; ow elm sikpl ikŋ na eci Nyam mʼɛsmɛ ŋↄŋan. 17 Low ŋuŋ fɛŋ eke wɛl bi kok Nyam e lís a el sikpl. Gbɛkↄ ow elm sikpl fɛŋ ísam ɛgŋ luw ab.
18 Sʼuw any eke ɛgŋ fɛŋ ekʼel Nyam ecʼiy a, am kokm sikpl, aŋke Nyam Jim Jesu Krist bʼↄsuʼr, ɛtŋ agn ɛ́ŋnmʼn. 19 Sʼuw any eke sʼel Nyam ecʼey, kↄ wus af aŋa ecʼagŋ ɛjeci ekʼelm Nyam ecʼey a anŋ agn ecʼes ɛw ɛm.
20 Ɛmɛny sʼuw any eke Nyam ecʼIy ow wus af aŋa ɛtŋ nʼↄŋ ɛy nuŋ ɛm ↄny eke si kʼuw Nyam nawrɛ any. Sʼokr af Nyam nawrɛ ab, Jim Jesu Krist ɛm. Jim na anake el Nyam nawrɛ a, in lʼel sel ekʼↄnym nuŋ.
21 Ɛm ecʼey, ↄsur sos ke kʼúsmn yecʼeke elm Nyam a jam.