16
Ɛsŋn
1 Ɛm obi mʼam ɛrm ɛy lisijↄw sɛnyn Febe, eke el abu ɛlum lis Saŋkre e Nyamel ab ɛm a. † abu ɛlum lis:bɛ̀bmn 1 Timote 3.11. Saŋkre el Korɛnt ɛb ɛm e nanu nyam. Ob Kok 18.18. 2 Èbr ir Ɛs Kↄtↄkↄ e nin ɛm, ɛsɛ elel ekʼow it Nyam ecʼagŋ ecʼaraŋn ab af. Ɛ̀lumn in abu sakp sakp fɛŋ eke li bʼↄny ↄny ecʼes abur a, aŋke lʼɛlum agŋ nↄnↄ abu ɛtŋ ɛm obi yɛji lʼɛlum im abu.
3 Ɛ̀sŋnin Prisil lele ɛc Akilas ab, † Prisil lele Akilas ab:Ob Kok 18.2-3. eke sʼam kok juma nyam Jesu Krist ecʼa. 4 -Lʼow eke -li kʼirmn ɛl e sel a ɛm ecʼa e sↄg sosiɛm eci, ɛtŋ ow elm ɛm sↄny cɛ ow itm eke mi kʼɛlu ɛl bia. Sinyamel a fɛŋ ecʼagŋ ekʼelm Jwifɛl a yɛji it eke kʼↄŋ ɛl bia. 5 Ɛ̀sŋnin Nyamel a yɛjʼeke bʼas luku ɛl ecʼakŋ igŋ Nyam nuŋ a. † Nyamel a eke bʼas luku ɛl ecʼakŋ a:lɛgŋ ab ɛm a, agŋ a ekʼɛgŋ Krist e low eb a bʼas luku ɛgŋ ecʼakŋ. Bɛ̀bmn akr 10,11 lele 23 ab. Ɛ̀sŋnin ɛm lawl Epenɛt yɛji. In lʼel ɛgŋ krɛkrɛ ekʼitŋn ɛrm ɛm el Krist eci Azi wus ab af. 6 Ɛ̀sŋnin Mari eke kok juma nↄnↄ ↄny ecʼa. 7 Ɛ̀sŋnin Andronikus lele Junias ab. † Juniasel yↄw e nin. -Lʼel ɛm ecʼagŋ ɛtŋ ɛl ɛrŋ ɛm anake lɛgŋ ekʼɛc ab ɛm sʼanŋ sobel ɛm a. -Lʼel ɛrm ɛsɛl eke leg nↄnↄ,† ɛm ecʼagŋ:wɛl ↄtu eke kʼiri yɛji ɛsɛ: ɛm ecʼɛbr ecʼagŋ. ɛrm ɛsɛl eke leg nↄnↄ: odad na Grɛk ɛm a wɛl ↄtu ekʼitŋn ɛjecʼɛm dad ɛsɛ: agŋ eke wɛl bʼaw nↄnↄ Krist eci ɛrm ɛsɛl ab ɛm. ɛtŋ -lʼikŋ anym -lʼub Krist nawrɛ gbuŋ ɛtŋ mʼanŋ jam.
8 Ɛ̀sŋnin agŋ amua fɛŋ yɛji: Ampliatus ekʼel ɛm lawl sɛnyn Ɛs Kↄtↄkↄ ɛm. 9 Urbɛn ekʼam kok Krist eci juma ɛy ab a lele ɛm lawl Sakis ab. 10 Apelɛs ekʼɛlu in e cɛcɛ kok ↄkm Krist e nawrɛ ub ɛm, lele Aristobul ecʼakŋ ecʼagŋ ab ab. 11 Erodiↄn ekʼel ɛm ecʼɛgŋ a, lele Narsis ecʼakŋ ecʼagŋ ekʼub Ɛs Kↄtↄkↄ nawrɛ ab ab. 12 Ɛ̀sŋnin agŋ lisijↄwɛl a ekʼel Trifɛn lele Trifↄs ab a. -Nʼam kok juma nↄnↄ Ɛs Kↄtↄkↄ eci. Ɛ̀sŋnin agŋ ɛsɛ: ɛm lisijↄw sɛnyn Pɛrsida eke in yɛji kok Ɛs Kↄtↄkↄ eci juma nↄnↄ a. 13 Rufus ekʼel Ɛs Kↄtↄkↄ ecʼɛgŋ sɛnyn eke sↄsum oc, † Rufus:Ɛ̀kn Mark 15.21. lele lis ekʼɛm yɛji anŋ ɛsɛ ɛm lis af a. 14 Asɛnkrit, Flegↄn, Ɛrmɛs, Patrobas, Ɛrmas lele agŋ lisijimɛl lele agŋ lisijↄwɛl ekʼanŋ ɛl ab a. 15 Filolↄg lel ɛy Juli ab, Nere lele lisijↄw ab, Olɛmpas lele Nyam ecʼagŋ a fɛŋ ekʼanŋ ɛl ab a.
16 Ɛ̀sŋnin ↄny ↄfr ke ɛ́yarir af ɛsɛ Krist ɛm ecʼagŋ lisijimɛl lele agŋ lisijↄwɛl ab af. Krist e Sinyamel a fɛŋ am ɛsŋn ↄny.
Ɛwar es abal el
17 Agŋ lisijimɛl, kin low yecʼeke mʼam dad ↄny: ɛ̀wr sos ɛrm agŋ a eke bi bubr Nyamel ecʼagŋ ɛm a e lís. -Lʼↄtu eke -li kʼↄny ↄmn ɛsɛl a -lʼok wus, sodad a eke -li bʼow -li dad -lʼok low yɛgm a eke ɛŋan ab af a. Kpàbr es ɛl e lís, 18 aŋke agŋ amua am kokm Krist ɛy Ɛs Kↄtↄkↄ eci juma ij. Ɛl obi e lok a e juma nana -li bi kok. Ɛl e sodad ebl eke -li bʼok mij ab ɛm lele ɛl e nɛnym ↄb e sodad eke bʼiŋn sos ɛm ab ab, -li bʼɛju agŋ a ekʼuwm low ŋuŋ any a. 19 Nawrɛ, ↄny ecʼɛlum a, agŋ a fɛŋ uw any; ow ↄŋ, ↄny sosiɛm, mʼanŋ sos ɛm iŋn ɛm. Gbɛkↄ mʼam erur eke sɛwr kʼiy ↄny ɛm gbↄŋ low mamn kok eci, ke sɛgŋ fɛŋ ɛ́wr ɛrm arur low ŋuŋ ɛgbr es. 20 Ow kʼow ibnm, ɛrm es ɛy e Nyam a bʼow kikn Satan es ↄny ecʼakr ew.† Akr lɛw lↄbŋ toŋ akr likŋ a, am ↄkn Nuŋ Ɔb nuŋ 3.1-15 e low a.
21 Timote ekʼam kok juma ɛm ab a, am ɛsŋn ↄny. Lusius, Jasↄn, lele Sosipatɛr ab ekʼel ɛm ecʼagŋ a, ɛl yɛji am ɛsŋn ↄny.
22 Ɛm, Tɛrsius eke mi nↄn lɛl na a, † Tɛrsiusel Pↄl eci lɛl nↄn ɛs. mʼam ɛsŋn ↄny Ɛs Kↄtↄkↄ ekʼↄny okr ɛy af ab ɛm.
23 Gayus am ɛsŋn ↄny,† Gayus:Ɛ̀kn Ob Kok 19.29; 1 Korɛnt 1.14. mʼij utu in ogŋ yogŋ ɛtŋ Nyamel nimum bʼas luku in ecʼakŋ a. Eras ekʼel ɛb ecʼos es ɛw ɛs a lele ɛy lisijim Kartus ab am ɛsŋn ↄny.† Eras:Ɛ̀kn Ob Kok 19.22; 2 Timote 4.20.
Anygbɛl él Nyam eci
[ 24 Ke ɛy Ɛs Kↄtↄkↄ Jesu ecʼↄwrↄ a ánŋ ↄny fɛŋ ab. Amɛn.] † Rom eyŋ e silɛl esig oglog ɛm a, wɛl ɛ́ŋnm sodad ekʼanŋ ob na [...] ecʼaraŋn a. 25 Anygbɛl él Nyam eci! Nʼↄny abusu eke li kʼↄŋ ↄny ijr lɛc ↄmn ɛm ɛsɛ elel eke mʼam dad Amani Mamn ab ɛm Jesu Krist e lís ab af. Amani Mamn na ɛm, Nyam ɛlu low a eke lↄl es godʼɛtŋ a ↄkm, 26 ɛtŋ sica, ow ɛru es usuayl ɛm. Sica agŋ a fɛŋ ekʼelm Jwifɛl a ↄtu eke kʼuwʼr any kokoba ↄb ɛsɛl e silɛl ab ɛm. Nyam a ekʼanŋ sɛgŋ fɛŋ a ɛlu abusu na es, yecʼɛtŋ ke agŋ a fɛŋ úbʼr nawrɛ ke ɛ́lumʼn.
27 Anygbɛl él Nyam ekʼin sↄny coco ↄny sɛwr a eci! Anygbɛl él in eci Jesu Krist ɛm sɛgŋ fɛŋ eci! Amɛn!
†16:1 abu ɛlum lis:bɛ̀bmn 1 Timote 3.11. Saŋkre el Korɛnt ɛb ɛm e nanu nyam. Ob Kok 18.18.
†16:3 Prisil lele Akilas ab:Ob Kok 18.2-3.
†16:5 Nyamel a eke bʼas luku ɛl ecʼakŋ a:lɛgŋ ab ɛm a, agŋ a ekʼɛgŋ Krist e low eb a bʼas luku ɛgŋ ecʼakŋ. Bɛ̀bmn akr 10,11 lele 23 ab.
†16:7 Juniasel yↄw e nin.
†16:7 ɛm ecʼagŋ:wɛl ↄtu eke kʼiri yɛji ɛsɛ: ɛm ecʼɛbr ecʼagŋ. ɛrm ɛsɛl eke leg nↄnↄ: odad na Grɛk ɛm a wɛl ↄtu ekʼitŋn ɛjecʼɛm dad ɛsɛ: agŋ eke wɛl bʼaw nↄnↄ Krist eci ɛrm ɛsɛl ab ɛm.
†16:13 Rufus:Ɛ̀kn Mark 15.21.
†16:20 Akr lɛw lↄbŋ toŋ akr likŋ a, am ↄkn Nuŋ Ɔb nuŋ 3.1-15 e low a.
†16:22 Tɛrsiusel Pↄl eci lɛl nↄn ɛs.
†16:23 Gayus:Ɛ̀kn Ob Kok 19.29; 1 Korɛnt 1.14.
†16:23 Eras:Ɛ̀kn Ob Kok 19.22; 2 Timote 4.20.
†16:24 Rom eyŋ e silɛl esig oglog ɛm a, wɛl ɛ́ŋnm sodad ekʼanŋ ob na [...] ecʼaraŋn a.